Read Angguruk Yali RATAPAN 2 Bible Online

RATAPAN 2 - Angguruk Yali bible

RATAPAN 2

¹Yihi, Nikni Allahn indi olok haruk lit tom Sion ino hina singonen hililip tirisi. Olok harisi sambil ino uyug ahongge Sion fahet nindi ulug wenggel ha fug angge Israel inap eneliliyangge welatisiyon o pumbuk Yerusalem ino poholman kinangma hik isa wambirisi.

²Nikni Allah undama ahe laharisimu indi isa fug angge Yehuda inap inibam elehet yaron walinggoho ohowon obog toho halog turuk lit onowe suwonet at let turukonet siyahap eneptisi.

³Olok anggolo haruk lit Israel inap ininggik kong tebeserisimu inine roho turuk ane eleg atisi. Ap seliyonen unusul ulug turukmu ili og enepmin fug ulug inggik kobog isarisi. Aben harep pisatukmu mun angge man angge nil laruk hag toho Nikni Allahn o Israel kinang aru siyahap tirisi.

⁴Ap seliyonen hag toho turuk lit inggik ineyonen tog sehen inggilama kilabeg lit an numalikisi nindi enesug latikikon unusirisireg undama ahe laharukon ari indok ambulpul hahon o Yerusalem fam hik isarisi.

⁵Nikni Allahn umalikisi Israel inap seliyap eneptisireg mondabi siyahap enepmin ulug inibam fanowon obog toho men o elehet yaron walinggoho ohowon men halog toho lin isarisimu Yehuda inaben enele ya nga urukmen eneg wereg.

⁶Yabukmu o sabo wirihon halog turuk hag toho NINIKNI Allahn inggareg ibam At wel tul ulug laruk latukuk ambeg ino halog tirisimu umalikisiyen NINIKNI Allah olohotman yunggultul ulug palu atuk sambil men o sabiren angge kel taruk sambil men enepeleg atusa. At olok haruk lit indi inahan turukmu Israel inap onowe suwon men Allah ibam foroho inap imam arimano men embeserisi.

⁷Nikni Allahn an nubahet nungge-nungge imbik waharuk ambeg nirim ulug ibam ambol yig utuk lit ubahat ineyon halog toho lin ukag ulug ap seliyon ininggikmu emberisimu aben Allah olohotman yunggultuk sambil enehiyehen enele hi roho uruk hag toho ap seliyonen Allah ibam ele keyen enele ngik-ngog uruk latusa.

⁸NINIKNI Allahn elehet o Yerusalem walinggoho ohowon halog tuhuk ulug kong toho emberisireg tor angge oho umbuk fug angge obog toho halog tuhuk ulug hele fam wirim til laruk lit misihim eneg elehet selmonet undamonet fiyok toho siyaha feserisi.

⁹Elehet sok hembir angge fala roho hik isarisimu sok umbangguwag halog toho lin-lan uruk. Yehuda inap onowe suwon men at let turukon men ininggik hele waroho o winama og eneplug larusama NINIKNI Allahn tuk teg ane fahet komo enepfahon ap misihen toho milal eneptuk eleg. Ele amingmingangge nabi hiyag isaruk elehen fulu roho yet halug ap hiyag isaruk ane eleg atisi.

¹⁰Yerusalem inap onowesi arimanowen fesi lahaboho fong watuk lit enele uk fug angge kinangma heriyegma hiyap tuhumon inindi siyahen onorohole han kinangma sahung teg.

¹¹An nakolen namelmel toho wereg lit uba longgon kali-kale uruk lahi. Anden yet harukmen numalikisi war atukmu malik fuwon suburu oboken inil fulug turuk lit o sili ke yinggigmu yet isaruk latikikteg an nine ik kililoho laruk hag toho longgo irisi.

¹²Malik arimanowen inisingasi unubam, ”Nungge fahet ik men suburu men og nutuk lahep fug?” urukmen aben unusurukon hag toho o silimuwen fuk toho ying-pising urukmu inisingasiyen mako pug toho sen enesug lit weregman war atuk.

¹³Yerusalem, nehe, hat asengseng haruk lahen hag toho o pumbuk winon eke welatisi fug angge re anden nungge uruk lit hindi seyap hapmin? Saho ahik hum teg hag toho alem siyahon hat hubam atisiyon ino oho mondabi su rehen ap san hat hihit habuhu?

¹⁴Allah wene hiyag isaruk inap nabi arimanowen hat hubam teko lahu ane fahet enele si ane uruk latusa. Aben elehet siyag toho waruk lit fano pukag ulug mur ka lahaptuk hag toho ap enele ying eneptuk. O Yerusalem aru hebeloho fano aruhu rohon ulug siyag ane haren turuk latikinon fag turuk latusa fug angge famen siyag ane nin sebe roho turuk lamag ulug enele si ane uruk lit hindi og haptuk latusa.

¹⁵Ap o Yerusalem iraham ke larukonen kim haruk lit wasubag sup isalug ununggul kani ruruk. Enembilik putuk turuk lit, ”O Yerusalem mondabi fano reg ulug o pumbuk kema-kema werehonen enehiyeg haruk latuson ino ketiya nangginoho wereg?” ulug hinggaliyap haptuk.

¹⁶Hat huwatuk inap obog tohowen enembilik mul-mul hat habug uruk. Eneyeg kilit matuk lit, ”Niren amusun toho nangno ruruk latukuk sambil horog atisimu ap arimano hum-hum pil isarukuk,” uruk.

¹⁷NINIKNI Allahn indam o Yerusalem halog tuhuk ulug kong toho imbibahon hikirap turuk lit hat indi hiya fug angge siyahap haptisi. Ap seliyonen hat Yerusalem siyahap haptukon fahet enehiyeg hawag ulug it ininggikmu humbaharisi.

¹⁸Elehet hat Yerusalem walinggoho kilap hasuhonen Ninikni Allah ubam ele hi roho let nabik watmihin ukag. Likiya hupmu uba yatukmu ik wirig atukon hag lamag. Kel ta fug angge uba liloho pilaptuk laruhu.

¹⁹Yerusalem, haren hup-hup angge Ninikni Allah ubam nele hi roho imin ulug in aheg ying aheg turukmen eneg welaruhun. Aben ik hililtuk hag toho hat hundaman peruk lahenon Ninikni Allah hiyag itmihin. Humalikisi suburu oboken ke ilanma ying-pising uruken war amuhup tohon let enebik ma ulug At ubam sembahyang imihin.

²⁰NIKNI Allah, yet niya ma! Haren an fahet sa hag toho wereg ulug wenggel haruk lit nuwatuk lahen? Inisingasiyen unumalikisi inindi enesuhon waroho fano naruk lamag peruk lahen ano? An nibamen namingmingangge imam men nabi men fano unusukag ulug wenggel haruk lahen ano?

²¹Ap kabiniyonet hiyap tuhumonet karohen unusurusa. Ap sabalonet malik toronet kalem ilan ke waroho lin-lan uruk. Hat holok harikin sambil ino hindi isa fug angge wam watuk hag toho it obog toho unusirikin.

²²Hat holohotman palu atuk lit yunggultuk sambil ap wol eneptuk lahen hag toho ap seliyon walinggoho welahebonen o Yerusalem inap unusik maniyek ulug wol eneptikin. Hat NINIKNI Allahn holok harikin sambil ino ap misig oho koloweg wilip atisi fug. Numalikisi kul eneptuk latikikon arimano ap seliyonen elehap eneptusa.