Read Angguruk Yali RATAPAN 1 Bible Online

RATAPAN 1 - Angguruk Yali bible

RATAPAN 1

¹Yihi, indam o pumbuk aru ap anggolo welatfag angge famen ketiya ap enele teng atisi. O pumbuk winon ununuk apma regma at unuk eneg palimu welatfag ambeg ino hiyap yuwohon hag atisi. O pumbuk anggolo sen enesug latfahon ino ap enemingmingangge atisi.

²O hubanggo indi siyahen uba yatukmen eneg uba ik hag toho oroholeanggen fene wamburuk. At inindi haruk latuson arimanowen indi seyap tik waharuk eleg. Ori obog tohowen at men seli roho wereg lit ele ying turuk.

³Yehuda ino ap seliyonen siyahap turukmu asengseng toho weregman nin inggik hele waroho o winama hondoholug larusa. Larusama o kema-kema ap o pumbuk winamon sehelimu wereg lit indi yuwag toho wereg eleg. Ap seliyonen walinggigmu hirane roho wereg.

⁴Allah wel turuk sambil arimano ap waharuk elehen kalem tom Sion fil larukon abir atisi. Hiyap tuhumon indam enehiyehen yunggultuk latuson arimano ketiya inindi anggin toho weregma Allah ibam foroho inaben sat fo uruk. O Yerusalem elehet walinggoho ohowon sok arimano ap kuk wilip am turuk elegma o ino oboluk atisi.

⁵Yerusalem inowen NINIKNI Allahn nirim perukon anggolo turuk latisiyon fahet alem angginon ubam emberuk latisi. Ap seliyon arimano palimu atusareg enembong se roho turuk lit he Yerusalem umalikisi ininggik hele waroho og eneplug larusa.

⁶He Yerusalem unuk mondabi palimu welatisiyon ino mondabi siyag atisi. O ino seneg inap arimano wam eliyen naruk angge yami ril larukmen hiyaharuk elehon hag atusa. Aben unusul ulug mug eneplug larukmen inine eleg atuk latusa.

⁷Ibam halog toho lin irisimu he Yerusalem ino indam mun angge man angge fanowon seneg latikik ulug indi anggin toho wereg. Ap seliyon ininggikmu atisimu ap misihen oho windarik waharisi fug. Waharisi fugmu mondabi siyag atisi ane yet haruk lit it seliyonen inda yatuk latusa.

⁸He Yerusalem inowen tuk fug teg ane anggolo turuk lit inggarehen siyahap taruk latisi. Abiye weregma it indam wel turuk latusa inap obog tohowen yet haruk lit ninirim peruk. Inggaliyen orohole saltuk lit indi siyahen sat fo uruk.

⁹Siyag angge asum fam tag tegma ap obog tohowen yet haruk latusa angge famen inggareg ubam teg ane fahet wenggel haruk latisi fug. Wenggel ha fugmen mako wamburuk latisimu ap misihen oho fet tik waharisi fug. Waharisi fugmu ele hi roho uruk lit, ”NIKNI Allah, ap seliyon arimanowen winik-wonog angge ruruken an asengseng toho weregma yet niyimin.

¹⁰Haren ap o winamon An nibam kuruk lamuhup fug ulug imbinag angge famen it seliyon arimano kurusareg fano-fano angge obog toho huhulangge hilarusa,” uruk.

¹¹Yerusalem inap obog tohowen suburu yami rurukmu elehen ngesekum turuk. War amuhuk tohon suburu og numag ulug mun angge man angge fanowon ininggikmu werehon ap og isaruk. Enele hi roho, ”NINIKNI Allah, nit ninilaheg toho weregma yet nisa ma!” uruk.

¹²He Yerusalem iraham ke laruk inap unubam ele uruk lit, ”Yet niya maniyek! Ouk an nubam werehon tu hahon ap winon unubam weregma yet harikip ano? NIKNI Allah undaman indok asingsingnag paluk laharuk hag toho turuk lit alem ari an nubam emberisi. Ari hahon hit hunubam umbuhu rohon!

¹³Aren poholman indok pilabik waharisimu an nuwag narisi. Luhur amag ulug norohole fil yebangge reg latisimu lamin peruk latikik ke la fug teg latikik. NIKNI Allahn numbaharisimu ouk eneg waruk lahi.

¹⁴Siyag ane anden turuk latikikon arimano Nikni Allahn hele fam ha roho numaloma imbik laharisimu talo roho ying atikik. Nikni Allahn ap seliyon ininggikmu numbaharisimu anden windat ta fug teg latikik.

¹⁵An numalikisi kabiniyon obog al sahaloho unusukag ulug Nikni Allahn ap seliyon mon enebik waharisimu an fahet enehako roho tog aptukon arimano obog toho apmayap eneptuk lit aben sak umatuk hag toho hulmako unusurusa.

¹⁶Unusurusama an uba longgon kali-kale uruk lit weregma onggon naptukon eke niraham waharisi fug. Ap seliyonen an numalikisi apmayap eneptusama inindi sohu-saha uruk latusa.

¹⁷Let nabik maniyek ulug an ninggik leho lit welahi angge famen ap misihen oho nindi seyap naptuk eleg. NIKNI Allahn numalikisi Israel inap unusukag ulug ap o kema-kema walinggoho werehon arimano wol eneptisimu an Yerusalem welahiyon aru fahet me nenepe ulug siyahap nabik waharusa.

¹⁸Anden NINIKNI Allah ele holtuk latikik fugmu At mun ane man ane fano haltuk ahun inowen fano nuwatisi. Hit ap o pumbuk kema-kema welahebonen an nele uruk lahi ane aru holiyok! An numalikisi abet hiyabet ininggik hele waroho o winama og eneplug larusama nindi ouk toho welahiyon aru yet neyemek!

¹⁹An indam inindi nasug latuson arimano wol eneptikik angge famen waharusa fug. Allah ibam foroho inap imam arimano men ap onowesi roho werehon menen suburu yami rul ulug o pumbuk walinggoho larukmen suburu elehen war atuk latusa.

²⁰NIKNI Allah, an nakolen namelmel toho welahiyon aru yet niyimin! Nungge fahet Allah ele ilahal watuk latikik ulug nindi wat taruk lahi. Ap seliyonen numalikisi fareman unusurukmu abet hiyabet olman ouken war atusa.

²¹An nindi siyahen nele nilaheg toho urukmu ap seliyonen hol niyaruk latusa angge famen ap misihen oho an nindi nahiyehap nabik waharisi fug. Alem angginon an nubam atisiyon fahet it seliyon arimanowen hol halug inindimuwen wenggel haruk lit Ikni Allahn watisi ulug enehiyeg haruk. Ari fahet Haren unusuhuk inag sambil horog aruhumu alem angginon an nubam atisi hag toho it unubam oho aruhu.

²²Iren siyag ane turuk latuson arimano obog toho Hat holohotma embemihin! Anden Hat hele suhan isarikikon fahet alem angginon nubam emberikin hag toho it unubam oho umbuhun. An nindi siyahen sat lahuk wambuk turukmen eneg nindi ouk naptuk,” uruk.