Read Angguruk Yali YEHEZKIEL 16 Bible Online

YEHEZKIEL 16 - Angguruk Yali bible

YEHEZKIEL 16

²”Hat ap kinangmon welahenon, haren o pumbuk Yerusalem inap unubam amben siyahon turuk lahep ulug seleg toho hiyag isamihin,” ulug hiyag nitisireg,

³”It unubam hele uruk lit, ’NINIKNI suwon Allahn o Yerusalem fahet ele urukon tu: Hat hikni o Amori ahunen hisinga o Heti hiyap hilibareg hat o Kanaan kinang famen indag hapfag.

⁴Indag hapfag sambil hat hanum palfag fug, hahap ik umag hapfag fug, saho fam oho umag hapfag fug, sum fam yinggil hapfag fug.

⁵Ap misihen oho nindiyen-e ulug indi hiyaruk lit hal habuk fug angge nirim ulug anggenma hik hiyarik ibag. Hat indag atik inag sambil ari hag toho hat hubam turuk latfag.

⁶Ari roho turukmu An hat welatik inag keyen laruk lit yet hiyarukmen hat hebe meben keleg teg lit libik-lebe rurukmu yet hiyarik iyag. Yet hiyarik iyareg hat holuk wereg lit

⁷e owil yat toho laharukon hag toho su aruhun ulug hiyag hitik iyag. Hiyag hitik iyag ane hikit toho hat hebe su atuk lit tuhum anggolo atik inagma hag wilip atukmu hamenderuk fano wilibig latfag angge famen habiye welatik inag.

⁸Habiye weregma An hiraham laruk lit yet hiyarukmen aben hat og haptukon horog atfagma yet hiyarik iyareg Anden hat og hasug latmin ulug nasum atog wiriloho hebe hondo hasug lit hahap mapmu haptik iyag. Mapmu haptik iyareg Anden hat we tem toho og hasug lahi ulug sali hubam imbiyagma Anden tohon atik inag ulug An HIKNI suwon Allah inowen nele uruk lahi.

⁹Anden tohon atik inagma Anden hat hahap ik umag haptuk lit hamep elehap tiyareg hat hahap e ahaluwe amben fanowon fam are haptik iyag.

¹⁰Are haptik iyareg sum hundamon fanowon hesenggengge palehon men huyug hililip angge inag ahap hag angge fam wirihon men sum hunggulmu hililip toho wan turukon il sakowon hik toho yihikon men sum hebemon ele tot yendehon men wan haptik iyag.

¹¹Wan haptik iyareg haliliyangge lahap haptuk lit sehene hinggikmu kila felug ilembani hanggolopma pug tebelug

¹²hambiyangmangge men hisanggomangge men hunggulmu lahaptuk angge ili rurukon men lahabe fiyag.

¹³Lahabe fiyagma haren haliliyangge ili ruruk angge emas perak fam wirihon men sum il sakowon hik toho yihikon men ele tot yendehon men hesenggengge palehon men wan taruk lit roti anggen fano roho lilibug tehon men kin altap men e zaitun ahaluwe men narukmen eneg tuhum anggolo atuk lit hiyap suwon lahinag.

¹⁴Lahinagma haliliyangge Anden hat hubam lahaptik iyahon ariyen hat hebe tuhum fano anggolo atuken ap o pumbuk kema-kema werehonen hat hunuk suwap til laruk latfag ulug An HIKNI suwon Allah inowen nele uruk lahi ehek,’ imihin,” ulug hiyag nitisi.

¹⁵NINIKNI Allahn o pumbuk Yerusalem fahet nin ele uruk lit, ”Haren tuhum anggolo welahi ulug hawelwel tubat taruk lit An hapeleg atisimu an nunuk su atisi ulug winik-wonog angge ruruk lit ap kalemma larukon obog toho men yaying til noruk latikin.

¹⁶Yaying turuk ane ari hahon indam oho hiyaben turuk latfag fugmu fobik oho turuk lamuhup fug ane haren turuk lit hasum hesenggengge palehon oko walug lahabil laharuk latikin ambeg arimanowen ap sa-o sa-o men ambi atuk latikin.

