Read Angguruk Yali RATAPAN 5 Bible Online

RATAPAN 5 - Angguruk Yali bible

RATAPAN 5

¹NINIKNI Allah, alem eke hag eke hag nunubam atisiyon fahet hapeleg aruhu fug. Nit aben apmayap neneptukmu nininggali haruk laheyon yet nisimin!

²Kinang Haren og nisarik inahon ino ap o winamon ininggikmu atisimu ap pohonen ninibam seneg lit wereg.

³Niniknisi unusurusama ninisingasi yuwog wereg, nit malik suwarehon hag toho welahe.

⁴Ik narukon onggo paloho waruk lit e indokma yaltukon ayeg waroho hilaruk lahe.

⁵Ap seliyonen mug neneplug waharuk lit sen nenebul ulug turukmu nit wilip amul ulug kel ta fug angge larukmen eneg ninine eleg atisi.

⁶Suburu og nisaruk lamuhup ulug Mesir inap men Asyur inap men unubam heng enebik larukuk.

⁷Nit niniknisiyen siyag ane turuk latfareg war atfag angge re alem it unubam alebon nit nunubam atisi.

⁸Ap seliyon enemingminganggeyen nit sen nenesugmu it ininggikmuwen windat neneptuk ahun eke wereg eleg.

⁹Ap seliyonen kalemma kahal neneptuken nit suburumu laruk lit nunusulusa ano ulug nenekol nim-nim laruk lahe.

¹⁰Suburu oboken nenehap indoken wikal eneptukon hag toho welahe.

¹¹Hiyap tuhumon o Yerusalem werehon men o Yehuda pumbukmu werehon men ap seliyonen siyahap enebil laruk latusa.

¹²Nit nonowesi e fam ililoho song enesug lit unusurusareg ap sabalon wasubag onolohotma sup isalug ininggaliyap eneptuk latusa.

¹³Nonori kabiniyon arimano ininggik lisoho mingming eneptukmu it winonen roti anggen lisag toho warikim winonen e angginon ha rulug larukmen salog-malog angge roho wat taruk.

¹⁴Ap sabalon o pumbuk elehet walinggoho ohowon sokolma palu arik waharuk ane eleg atisimu ap kabiniyonen pinggong watuk ane embeserusa.

¹⁵Si roho yunggultuk latukukon ubalma ninindi siyahen uba yatuk lahe. Nenehiyeg toho welatukuk ane ari mondabi eleg atisi.

¹⁶Neneliliyangge nununggulmu lahaptukukon arimano mako wamburusa. Niren siyag ane turuk latukukon fahet war amuhuk.

¹⁷Tom Sion fam Allah ibam halog toho lin urusa ambeg olomene la wam turukmu yet haruk lit nit ninindi ouk neneptukmu uban ninil hik atuk.

¹⁹NINIKNI Allah, Hat lehoma heriyeg lit mun angge man angge senegman eneg welaruhun.

²⁰Hat nit fahet hapeleg toho weregman eneg mondabi nunumbahakun ano?

²¹NINIKNI Allah, nit Hat hambeg suhuloho wamuhuken hondog nenebik waruhun! Tem toho hambeg wamuhuk. Nit indam fano welatukuk hag toho welamuhuken nin hebeloho fanowap nenebuhun.

²²Nit let nenebik waruhuk peruk lahen ano? Nit fahet holok haruk lit hambol yig nisarikinteg mondabi nunumbahakun ano?