Read Angguruk Yali YEHEZKIEL 17 Bible Online

YEHEZKIEL 17 - Angguruk Yali bible

YEHEZKIEL 17

¹NINIKNI Allahn an nubam ele uruk lit,

²”Hat ap kinangmon welahenon, haren Israel inap unubam wirim angge fam indit toho hiyag isaruk lit,

³’An HINIKNI suwon Allah inowen nele iminon tu: Suwe kut aherabul yaron ineyon oruk halhalam tohon eke tom Libanon fam waharisireg e sahi ondomi kuluk waroho hilalug

⁴Babilonia kinang fam o pumbuk aben angge ayeg waroho hilaruk inap wereg ambeg imbik larisi.

⁵Imbik larisireg hele anggur ei o Israel kinangman heneko kinang simu ik wereg ambeg yaho ferisi.

⁶Yaho ferisimu hele anggur ino umanggen apma wamburuk lit suwe kut ino hondo rehen ebe we tor eneg laharisi angge famen asimit eneg anggolo sililim tirisi. Asimit arimano suwe kut fil hayu reg latusa.

⁷Ari regma suwe kut aherabul yaron oruk anggolo wilibihon eke welatisimu hele anggur inowen an yag nasug ambeg ik tot tehen suwe kut ariyen ik og nutuk laruhu ulug umanggen suwe kut pirenehon ino fil larukmu asimir oho at ibil hebel atisi.

⁸Hele ari fano lahalug asimit anggolo wilibig lit anggen ukag ulug kinang fanoma ik wereg ambeg yaho latisi angge famen nungge fahet ari hag toho tirisi,’ ehek imihin.

⁹Ari imihinteg Israel inap nin hiyag isaruk lit, ’NINIKNI suwon Allah inowen ele urukon tu: Hiren te hele ari fano aruhu peruk lahep ano? Suwe kut tamon ino waruhureg hele anggen paloho hik isalug umanggen kinangman hene fusuhumu inggila obog toho halo uhup. Hele ino umanggen kinang apma wambirisi fugmu ap we tor anggeyen heneko hik isa wamuhup.

¹⁰Hene fusuhupmu hele ari mondabi siyag aruhu! Kinang fanoma yaho lit weregman siyelu olokon yali filen waruhumu ilim aruhu ehek,’ imihin,” ulug hiyag nitisi.

¹¹Ari ulug hiyag nitisireg NINIKNI Allahn an nubam nin ele uruk lit,

¹²”Haren An nele ying naptuk inap unubam hiyag isamihinon tu, ’Anden nele indit toho hiyag hisihiyon fahet hinindi anggar aha fug ano? Babilonia inap onowe suwon o Yerusalem waharisireg Yerusalem hinap hinikni men honowesi men ininggik hele waroho og eneplug o Babilonia kinang fam imbisik larisi ane fahet hiyag hisihi,’ imihin.

¹³Babilonia inap onowe suwon inowen Yerusalem inap onowe hondoko imbisik laruk lahiyon ubalma ap suwon welaruhu ulug o Yerusalem inap onowesi suwonen ondohowon eke lahaptisi. Lahaptuk lit an napma welaruhunen hele tem toho imihin ulug hiyag itisimu sali emberisi. Sali emberisi ane ino hikit toho Yehuda inap arimano an napma welamuhuben inine eleg amag ulug onowesi inine rehon ininggik lisoho og eneplug larisi.

¹⁵Og eneplug larisimu ap suwon welaruhun ulug lahaptisiyon ino o Babilonia inap enepma welaruhuk ulug sali emberisiyon sobir isarisireg o Mesir inap nit ninibil atuk lit wam kuda men ap sehen senehon anggolo men mon enebik wamuhuben heng enebik lalihip ulug otsi mon eneptisi. Ari turuk lit fano aruhuk peruk ane ari hikir aruhu ano? Sali emberisi ane sobir isaruk ahun ino alem ubam aruhu fug ano?

¹⁶An HINIKNI suwon Allah noluk welahiyonen nele tem toho iminon tu: Ap suwon o Babel werehonen hat ap suwon welaruhun ulug lahaptisimu hapma welaruhuk ulug sali emberisi ane apmayap tirisi ahun ino ikni ibam o Babel inowen war aruhu.

¹⁷Ap seliyonen o Yerusalem waling enebik wamuhupteg elehet walinggoho ohowon fene pila rurukmu Mesir inap onowe suwon otsi inineyonen ili og enebik wamuhup fugmu ap seliyonen Yerusalem inap anggolo unusuruk lamuhup.

¹⁸Yerusalem inap onowe suwon inowen nele tik-tem toho ihi ulug sali emberisiyon sobir isarisi ane ari fahet fano aruhu fug.

¹⁹Ari fahet An HINIKNI suwon Allah noluk welahiyonen nele tem toho iminon tu: Aren An nolohotman sali emberisi ane ino apmayap tirisimu alem ubam umbuhuk.

²⁰Anden yebangge rebelug ap suwon ino seneruhukteg o Babilonia kinangma imbisik lahuk. Imbisik lahukteg An ambol yig nutuk latisiyon fahet unggum ubam umbuhuk.

²¹Umbuhukmu otsi sehen senehon arimano enekolen linggik-longgo urukmu unusuhup. Unusurukmu wilip amuhubon arimano o kema-kema pilili-palala isahup. Ari roho turukmu yet isahupteg NINIKNI Allahn ele tem toho irisi ulug honoluk aruhu ehek,’ imihin,” ulug hiyag nitisi.

²²NINIKNI suwon Allah inowen nin ele uruk lit, ”Anden e sahi yaron ondomi ket wilip atuk lit wiyig toho werehon kuluk waroho hilalug tom yaron o Israel kinang pulmu werehon fam yaho fuhuk. Yaho fuhukmu ine atuk lit inggik tuwalik lahureg anggen yihik fuhu. Yihik fuhumu suwe obog toho inggikmu ei wirik waharuk lamuhup.

²⁴An HINIKNI Allahn ari roho turukmu yet niyahupteg e kinang tu fam werehon obog toho inindi anggar aruhumu NINIKNI Allahn e yaron apmayap turuk lit e toron palimuwap turuk, e inggila anggolo wilibihon lilohap turuk lit e lilohon ineyap turuk ulug onoluk aruhu. An HINIKNI Allahn tuhuk ihiyon ari hikit toho tebehuk,” irisi.