Read Angguruk Yali YEHEZKIEL 11 Bible Online

YEHEZKIEL 11 - Angguruk Yali bible

YEHEZKIEL 11

¹Welatikikmu Allah ahime inowen an kinangman ha naplug NINIKNI Allah ibam sok yali filon iraham numbahik larisi. Larisimu anden yet harukmen sok ino selma ap hinahaneg fimahen luhaloho weregma Yerusalem inap onowesi hun Azur amloho Yaazanya men hun Benaya amloho Pelaca men it sehelimu weregma yet isarikik.

²Yet isarikikmu Allahn an nubam ele uruk lit, ”Hat ap kinangmon welahenon, ap aruma inindimuwen onolok ane wenggeltuk lit o Yerusalem aruwen siyag ane su amag ulug komo eneptukon wereg.

³Iren enele uruk lit, ’O Yerusalem aru seni ahabiyele hag toho weregma nit wam unu hag toho welahe. Ari fahet nenembong se roho wereg lit ninibam ap seliyonen halog turuson arimano nin hebeloho wit tahuk,” uruk.

⁴Ari uruken hat ap kinangmon welahenonen An nunuk fam alem siyahon hunubam aruhu ulug hiyag isamihin,” ulug hiyag nitisi.

⁵Hiyag nitisimu NINIKNI Allah ahime An nubam pilabik waharukmu itano NINIKNI Allahn ele uruk lit, ”Israel inap hiyag isamihinon tu: NINIKNI Allahn ele urukon holeg lamok! Hiren henele uruk lahep ane men hinindimuwen wenggel haruk lahep ane men An noluk.

⁶Hiren ap anggolo alem unubam elegman unusuruk latikip. Unusuruk latikibon o pumbuk aru fam lin-lan uruken kalem obog toho ap warehen keleg atisi.

⁷Ari fahet An HINIKNI suwon Allahn nele uruk lahiyon tu: O Yerusalem aru seni ahabiyele weregma it hiren unusuruk latikibon arimano wam unu hag toho wereg. Ari fahet Anden hit hininggik lisoho selma hondog heneplug lahukteg

⁸hunusuhuk. Karog fahet henekol toho welahepma Anden karog fam hunusuhubon mon enebik waruhuk ulug An HINIKNI suwon Allah welahiyonen nele uruk lahi.

⁹Anden hit o pumbuk aruwen hondog heneplug wilip aruhukteg ap o winamon ininggikmu hunumbahakuk. Ari roho turuk lit alem hunubam werehon haloho umbuhuk.

¹⁰Alem ari hunubam werehen Anden hit henengginang hili-hilimu hondog heneplug lahukteg ap seliyonen hunusuhuben mon enebik waruhuk. Ari roho tuhukmu yet niyahupteg NINIKNI Allah wereg ulug honoluk aruhu.

¹¹O Yerusalem aru seni ahabiyele weregma hit wam unu hag toho welamuhup fug angge famen alem hunubam werehen Anden o Israel kinang hilimuwen hunusuhuk.

¹²Anden tu men ari men turuk lamuhup ulug komo heneptik iyag ane sobir isalug tuk teg ane fahet hiyag hisarik iyahon hikit toho tuk fug angge o pumbuk winon hit walinggoho werehonen tuk teg ane fahet imbibahon hikit toho turuk lahep. Ari roho turuk lahebon fahet Anden hunusuhukmu hit hinindi anggar atuk lit NINIKNI Allah wereg ulug honoluk aruhu,” ulug hiyag nitisi.

¹³Anden Allahn hiyag nitisi ane hikit toho ap hiyag isarukmen hun Benaya amloho Pelaca war atisi. War atisimu yet harikikteg an nelenggen fam hur atug nele hi roho uruk lit, ”NIKNI suwon Allah welahenon, Israel inap we tor angge werehon aruma mondabi elehap tuhuk peruk lahen ano?” irikik.

¹⁴Ari irikikmu NINIKNI Allahn an nubam ele uruk lit,

¹⁵”Hat ap kinangmon welahenon, o Yerusalem pok atuson arimanowen hat hori Israel hinap o Babilonia kinang fam welahebon hunubahet enele uruk lit, ’It arimano NINIKNI Allah yatma wereg ambeg werehen kinang aru obog toho nit ngi atukuk,’ uruk.

¹⁶Ari uruken haren hiyag isaruk lit, ’NINIKNI suwon Allahn ele urukon tu holeg lamek: Anden it arimano ininggik lisoho yatma hondog eneplug o kema-kema hik-hak isarikikmu ap o pumbuk winamon sehelimu wereg angge famen An it iniraham welahi.

¹⁷An HINIKNI suwon Allah welahiyonen it o wina ke kema-o kema-o werehon arimano palu enebuhukteg suhuloho hondog eneplug waharuk lit kinang Israel hebeloho ngi amuhuben og isahuk.

¹⁸Og isahuk ambeg wereg lit tu Allah hag toho wereg ulug wel eneptuk lahep angge enemben siyahon arimano obog toho elehap tuhup.

¹⁹An nele holtuk lamuhuben it inindi helep arikon hag toho werehon lisoho wili fusuhukteg ubalmangge inindi keron wenggeltuk ane og isahuk.

²⁰Og isahukmu Anden tuk teg ane fahet kong toho imbiyahon seneg lit tu men ari men turuk lamuhup ulug komo eneptik iyag ane hikit toho turuk lamuhup. Ari roho turuk lit it An numalikisi welamuhupmu An it Inikni aruhuk.

²¹Aben tu Allah hag toho wereg ulug wel eneptuk angge fahet eneg wenggel haruk lit ap inindi siyahap eneptuk ane til-wil noruk ane Anden hebeloho it unubam umbuhukmu siyag amuhup ulug An HINIKNI suwon Allah welahiyonen nele uruk lahi,’ ehek imihin,” ulug hiyag nitisi.

²²Ari ulug hiyag nitisimu malaikat itanowen eneherabul leho lit pohol fil laharusa. Laharukmu imbiloho laruk angge uhan itano it men ambiyeg laharusa. Ambiyeg laharukmu Israel ninap Ninikni Allah umbagpag turukon seleg ino malaikat itano enemberimu wereg lit

²³o Yerusalem embeselug larisireg tom o Yerusalem yali fil werehon emberimu in arik larisi.

²⁴In arik larisimu anden fulu roho yet harukmen Allah ahime inowen an kinangman ha naplug Israel inap o Babilonia kinang fam imbisik laruson enembeg suhuloho numbahik larisi. Larisimu anden fulu roho yet haruk latikik ane ari eleg atisi.

²⁵Eleg atisimu anden NINIKNI Allahn unug nutukmu yet harikik ane obog toho Israel inap o Babilonia kinangma werehon unubam hiyag isarikik.