Read Angguruk Yali YEHEZKIEL 14 Bible Online

YEHEZKIEL 14 - Angguruk Yali bible

YEHEZKIEL 14

¹Welatikikmu Israel inap onowesi an nambeg waharusareg nalukema heriyeg lit weregman

²NINIKNI Allahn an nubam ele uruk lit,

³”Hat ap kinangmon welahenon, ap aruma inindimuwen nunumbasi ulug wel eneptuk angge fahet eneg wenggel haruk lit yebangge rarukon arimano fahet enehiyeg haruk. Ari roho turuk inap aruman nungge fahet An kapal niya wahasa?

⁴Haren it hiyag isaruk lit, ’NINIKNI suwon Allah inowen ele urukon tu holiyek: Israel inap sehelimuwon eke indimuwen numbasi ulug wel eneptuk angge fahet eneg wenggel haruk lit yebangge rarukon arimano fahet ahiyeg harukon inowen Allahn ele hiyag nitmisi ulug An namingmingangge nabi wereg ambeg waharuk halug An HINIKNI Allah ninggarehen usangge anggolo foroho ahun aru nungge fahet kapal niya waha ulug nele olok toho hiyag utuk laruhuk.

⁵Hiyag utuk laruhukon ariyen Israel inap usangge forohowon arimano obog toho An nambeg suhuloho wamuhup ulug inindi og enebuhuk ehek,’ imihin.

⁶Ari imihinteg Israel inap unubam hele uruk lit, ’NINIKNI suwon Allahn ele urukon tu holiyek: Usangge hiren wel eneptuk lahebon arimano men amben siyahon turuk lahebon men umbusuhup.

⁷Israel inap ekeyen ano ap pohonen ano An numbahalug indimuwen numbasi ulug wel eneptuk angge fahet eneg wenggel haruk lit yebangge rarukon arimano fahet ahiyeg harukon inowen Allahn ele hiyag nitmisi ulug An namingmingangge nabi wereg ambeg waharuk halug An HINIKNI Allah ninggarehen usangge anggolo foroho ahun aru nungge fahet kapal niya waha ulug nele olok toho hiyag utuk laruhuk.

⁸An ninggarehen at aru An numalikisi enesehelimuwen elehap tuhuk. Elehap turukmu aben yet niyahupteg nit fahet enehangge tehek ulug enele uruk lit, ’Allahn ap ari hahon unubam ari hag toho tuhu,’ uruk lamuhup. Anden ari roho tuhukmu hit hinindi anggar atuk lit NINIKNI Allah wereg ulug honoluk aruhu.

⁹Ap usangge forohowon eke nabi ambeg waruhumu Anden nabi ino indi sohuwap tubusuhukmu aren un ane ap ino hiyag uruhu halug Anden nabi ari An numalikisi Israel inap enesehelimuwen elehap tuhuk.

¹⁰Ari roho ap usangge forohowonet nabiyet alem unubam werehen siyag amuhup.

¹¹Siyag atukmu Israel inap arimanowen yet isahupteg inindi anggar aruhu ano. Inindi anggar aruhu halug An numbahalug tuk fug ane turukon ariyen siyag angge unubam tag atukon eleg aruhu. Eleg aruhu halug it An numalikisi amuhupmu An it Inikni aruhuk ulug An HINIKNI suwon Allah inowen nele uruk lahi ehek,’ imihin,” ulug hiyag nitisi.

¹²NINIKNI Allahn an nubam ele uruk lit,

¹³”Hat ap kinangmon welahenon, ap o pumbuk ekeyen An enembol yig nutuk lit Anden siyag peruk ane turuk halug Anden abet wamet obog toho war amag ulug suburu obok monde fik waruhuk.

¹⁴Monde fik waharukmu hun Nuh, Daniel, Ayub men ap arimano enesehelimu welalep halug ap obog toho war atep angge famen it enebe hinahan Allah men ininggik ahandip toho wereg ane ariyen onoluk welalep ulug HINIKNI suwon Allah inowen nele uruk lahi.

¹⁵Anden olomene onolokon enembeg mon eneplema ap obog toho elehap eneplep. Elehap eneplepma ap misig oho olomene fahet akolen kinang ino fam lelep fug.

¹⁶Ari roho turukmu it hinahan itano ap arimano enesehelimu welalep halug iren unumalikisi windat enebuk fug angge we ininggareg eneg windat telepma kinang obog toho ap enele teng elep ulug An HINIKNI suwon Allah noluk welahiyon inowen nele uruk lahi.

¹⁷Anden ap seliyon enembeg mon eneplema abet wamet obog toho unuselep.

¹⁸Unusurukmu it hinahan itano ap arimano enesehelimu welalep halug iren unumalikisi windat enebuk fug angge we ininggareg eneg windat telep ulug An HINIKNI suwon Allah noluk welahiyon inowen nele uruk lahi.

¹⁹An nundama ahe laharukmu ouk alem suwon monde fik waharuk lit abet wamet obog toho unusele.

²⁰Unusurukmu hun Nuh, Daniel, Ayub men ap arimano enesehelimu welalep halug iren unumalikisi windat enebuk fug angge it enebe hinahan itano eneg Allah men ininggik ahandip toho wereg ane ariyen onoluk welalep ulug An HINIKNI suwon Allah noluk welahiyon inowen nele uruk lahi,” irisi.

²¹Irisireg NINIKNI suwon Allah inowen nin ele uruk lit, ”Anden ihiyon hikit toho o Yerusalem inap unggum unubam werehon kong timin ulug alem angginon uhan unubam monde fuhuk. Alem monde fuhukon tog men, suburu obok men, olomene onolokon men, ouk alem suwon men feneyen abet wamet obog toho unusuhuk.

²²Unusuruk lit ap we tor angge ili og enebuhukmu unumalikisi ap angge hiyap angge men o Yerusalemen hondog eneplug wilip amuhupteg henembeg wamuhup. Wamuhupmu hiren yet isarukmen unubabut siyag toho weregma yet isahupteg hit hinindi anggar atuk lit ap unubabut ari hahon unubahet Ninikni Allahn olok haruk lit inibam Yerusalem fam alem angginon eke hag eke hag emberisi ulug honoluk aruhumu o Yerusalem siyag atukon fahet hinindi anggin toho wenggel haruk lamuhup ane eleg aruhu.

²³O Yerusalem inap henembeg wamuhubon unubabut siyahon yet isahupteg Ninikni Allahn alem werehen inibam siyahap tirisi ulug honoluk teg lamuhup. An HINIKNI suwon Allah inowen nele ari uruk lahi,” irisi.