¹⁷Ari roho turuk lit haliliyangge emas perak fam wirihon Anden og hitik iyahon arimano fam numbasi ulug wel eneptuk angge lale ferikinteg An numbahalug humbasi arimano men yaying turuk latikin.

¹⁸Yaying turuk lit hasum hesenggengge palehon arimano numbasi ulug wel eneptuk angge enebene wan eneplug e zaitun ahaluwe men amben fano angge men Anden og hitik iyahon arimano it onolohotma emberuk latikin.

¹⁹Emberuk lit Anden og hitik iyahon roti anggen fano roho lilibug tehon men e ahaluwe men kin altap men amben fano pukag ulug humbasi enelukema imbik laruk latikin. An HIKNI suwon Allah inowen nele aru uruk lahi.

²⁰Hat humalikisi ap angge hiyap angge men haren An nubahet indag nutuk latikinon arimano numbasi ulug wel eneptuk lahenon arimanowen nawag ulug og isaruk latikin. Haren wenggel haruk lit anden yaying turuk latikikon we tot apma regma ketiya siyag ane sebe roho timin perikinteg

²¹humalikisi yuhon waroho numbasi ulug wel eneptuk lahenon fahet indokma yal eneptuk latikin.

²²Haren yaying turuk lit amben siyahon til-wil laruk latikin li hat hindimuwen, ’An nebe totma nahap meben keleg tegma nabiye wereg lit libik-lebe rurukmu Allahn let nabik waharisi,’ ulug wenggel harikin fug.

²³Ari turuk latikinon ino fahet siyag aruhun ulug An HIKNI suwon Allah inowen nele uruk lahi. Haren alem siyahon arimano obog toho turuk latikinteg

²⁴haren yaying turuk lahen ane suwap turuk lit o ekema-ekema silimuwen oho kalem handuhal teg ambehen oho lehoma yaying turuk ambeg witil laruk latikin. Lehoma wituk latikin ambeg arimanowen haren ap kalemma larukon obog toho fahet huyug ila ruruk lit hebe tuhumon siyahap taruk latikin.

²⁵

²⁶Allah indi siyag amag ulug hat hiraham werehon o Mesir inap eneye humon arimano men oho yaying turuk latikin.

²⁷Ari roho turuk latikinon fahet Anden kinang hat og hitik iyahon minggiroho winon uwag oko hilarikik. Hilarikikteg hat fahet ninirim perukon o Filistin hiyaben hat hele ying haptuk lamuhup ulug ininggikmu humbaharikik. Filistin hiyap arimano haren hinggali eleg toho turuk lahenon fahet it ininggali haruk latusa.

²⁸Haren yaying turukmen eneg hindi yuwag atisi fugmu o Asyur inap men yaying tuhuk ulug enembeg larikin angge famen it men yaying turuk latikin ane ariyen oho hindi yuwag atisi fug.

²⁹Yuwag atisi fugmu nin sebe roho yaying turuk laruhuk ulug onggo paloho hilarukon o Babilonia inap men oho yaying turuk latikin angge famen hat hindi yuwag atisi fug.

³⁰Haren ap sa-o sa-o men ambi atla ulug hindi inahan haptuken yaying eneg til laruk latikin ulug An HIKNI suwon Allah inowen nele uruk lahi.

³¹Haren o ekema-ekema silimuwen oho kalem handuhal teg ambehen oho lehoma yaying turuk ambeg witil laruk lit hiyap yaying turukon winonen turuk hag toho tuk fug angge onggo heng enebuk fug angge ap men ambi atuk latikin.

³²Hat hahun hambol yig utuk lit ap hapelehon hindi isaruk latikin.

³³Hiyap yaying turukon winonen onggo hilaruk angge famen haren te ap o pumbuk walinggoho werehon arimano an nambeg wamag ulug onggo heg toho og isaruk latikin.

