Read Angguruk Yali YEHEZKIEL 1 Bible Online

YEHEZKIEL 1 - Angguruk Yali bible

YEHEZKIEL 1

¹ Mo ilig am wirig am turukmen teng misigmen nubam hilag hinahan 30 atfahon fam Yehuda inap onowe suwon Yoyakhin ino inggik hele waroho walug libahon ino o Babel weregman eneg mo fuwaben atfag. Mo ino fam pikalem uhanehon inam atfagma hup fuwabenam noholug an hun Busi amloho Allah fahet hubu lahaptuk lahi nahun imam Yehezkiel ino nori Yehuda inap ininggik hele waroho o Babilonia imbisik libahon winon men ik Kebar ayegma welatukuk. Wereg lit anden yet harukmen pohol husigmu Allah fahet fulu roho yet harikik. Yet harukmen NINIKNI Allahn ele an nubam uruk lit At inggik ineyonen sen naptisi.

⁴Anden yet harukmen ik eleruk filen siyelu waharuk lit hina humon walug waharuk latisi. Hina ino walinggoho umbagpag turukmu lebeglu turuk latisi. Lebeglu ino undama ine angge mondabi umbagpag turukon hahon inam atuk latisi.

⁵Hina ino undama onoluk wereg angge ap unubabut hahon uhan weregma yet harikik.

⁶It itano enebe wal taneg onorohole uhan weregma eneherabul oho uhan welatusa.

⁷It unuyug holu reg eleg angge pikit wereg lit yaha aben ket umatukmu umbagpag turuk hag toho umbagpag turuk latusa. It unuyug ahap arimano wam sapi uyug ahap hag latusa.

⁸It eneherabul uhan apma ap ininggik hag angge wal taneg welatusa. Eneherabul wirili feruk lit onoluk wereg angge arimano eke aherabulen eke aherabul fam ahandip atuk latusa. It itano wal taneg enebe hebel am fug angge onorohole fil pikit laruk latusa.

¹⁰It uhan itano enebe wal taneg eneluke fil ap orohole hahon, ininggik pikit fil mene singa orohole hahon, ininggik hare fil wam sapi orohole hahon, enembol fil suwe kut orohole hahon welatusa.

¹¹Eneherabul piren-piren pali fil wirili feruk lit eneherabul atohen onoluk wereg angge iniraham werehon itano eneherabul fam ahandip atuk latusa. It wal taneg eneherabul piren winonen enebe hililip teg latusa.

¹²It enebe uhan wal taneg onorohole uhan weregma lul peruk ambeg laruk lit enebe hebel am fug angge onorohole fil pikit la reg latusa.

¹³Onoluk wereg angge itano sehelimu indok anggen ano iral ano umbagpag turukon hahon ulog turuk latisi. Indok ino umbagpag turuk lit lebeglu lebeg turuk latisi.

¹⁴Onoluk wereg angge uhan itano lebeglu turuk hag toho folo-folo la wam turuk latusa.

¹⁵Anden yet harukmen onoluk wereg angge itano enebe uhan wal taneg iniraham roda singgonggo hag toho imbiloho laruk angge misig-misig welatusa.

¹⁶Imbiloho laruk angge uhan itano ambi reg lit helep ili rurukon hag toho ili ruruk latusa. Ari turuk lit imbiloho laruk angge uhan itano wal taneg imbiloho laruk angge nin amuwon eke men lombog atuk latusa.

¹⁷Imbiloho laruk angge uhan itano laruk lit aluke fil, ambol fil, inggik pikit fil, hare fil hebel am fug angge pikit toho la reg latusa.

¹⁸Imbiloho laruk angge itano enebene walinggoho inilanggen anggolowen keleg teg latisi.

¹⁹Imbiloho laruk angge itano enemu la fug angge onoluk wereg angge uhanen peruk ane hikit toho turuk lit iren lul peruk ambeg larukmu it oho ambiyeg eneg laruk latusa. Ari roho turuk lit onoluk wereg angge itano fililoho larukmu oho kel tarukmu oho imbiloho laruk angge itanowen ari hag toho eneg turuk latusa.

²²Onoluk wereg angge itano ununggulmu heniye ine angge fam wirihon hag angge tuwaleg latisi. Heniye hag angge ino helep mondabi yanggowon hag toho umbagpag turuk latisi.

²³Heniye hag angge ino apma onoluk wereg angge itanowen eneherabul pog toho iniraham werehon fil wirili feruk lit it wal taneg eneherabul pirenen enebe hililip teg latusa.

²⁴It itano larukmu eneherabul aplohok ik suwon ele tung turukon ano, ap sehen senehon luhaleg lit enebe obog tohowen enele urukon ano hag toho urukmu holtikik. Eneherabul aplohok ino Allah mondabi ineyon ele hi roho uruk hag toho uruk latisi. Onoluk wereg angge itano kel tarukmu eneherabul yinggil atuk latisi.

²⁵Heniye hag angge ununggulmu tuwalehon ino pali filen oho aplohok turukmu holtikik.

²⁶Heniye hag angge ino palimu ap suwon hur atukon hag angge helep piyanu palehon hahon fam wirihon unduhuk latisi. Hur atukon hag angge ino fam ap kinangmon hahon misig heriyeg latisi.

²⁷At heriyeg latisiyon ino alunggu pali fil ine angge indok ambulpul elma wereg lit mondabi umbagpag turukon hag toho umbagpag turukmu alunggu apma fil indok ambulpul hag toho umbagpag turuk latisi. Osit nalug hibi atukmu kaliye ahikal hina sehelimu mase reg hag toho At heriyeg latisiyon ino walinggoho mondabi seleg toho umbagpag turuk latisi. Ari roho umbagpag turuk lit NINIKNI Allah suwon umbagpag turukon ino ahuhe inam atukmu yet harikik. Yet harikikteg an norohole han kinangma sahung atuk lit Ap ekeyen an nubam ele urukon holtikik.