Read Angguruk Yali RATAPAN 3 Bible Online

RATAPAN 3 - Angguruk Yali bible

RATAPAN 3

¹An suwesingga aru hahatuk lahi nahun NINIKNI Allahn olok haruk lit nuwatukmu asengseng toho welatikik.

²O seleg yet haruk laruhu fug ulug Allahn hik teg ambeg og naplug larisi.

³Likiya hupmu numbahuk fug angge inggik ineyonen nuwatuk latisi.

⁴An nunuwet nahabet fungguli feselug nuwag fala rebeserisi.

⁵Lisa-masa roho welamag ulug Allahn walinggoho kilap nasug lit hele ahaluwe sihon hinang nutuk.

⁶Hik teg ambeg og naplug larisimu ap indam war atfahon hag toho welahi.

⁷Nin hebeloho wilip aruhu rohon ulug an ninggik hele ineyon fam wat naptisireg elehet huk toho kilabeg ambeg numbaharisi.

⁸An nele hi roho let nabik watmihin ulug sembahyang urukmu Aren hol niyaruk eleg.

⁹O kema-kema lahu rohon ulug an nabunggalem helep elehet oko siye ririsi.

¹⁰Olomene olokon hag toho hirahoma wereg lit an kahal nasug latisi.

¹¹An kalemma larukmen miyaloho hik niyarisireg nunu pindil-pindil hik isalug larisi.

¹²An nuwatmin ulug tog pising timin perisi ambeg unduhuk nubaharisireg tog lit fang uruk latisi.

¹³Tog sele roho nuwatukmu an nindi ahako folok toho kirisi.

¹⁴Likiya hupmu nori obog tohowen an nubahet kelem sini uruk lit inda yako ninggaliyap naptuk.

¹⁵Wam amiye men hele ahaluwe sihon men nalug ahum fibukag ulug Allahn hinang nutuk latisi.

¹⁶Helep anggen sahal-sahal nawag ulug inggiken an hondo nasugmu norohole han kinangma sahung teg latikik.

¹⁷An nindi yuwag toho welahi ane apeleg amag ulug NINIKNI Allahn inggik kobog niyarisimu fano roho wereg ane napeleg atisi.

¹⁸Hebeloho fano noluk welaruhuk fug. NINIKNI Allahn fanowap nabuhu peruk latikik ane eleg atisi.

¹⁹An nindi yuwag am fug angge asengseng haruk lahiyon fahet wenggel haruk lahi ane ari wam amiye sihon men nali humu men nalug war atukon hag toho wereg.

²⁰An siyag toho welahi ulug wenggel harukmen eneg nindi anggin atisi angge famen

²¹nin hebeloho wenggel haruk lit NINIKNI Allahn umalikisi umbusuk fug angge indi enesugmen eneg wereg peruk lahi halug Allahn an oho fanowap nabuhu ulug nindi yuwag atuk.

²²

²³O sakan turukmu mo lahik waharuk hag toho likiya hupmu Allahn umalikisi indi isaruk. We tem toho inggik kobog isaruk laruhu fug.

²⁴An nindimuwen wenggel haruk lit, ”NIKNI Allah ubam welahireg Aren tem toho let nabik waruhu,” peruk lahi.

²⁵Ap san NINIKNI Allah yami ruruk lit tem toho let nabik waruhu ulug nangno ruruk halug Aren fano ane unubam turuk laruhu.

²⁶Ap inindi yuwag toho wereg lit NIKNI Allahn tem toho windat nabuhu ulug yet teg ane ari fano.

²⁷Ap enebe totman inindi imbik wamburuk lit anggin angge ha roho walug laruk ane ari fano.

²⁸Ap sa NINIKNI Allahn anggin angge ubam emberuk halug ele uk fug angge amumu welaruhu.

²⁹Allahn nin hebeloho fanowap nabuhu ano ulug indi apma roho orohole han kinangma sahung teg lit welaruhu.

³⁰Aben wabul ulug waharuk halug oroholeanggen unug isaruk laruhu. Aben pet turuk halug fano pet naptuk peruk laruhu.

³¹Ninikni Allahn nit fahet nirim ulug ambol yig nisarukmen eneg welaruhu fug.

³²Aren umalikisi unusuruk halug oho inilaheg ulug indi isaruk lit wereg.

³³Alem siyahon ap unubam emberuk lit apmayap eneptuk ane fahet ahiyeg haruk eleg.