³⁴Hiyap yaying turukon winon enembeg ap waharuk lit onggo og isaruk angge famen hat hambeg ap inindiyen waharuk lit onggo og hutuk elegman haren hebeloho it onggo og isaruk lahen.

³⁵Ari fahet hat yaying turuk hiyap welahenon, An HIKNI Allahn nele iminon tu holeg lamin:

³⁶Haren ap hindi isaruk lahenon men numbasi ulug wel eneptuk lahen angge enemben siyahon arimano men onolohotman hasum nonggoloho habiye wereg lit yaying turuk latikin. Yaying turuk lit numbasi ulug wel eneptuk lahen angge arimano fahet humalikisi indokma yal eneptuk latikin.

³⁷Ari turuk latikinon fahet Anden ap hat men ambi atuk latuson haren hindi enesug lahenonet nirim peruk lahenonet obog toho wol enebuhukmu hat walinggoho palu arik wamuhupmu iren hat hinggaliyangge yet hawag ulug Anden hasum nonggoluhuk.

³⁸Nonggoluhukteg hiyap ap enehunsi pal tarukon men ap unusurukon men alem unubam werehon haltuk ane hikit toho Anden unggum hat hubam werehon kong turuk lit An numbahalug larikin ane fahet nirimen nolok toho hubam tuhuk.

³⁹Anden ap wol enebuhukon arimano ininggikmu humbahakukmu ap arimanowen haren lehoma yaying turuk latikin ambeg arimano halog tebehupteg haliliyangge wan teg lahenon hilalug hat hasum hog toho hik isahupmu habiye wereg lit kinangma yinggigmu humbahalug lahup.

⁴⁰Lahupteg ap wol enebuhupmu wamuhupteg helep fam huwatuk lit hebe karog fam pal-pal hik hiyahup.

⁴¹Hik hiyahupteg o haren tohon arimano harep pisaho fesehup. Ari roho hiyap anggolo iniline alem hubam werehon kong turuk lit siyahap habuhup. Anden peruk lahi ane hikit toho hat mondabi siyahap habuhupmu haren ap an men ambi amul ulug onggo og isaruk lit yaying turuk lahen ane eleg aruhu.

⁴²Eleg aruhu halug hat An numbahalug larikin ane fahet nindi siyahen nolok haruk lahi ane oho eleg aruhumu nindi yuwag toho welaruhuk.

⁴³Hat hebe totman Anden let haptuk latikik ane fahet wenggel ha fug angge hinggali ane turuk lit An nindi nolokap naptikin. Haren amben siyahon turuk latikinon ambiyangma nin sebe roho siyag ane turuk latikin ane ino Anden hebeloho hat hubam umbuhuk. An HIKNI suwon Allah inowen nele aru uruk lahi.

⁴⁴Hat o pumbuk Yerusalem welahenon fahet aben enele uruk lit, ’Isinga ubabut men ahaloho ubabut men ambi reg,’ ulug hinggaliyap haptuk lamuhup.

⁴⁵Hisingan ahun men umalikisi men nirim peruk latisi hag toho hat ahalohowen oho hahun humalikisi men nirim peruk lahen. Hehebisiyen enehunsi malik men ninirim peruk hag toho haren oho nirim peruk lahen. Hit hunubabut ari men hit indag henepfahon unubabut men ambi reg. Hit hinisinga o Heti hiyap weregma hit hinikni o Amori ahun welatfag.

⁴⁶Ik eleruk fil o pumbuk suwon Samaria ino hat howe weregma ik ambut fil o pumbuk suwon Sodom ino hat hot wereg.

⁴⁷It piren itanowen amben siyahon turuk latfahon hikit toho haren oho turuk lit nin sebe roho siyag ane hum toho turuk latikin.

⁴⁸Hat haholani menen hininggali ane turuk latikip hag toho hat hot o Sodom aholani menen turuk latfag fug ulug An HINIKNI suwon Allah noluk welahiyonen nele uruk lahi.

