Read Angguruk Yali YEHEZKIEL 13 Bible Online

YEHEZKIEL 13 - Angguruk Yali bible

YEHEZKIEL 13

¹NINIKNI Allahn an nubam ele uruk lit,

²”Hat ap kinangmon welahenon, Israel inap sehelimuwonen, ’NINIKNI Allah ele holiyok!’ ulug ap hiyag isil laruk. Iren enele si ane uruk lit nit Allah ele hiyag hisaruk ninap nabi welahe ulug it inindimuwen wenggeltuk ane hiyag isaruk. Ari ulug hiyag isaruken haren alem angginon hunubam aruhu ulug hiyag isamihin.

³An HINIKNI suwon Allah inowen nele uruk lahiyon tu: Ap inindi sohuwonen enele si ane uruk lit nit Allah wene hiyag hisaruk ninap nabi welahe ulug nungge-nungge fulu roho yet ha fug angge inindimuwen wenggel haruk ane hiyag isarukon arimano siyag amuhup.

⁴Hit honori nit Allah amingmingangge nabi welahe urukon arimano olomene o pumbuk halog toho lin urukon sehelimu larukon hag toho wereg.

⁵An HINIKNI Allahn alem haloho umbuhuk sambil Israel inap arimano siyag amuhup tohon it elehet walinggohon hag toho welalep angge famen ap seliyon elehet halog teg keyen kuhup ulug abituk eleg.

⁶Iren alem eleg ane fulu roho yet halug enele si ane ap hiyag isaruk. An HINIKNI Allahn ap hiyag isa lalihip ulug mon enebuk fugmen iren te, ’NINIKNI Allahn ele urukon hiyag hisaruk lahe,’ uruk. Niren uruk laheyon ari Allahn hikirap tuhu peruk.

⁸Ari fahet An HINIKNI suwon Allah inowen nele uruk lahiyon tu: Hiren alem eleg ane yet halug ap henele si ane hiyag isaruk lahebon fahet Anden alem angginon hunubam umbuhuk.

⁹An ninggik leho lit hit henele si ane uruk lahep hinap An numalikisi Israel inaben enele sahaltuk ambehen yanggal henebuhuk. Yanggal heneptuk lit hit hununuk suwesingga Israel inap ununggul unuk haharoho imbibahon famen elehap henebuhuk. Elehap henebuhukmu hit o Israel kinang fam suhuloho lahup fug. Ari roho hunubam tuhukmu hit hinindi anggar atuk lit NINIKNI suwon Allah ino wereg ulug honoluk aruhu.

¹⁰An numalikisi Israel inap siyag amuk oho angge fahet hiren hinindi yuwag toho welamok ulug inindi hareya feseruk lahep. Iren elehet siyag toho warukmu hiren aben fano pukag ulug mur ka lahaptuk lahep.

¹¹Mur ka lahaboho weregman siyelu fu ririkim osit soho anggen hahon pilabik waharukmu ik fu waharuk lit elehet ino halog toho wambuhu. Wambuhu halug aben hit hunubam, ’Mur ka fanowon lahaptikibon ino kema wereg?’ ulug hit hininggaliyap henebuhup.

¹³Ari fahet An HINIKNI suwon Allah inowen nele uruk lahiyon tu: Elehet ari siyag amag ulug An nundama ahe laharukmu nindimu nolok haruk lit siyelu men osit humon soho anggen hahon men monde fik waruhuk.

¹⁴Monde fik waharuk lit elehet hiren mur ka lahaptikibon halog toho lin isahukmu helep ubule kinangma yahowon inam aruhu. Elehet ino halog toho wamburuk lit hir oho himbisoho hunusuhu. Anden ari tuhukmu yet niyahupteg NINIKNI Allah wereg ulug honoluk aruhu.

¹⁵Anden elehet ariyet mur ka lahaptuk lahep hinabet siyahap henebuhukmu An nolok haruk lahi ane eleg aruhu. Eleg aruhumu Anden, ’Eleheret mur ka lahaptukonet mangno roho eleg atusa,’ uhuk.

¹⁶Hit nabi welahe uruk lahebonen henele si ane uruk lit o Yerusalem inap siyag amuk oho angge fahet hiren hinindi yuwag toho welamok ulug hiyag isaruk lahebon arimano obog toho eleg amuhup. An HINIKNI Allahn nele ari uruk lahi,” irisi.

¹⁷NINIKNI Allahn an nubam ele uruk lit, ”Hat ap kinangmon welahenon, Israel hiyap sehelimuwonen enele si ane uruk lit nit Allah ele hiyag hisaruk hiyap nabi welahe ulug it inindimuwen wenggeltuk ane ap hiyag isaruk. Ari ulug hiyag isaruken haren alem angginon hunubam aruhu ulug hiyag isamihin.

¹⁸Hiyag isaruk lit, ’NINIKNI suwon Allah inowen ele urukon tu: Hiren ap pamongge fam unusul perukon fahet sohomangge men ununggul asum men uruk lahep hiyap siyag amuhup. An numalikisi Israel inap onoluk welamuhup ane men war atuk lamuhup ane men nininggikmu wereg peruk lahep anggeyen hit hininggareg fahet nonoluk welamuhuk peruk lahep ano?

¹⁹Hiren te aben roti anggen we tor angge og nisawag ulug ap alem unubam elehon unusuruk lit alem unubam werehon ili og eneptuk lahep. Ari roho turuk lit An numalikisi sehelimuwen An nunuk siyahap turuk lahep. Hiren An numalikisi henele si ane hiyag isaruk lahepma tem toho ehesa ulug henele holtukmen siyag atuk.

²⁰Ari fahet An HINIKNI suwon Allah inowen nele uruk lahiyon tu: Sohomangge ap pamongge unusuruk angge arimano Anden hit hininggikmuwen lisoho waruk lit hununggul asum oho tararag tuhukteg An numalikisi enehime hiren sen eneptuk lahebon hit hininggikmuwen taluk enebuhuk. Ari roho tuhukmu yet niyahupteg hit hinindi anggar atuk lit NINIKNI Allah wereg ulug honoluk aruhu.

²²Ap fano ane turukon An nolohotma inindi anggin eleg toho welamuhup peruk lahiyon arimano hiren henele si ane unubam uruk lit inindi angginap eneptuk lahep. Ap onolok ane turukon arimano fano welamuhup ulug komo enebuk angge famen onolok ane eneg turuk lamuhup ulug inineyap eneptuk lahep.

²³Ari fahet hiren alem eleg ane fulu roho yet halug ap henele si ane hiyag isaruk lahebon ari eleg aruhu. An numalikisi hit hininggikmuwen windat enebuhukmu hit hinindi anggar atuk lit NINIKNI Allah wereg ulug honoluk aruhu ehek,’ imihin,” ulug hiyag nitisi.