Read Angguruk Yali YEHEZKIEL 10 Bible Online

YEHEZKIEL 10 - Angguruk Yali bible

YEHEZKIEL 10

¹Hiyag itisimu anden yet harukmen malaikat itano palimu heniye hag angge emberimu ap suwon hur atukon hag angge helep piyanu palehon hahon fam wirihon unduhuk latisi.

²Hur atukon hag angge ino fam heriyeg latisi ahun inowen ap sum sulumon wan tehon ubam ele uruk lit, ”Roda singgonggo hag toho imbiloho laruk angge malaikat enepma werehon arima fima-fima weregma lamihinteg indok anggen fil turukon hinggik indanggenma ololop toho wamihin. Wamihinteg wilip atug o pumbuk aru fam hik isa lamihin,” ulug hiyag itisi ane hikit toho roda itano fima-fima weregma pulmu kurukmu yet harikik.

³Ap ino malaikat itano Allah ibam pikit fil weregma larukmu Allah ibam owahalma elehet huk toho kilabeg ambeg obog toho hinan hondo reg latisi.

⁴Ari regma Israel inap NINIKNI Allah umbagpag turukon seleg ino malaikat hag angge emberimu welatisi ambehen lahalug Allah ibam sok kembilikmu in arik larisi. In arik larisimu Allah ibam hinan keleg teg latisimu owahalma Allah umbagpag turukon seleg inowen seleg teg eneg latisi.

⁵Malaikat eneherabul aplohok ino Allah mondabi ineyon ele hi roho uruk hag toho urukmu Allah ibam elehet selmon walinggoho oho ambehen oho holeg latusa.

⁶Holeg lit weregma ap sum sulumon wan tehon inowen Allahn hiyag itisi ane hikit toho malaikat itano fima-fima weregma pulmu kirisimu

⁷malaikat misihen inggik pog tirisireg indok yaltuk ambeg malaikat itano honggolegma werehon famen indok anggen oko walug ap sum sulumon wan tehon inggikmu emberisi. Emberisimu ap ino Allah ibam owahalman wilip atisi.

⁸Wilip atisimu anden yet harukmen malaikat eneherabul apma ap ininggik hag angge wal taneg wilibig latusa.

⁹Wilibigmu malaikat enebe uhan itano wal taneg iniraham roda imbiloho laruk angge misig-misig welatusa. Imbiloho laruk angge uhan itano ambi reg lit helep ili rurukon hag toho ili ruruk latusa. Ari turuk lit imbiloho laruk angge uhan itano wal taneg imbiloho laruk angge nin amuwon eke men lombog atuk latusa.

¹¹Imbiloho laruk angge uhan itano laruk lit aluke fil, ambol fil, inggik pikit fil, hare fil hebel am fug angge pikit toho la reg latusa.

¹²Imbiloho laruk angge itano enebene walinggoho inilanggen anggolowen keleg teg latisi hag toho malaikat uhan enebe men enembol men ininggik men eneherabul men fene inilanggenen eneg keleg latisi.

¹³Keleg tegma yet harikikteg anden hol harukmen imbiloho laruk angge itano ununuk ”Folo-folo Larukon” suwal eneptukmu holtikik.

¹⁴Malaikat uhan itano enebe wal taneg onorohole uhan teg lit tamon malaikat orohole, pirenehon ap orohole hahon, hinahanehon mene singa orohole hahon, uhanehon suwe kut orohole hahon welatusa.

¹⁵Weregma malaikat indam ik Kebar ayegma yet isarikikon itano pohol fil lahul ulug turuk latusa.

¹⁶Malaikat itano lul peruk ambeg larukmu imbiloho laruk angge itano enemu la fug angge malaikat itanowen peruk ane hikit toho turuk lit iren lul peruk ambeg larukmu ir oho ambiyeg eneg laruk latusa. Ari roho turuk lit malaikat itano fililoho larukmu oho kel tarukmu oho imbiloho laruk angge itanowen ari hag toho eneg turuk latusa.

¹⁸Weregma NINIKNI Allah umbagpag turukon seleg ino Allah ibam sok kembilikmu embeselug malaikat itano enemberimu laharisi.

¹⁹Laharisimu malaikat itanowen eneherabul leho lit pohol fil lahalug NINIKNI Allah ibam embeselug lul ulug elehet walinggoho ohowon sok yali filon iraham larukmu yet isarikik. Larukmu imbiloho laruk angge uhan itano it men ambiyeg larusa. Ambiyeg larukmu Israel ninap Ninikni Allah umbagpag turukon seleg ino malaikat itano enemberimu wereg lit Allah ibam embeselug larisi.

²⁰Larukmu yet isarikikteg an nindi anggar atuk lit malaikat Allah hondoholug larukon uhan aruman indam ik Kebar ayegman Israel ninap Ninikni Allah ha roho walug larukmu yet isarikikon wereg ulug noluk atisi.

²¹It enebe uhan wal taneg onorohole uhan men eneherabul uhan men weregma eneherabul apma ap ininggik hag angge wilibig latusa.

²²Malaikat itano lul peruk ambeg laruk lit enebe hebel am fug angge onorohole fil eneg pikit la reg latusa. It onorohole anden indam ik Kebar ayegma yet isarikik.