⁴⁹Hot Sodom aholani menen siyag ane turuk latfahon tu: Iren winik-wonog angge ruruk lit suburu anggolo roho narukmen eneg inindi se rehen nungge-nungge wenggel ha fug angge ap inine elehon inilaheg toho werehon let eneptuk latfag fug.

⁵⁰Let enebuk fug anggeyen nit palimu welahe ulug wel taruk lit An nolohotman amben siyahon eneg turuk latfag. Ari roho turukmu yet isarik iyareg Anden it elehap eneptik iyag.

⁵¹Howe Samaria inowen oho siyag ane tirisi angge famen aren siyag ane turuk latisiyon men haren siyag ane hum toho turuk latikinon pul ke minggiroho men wirim teg eleg. Haren siyag-siyag ane til-wil noruk latikinon ari mondabi anggin tegma hehebisi pirenen siyag ane turuk latuson we tot se reg. Ari regma hat hubabut mondabi siyag teg lahenon holohotma it piren unubabut haloho werehon hag toho wereg. Alem ari haren amben siyahon eneg turuk latikinon ari feneyen inam atisi. Haren ari roho turuk lit unggum hat hehebisi unubam werehon ino seyap eneptikin. Seyap eneptikin ane ari fahet hinggali haruk lit alem hubam werehon ino ha reg lamin!” irisi.

⁵²

⁵³Ari irisireg NINIKNI Allahn o pumbuk Yerusalem fahet nin ele uruk lit, ”O Sodom aholani men Samaria aholani men Anden hebeloho fanowap enebuhuk hag toho hat o Yerusalem welahenon oho fanowap habuhuk.

⁵⁴Fanowap habuhukmu hindi anggar atuk lit anden amben siyahon turuk latikikon ino feneyen unggum o Sodom men Samaria men unubam werehon seyap eneptikik ulug holuk aruhumu hinggali haruk laruhun.

⁵⁵Hehebisi Sodom men Samaria men eneholani tam fano welatfag hag toho nin hebeloho fano amuhup. Ari hag toho hat haholani men nin hebeloho fano amuhup.

⁵⁶Indam haren hele hemet toho hot Sodom ino fahet abug uruk latikin angge famen

⁵⁷ketiya hat hubabut siyahon ino inam atisimu hat walinggoho werehon Edom hiyap men Filistin hiyap menen hat habug uruk.

⁵⁸Ari fahet haren amben siyahon turuk lit alem hubamap tarikinon ino ha reg laruhun ulug An HIKNI Allahn nele uruk lahi.

⁵⁹An HIKNI suwon Allah inowen nin nele iminon tu: Haren an nubam turuk latikin ane hikit toho Anden oho hat hubam turuk laruhuk. Haren te Hat hanggengge welaruhuk ulug An nubam sali emberik inag angge famen hele tem toho inahon ari pisan isaruk latikin.

⁶⁰Ari roho haren tirikin angge famen Anden hat hebe totma hubam sali emberik iyahon fahet wenggel haruk lit hat mondabi fano weregman eneg welaruhun ulug sali umbuhuk.

⁶¹Sali umbuhukon hikirap turuk lit Anden hehebisi Samaria men Sodom men hat hapma haholani hag toho welamuhuben og huruhuk. Og huruhuk halug hat hindi anggar atuk lit an siyag ane anggolo turuk latikik angge famen Allahn indi niyaruk ulug hinggali haruk laruhun. Anden ari hag toho hubam turuk laruhuk ulug indam sali emberik iyag fug angge famen ketiya hat nindiyen hubam turuk laruhuk.

⁶²Ari roho turuk lit An men hat men nininggik ahandip toho welamuhuk ulug sali emberik iyahon ineyap tuhukmu hat hindi anggar atuk lit NINIKNI Allah wereg ulug holuk aruhu.

⁶³An Allahn haren siyag ane turuk latikinon obog toho elehap tuhuk halug haren alem hubamap tarikinon fahet wenggel haruk lit hinggaliyen hele eleg angge welaruhun ulug An HIKNI suwon Allah inowen nele uruk lahi,” irisi.