Read Angguruk Yali YEHEZKIEL 12 Bible Online

YEHEZKIEL 12 - Angguruk Yali bible

YEHEZKIEL 12

¹NINIKNI Allahn an nubam ele uruk lit,

²”Ap kinangmon welahenon, hat ap An nele ying naptukon enesehelimu welahen. Inil wereg angge famen fum toho haruk eleg, inisanggo wereg angge famen fuki roho holtuk eleg.

³Ari fahet hat ap kinangmon welahenon, ap ininggik hele waroho imbisik lul ulug turukmu eneseher angge enesum fam yunggat taruk hag toho haren oho o unukoho hat haseher angge sum fam fani rimihinteg mo uwan ubuk uk fugmu hori iniline elehet o pumbuk walinggoho ohowon halog timihinteg hat hasum hilalug halog teg keyen wilip atmihin. Wilip atmihinteg ap ininggik hele waroho inibam embeselug o winama laruk hag toho haren oho o hupmu it iniline hasum humaloma ha roho walug o winama lamihin. Laruk lit kinang embeselug laruk lahiyon yet hamin fug ulug horohole saloho lamihin. Anden hiyag hutuk lahiyon hikit toho enehane aru timihin halug hori Israel inap An nele ying naptukon arimanowen yet hiyaruk lit inindi anggar atmisi ano,” ulug hiyag nitisi.

⁷Allahn an hiyag nitisi ane hikit toho turuk lit ap ininggik hele waroho imbisik lul ulug turukmu eneseher angge sum fam yunggat taruk hag toho anden o unukoho naseher angge sum fam fani roho emberikik. Emberikikteg mo uwan ubuk uk fugmu an ninggiken elehet o pumbuk walinggoho ohowon halog tirikikteg o hup atisimu an nasum walug halog tirikik keyen wilip atikik. Wilip atikikteg lamin ulug it iniline nasum numaloma ha rarikik.

⁸Ha rarikikmu likiyamon NINIKNI Allahn an nubam ele uruk lit,

⁹”Hat ap kinangmon welahenon, Israel inap An nele ying naptukon arimanowen hat hubam, ’Haren nanggintuk lahen?’ ulug kapal hiyarusa ano?

¹⁰Kapal hiyarusa halug haren hiyag isaruk lit, ’Anden tirikikon ari NINIKNI suwon Allahn an nubam ele irisiyon hikit toho tirikik. Aren ap suwon men umalikisi Israel inap o Yerusalem werehon obog toho men unubam teko lahu ane fahet hiyag nitisi.

¹¹Hiyag nitisi ane hikit toho tirikikon ari anden hit fahet enehangge tirikik. Enehangge tirikikon ari hag toho Yerusalem inap unubam teko lahu: It ininggik hele waroho o winama imbisik lahup,’ imihin.

¹²Israel inap onowe suwon inowen o hubanggo asum umaloma ha roho ibam embeselug wilip aruhu. Otsiyen elehet o pumbuk walinggoho ohowon halog tuhupteg enesum hilalug halog teg keyen wilip amuhup. Ambiyeg wilip amuhupteg ap suwon inowen kinang embeselug laruk lahiyon yet hamin fug ulug orohole saloho lahu.

¹³Larukmen Anden yebangge rebelug ap suwon ino seneruhukteg o Babilonia kinangma imbisik lahuk. Imbisik lahuk ambeg il siyahen yet ha fug teg lit weregman war aruhu.

¹⁴Otsi at let turukon men sehen senehon men Anden unusimin ulug nantog sap teg lit yanggaloho pilili-palala isahuk.

¹⁵O ekema-ekema pilili-palala isahukmu it inindi anggar atuk lit NINIKNI Allah wereg ulug onoluk aruhu.

¹⁶It onoluk welamuhubon arimano Anden ili og enebuhukmu tohen ano ouk alem angginonen ano suburu oboken ano war amuhup fug. We tor angge welamuhubon arimano o kema-kema ap o pumbuk winamon sehelimu wereg lit nininggarehen amben siyahon turuk latukukon fahet alem ari nunubamap taruk latukuk ulug ap winon hiyag isaruk lamuhup. Hiyag isaruk lamuhupmu NINIKNI Allah wereg ulug onoluk aruhu,” irisi.

¹⁷Ari irisireg NINIKNI Allahn an nubam nin ele uruk lit,

¹⁸”Hat ap kinangmon welahenon, hat hindi angginen huwag elek turukmu suburu namihin.

¹⁹Naruk lit hat hori ininggik lisoho o Babilonia kinang fam hondog eneplug waharuson unubam An HINIKNI suwon Allah inowen nele iminon tu hiyag isamihin: Honori o Babilonia inaben kinang tu fam hondog eneplug wam fug angge o Yerusalem welamuhup ulug embeseruson arimano enemelmel toho werehen unuwag elek-elek angge ruruk lit suburu naruk lamuhup. It enengginang onolok aneyen hondo reg lit werehen mondabi siyag aruhu.

²⁰O pumbuk ketiya ap anggolo wereg ambeg arimano halog toho lin uhupmu kinang obog toho lekma hag aruhu. Ari teko lahumu hinindi anggar atuk lit NINIKNI Allah wereg ulug honoluk aruhu ehek imihin,” ulug hiyag nitisi.

²¹Hiyag nitisireg NINIKNI Allahn nin ele uruk lit,

²²”Hat ap kinangmon welahenon, Israel inaben enele uruk lit, ’Aben fulu roho hiyag nisaruk ane hikir aruhu ulug amusun toho nangno ruruk latukuk angge famen teko larisi fug,’ urukon ari alem nungge fahet uruk?

²³Ari uruken haren an HINIKNI suwon Allah nele iminon tu hiyag isaruk lit, ’Israel inaben enele uruk ane ari Anden elehap tuhuk. An nunuk fam fulu roho hiyag isaruk ane obog toho hikir aruhu li horog teg.

²⁴Enele si ane uruk lit teko lahu ane fahet fulu roho yet harukuk ulug ap inindi kahal eneptukon Israel inap sehelimu welamuhup fug.

²⁵An HINIKNI Allahn teko lahu ane fahet nele tem toho uruk lahiyon amusun tuk fug angge hikirap tuhuk. Hit An nele ying naptuk lahebon uwan war am fugmu Anden nele uruk lahiyon hikit toho tuhuk. An HINIKNI suwon Allahn nele ari uruk lahi,’ ehek imihin,” ulug hiyag nitisi.

²⁶Ari ulug hiyag nitisireg NINIKNI Allahn nin ele uruk lit,

²⁷”Hat ap kinangmon welahenon, Israel inaben hat hubahet enele uruk lit, ’Ap ariyen fulu roho hiyag nisaruk ane folo-folo hikir aruhu fug. Amusun toho welamuhupmu eneg teko lahu,’ ulug habug uruk.

²⁸Habug uruken haren it unubam hele uruk lit, ’NINIKNI suwon Allah inowen ele iminon tu holeg lamek: Anden teko lahu ane fahet nele uruk latikikon obog toho amusun tuk fug angge hikir aruhu. Anden nele uruk lahiyon obog toho teko lahu. An HINIKNI suwon Allah inowen nele ari uruk lahi,’ ehek imihin,” ulug hiyag nitisi.