Read Angguruk Yali RATAPAN 4 Bible Online

RATAPAN 4 - Angguruk Yali bible

RATAPAN 4

¹Yihi, emas indam umbagpag turuk latisiyon ino il hik atisireg orohole mondabi fanowon ino siyag atisi. Allah ibam witfag ahalep arimano ap seliyonen halog toho hik isarusama ilan ke lin-lan uruk.

²Yihi, o Yerusalem inap kabiniyon arimano unubabut emas fanowon hag toho welatusa angge famen kubag kinang huluwon fam wiratukon hag atusa.

³Olomeneyen umalik ag mondotuk angge famen an naholani arimano huhubi anggen walinggig lam fug angge embeselug larukon hag atusa.

⁴Malik fuwon ik oboken enembilikanggen lam-lamma topno reg. Winonen suburu og nesemek ulug ap unubam heng eneptuk angge famen misihen oho og isaruk eleg.

⁵Indam unduk fano angge eneg naruk latusa inap arimano ketiya suburu oboken inil fulug turuk lit o sili ke yi-yingna uruk. Polu sum tuwalegma heriyeg latusa inap arimano sabelepma imbil-ambal uruk.

⁶An noriyen amben mondabi siyahon turuk latuson palimu regma o Sodom inaben siyag ane turuk latfahon ari apma reg angge famen o Sodom ino ap misihen oho siyahap tuk fugmen il misihim halog toho lin ibag.

⁷Yerusalem inap onowesi welatuson arimano siyag angge unubam tag teg elehen hina yanggowon men wam sapi ag owe il yanggowon men hag toho welatusa. Enehap umbagpag turuk latuson men fek wentin huluwon men wirim teg elegma enebe helep ili faya urukon hag toho welatusa.

⁸Ketiya onorohole usanduk singon hag atisimu enehap e ilimon hag toho weregma unuwag eneg wereg lit kalemman onori men salkal urukmu tu sa waharuk ulug inindi nonghong uruk.

⁹Tog elman war amuhup halug fano, suburu oboken war amuhup halug siyag. Suburu elehen asengseng haruk lit amusun toho weregman eneg war amuhup tohon.

¹⁰Nori Israel inap arimano tin-tan urukmu hiyap inindi lombuk toho welatuson arimanowen ininggareg ininggiken unumalik waroho isag taruk latusa.

¹¹NINIKNI Allah undama ahe laharukmu olok haruk ane indok ambulpul turukon hag toho o pumbuk Sion fene hik isarisimu indoken o pumbuk ubuleyet naruk lit oluna feserisi.

¹²Ap o kema-kema werehonet onowesi suwon kinang atogman atogma werehonet inindimuwen wenggel haruk lit, ”Ap seliyon o pumbuk Yerusalem elehet yaron walinggoho ohowon pin kul ulug sok ele keyen kuk fug teg,” perukmen kuruk latusa.

¹³Kuruk latusa ane ari Allah amingmingangge nabi men At ibam foroho inap imam menen Allahn nirim peruk ane turuk latuson fahet teko larisi. It arimanowen o Yerusalem pumbukmuwen alem unubam eleg inap unusuruk latusa.

¹⁴Unusurukmu enemep it enesum fam are atisiyon wan tegma aben sen isa fug tehen iniraham waharuk latusa fug. Ap inil hupnihon laruk hag toho talog-falog angge ril laruk latusa.

¹⁵Aben it unubam enele hi roho, ”Siyahon hit hunubam tag tehen henebe! Nit sen nenebuk fug!” uruk latusama it inibam embeselug o winama larusama iren oho, ”Nit men welamuhuk fug,” uruken o ekema la ekema wam turuk latusa.

¹⁶NINIKNI Allahn An nolohotma weregma yet isaruk laruhuk fug ulug yanggal eneptisimu aben imam inap hi eneptuk ane men onowesi inindi isaruk ane men ninirim ulug embeseruk latusa.

¹⁷O yaron palimu unduhuk lit ap o pumbuk ekeyen nit ninibil wamusa ano ulug yet enesugmen eneg welatukuk angge famen waharusa fug.

¹⁸Ap seliyonen kahal nenesuhen nit ninibamen wilip atuk elegman eneg war amuhukon horog atisi.

¹⁹Suwe kut folo-folo pohol ke laruk ane apma regma ap seliyon unuyug ilaluwe roho laruk ane palimu reg lit punumuwen mug neneplug waharusareg lekma hirag atuk ambeg kahal nenesug latusa.

²⁰Nonowe suwon apma welahe ane ariyen nonoluk wereg lit o pumbuk nit walinggoho werehon sehelimu ninindi yuwag toho welahe peruk latukuk angge famen ap seliyonen ap suwon NINIKNI Allahn mumal tarisiyon ino fahet yebangge yep turusareg senetusa.

²¹He Edom o Us kinangma welahenon, nehe,[1] ik ahaluwe sihon Israel inaben narusa hag toho anden oho naruk laruhuk ulug hahiyeg toho welamok! Ik ino nalug nenek turuk lit hasum nonggoloho hik isalug kabiyog welaruhun.

²²Hat Yerusalem, nehe, siyag ane haren turuk latikinon fahet NINIKNI Allahn alem angginon hubam emberuk ane obog aruhumu hat nin hebeloho hinggik hele waroho o winama og haplug lahu fug angge famen hat Edomen siyag ane turuk latikinon NINIKNI Allahn inamap turuk lit alem angginon hubam umbuhu.