³⁴O kema-kema ap ininggik hele waroho kilap eneptuk ambeg werehon arimano unuyuhen sobir isarukmu Ninikni Allahn yet isaruk.

³⁵Allah palimu werehonen iren tohon wal taneg og isaruk lamuhup ulug imbibahon sobir isalug og isaruk elegma Aren yet isaruk.

³⁶Alem haloho emberuk ambehen ap un ane unubam lombohap eneptukmu Ninikni Allahn yet isaruk.

³⁷Ap ekeyen tu men ari men teko lawag uruk halug teko la reg ano? Ninikni Allahn teko lawag uruk ane eneg hikir atuk.

³⁸At palimu werehon ambilik famen alem siyahon men fanowon men wereg atuk eleg ano?

³⁹Ap ekeyen siyag ane turukon fahet Allahn alem angginon ubam emberuk halug nungge fahet aren Allah ubam suwahal uruk?

⁴⁰Nit kalem fanowon laruk lahe ano ulug fuki roho wenggel halug NINIKNI Allah ambeg hebeloho lahuk.

⁴¹Ninindi wirik toho Allah poholmon ubam wenggel haruk lit nininggik At ibil leko sembahyang uruk lamuhukon tu:

⁴²Niren siyag ane turuk lit Hat hele ying haptuk latukukon ari hambolmaya feseruk latikin fug.

⁴³Hat hundama ahe laharukon ariyen hindi obog toho hililip turukmu hindi nisa fug angge muko-siko nunusuruk latikin.

⁴⁴Hinan mapmu raruk lit niren sembahyang uruk laheyon holtuk latikin fug.

⁴⁵Haren ari roho nunubam turuk latikinmu ap o pumbuk kema-kema werehonen yet nisaruk lit nit fahet siyag angge aben hik isarukon hag toho wereg peruk.

⁴⁶Nit nunusuruk inap obog tohowen enembilik putuk toho inda yag neneptuk.

⁴⁷Nit fahet yebangge yep turuken war amul ulug nenekol anggolo haruk lahe.

⁴⁸Nori obog toho mako tung-tang wamburukmu anden yet isaruk lit uba yatukmen eneg ik wirig atukon hag toho welahi.

⁴⁹Likiya hupmu an kel ta fug angge uba yatukmen eneg

⁵⁰NINIKNI Allahn poholman pilap nisahu.

⁵¹O Yerusalem hiyap asengseng toho turukmu yet isaruk lit an nindi ouk naptuk.

⁵²Alem nubam elegman an men seli roho werehon arimanowen suwe muko laruk hag toho mug naplug waharuk latusa.

⁵³An noluk weregma kiling elma tamako pilap naptusareg helep nubam hik isa wamburusa.

⁵⁴Ik yenggeltil laharuk lit hondo naptukmu ubuk imin perikik.

⁵⁵Kiling ele yaron famen anden Hat NIKNI Allah hunuk uruk lit,

⁵⁶”Nele hi roho let nabik ma urukmu Hat hisanggo labuk fug angge hol niyimin!” irikikmu hol niyarikin.

⁵⁷An nele hi roho hubam irikik sambil ino Hat an niraham waharikinteg, ”Hakol ha fug!” ulug hiyag nitikin.

⁵⁸Aben alem nubam lombog turusama Hat Nikni Allahn an ili og naptuk lit windat naptuk latikin.

⁵⁹Aben siyag ane an nubam turuk latusa ane fahet holuk teg lit alem nubam lombog turuson hal nabin!

⁶⁰Iren an fahet ninirimen wabul ulug turuk ane obog toho Haren yet isaruk latikin.

⁶¹Iren an huluwap naptuk lit siyahap tul ulug enele sahaltuk ane obog toho Hat NIKNI Allahn hol isaruk latikin.

⁶²Likiya hupmu an nabug urukmen warukmen eneg wereg.

⁶³Hubet in atuk lir oho hupmu nohul ulug ying atuk lir oho an inda yako ninggaliyap naptukon yet isimin!

⁶⁴NIKNI Allah, iren siyag ane turukon fahet Haren ayeg waroho alem angginon unubam umbuhun.

⁶⁵Inindi nonghong uruk lamag ulug lukuram yig isimin!

⁶⁶NIKNI Allah, hahummu het-pet toho mug eneplug laruk lit kinangman mondabi elehap enebuhun.