Read Angguruk Yali YEHEZKIEL 18 Bible Online

YEHEZKIEL 18 - Angguruk Yali bible

YEHEZKIEL 18

¹NINIKNI Allahn an nubam ele uruk lit,

²”Nungge fahet Israel kinang famen aben enele uruk lit, ’Iniknisiyen e anggen oluk narukmu unumalikisi eneyeg altowen homhombuk turuk,’ uruk ane aru urukmen warukmen eneg welahep?

³An HINIKNI suwon Allahn nele tik-tem toho iminon tu: Hit Israel hinap misihen oho aben enele uruk ane aru uruk laruhu fug.

⁴Ap obog toho enehime Anden ngi reg lahi. Iniknisi enehime Anden ngi reg lahi, unumalikisi enehime oho Anden seneg lahi. Ap san siyag ane turuk halug at ino eneg war atuk laruhu.

⁵Ap misig ubabut fanowonen ap let eneptuk lit fano ane eneg turukon fahet wirim angge wamin:

⁶At inowen usangge Israel inaben tohon wel tuk fug angge usaman aben nunumba ulug wel eneptukon fahet wam emberukon arimano naruk eleg. At inowen ori unuhesi siyahap enebuk fug angge hiyap pikalem sap turukmu ambiyeg nohoruk eleg.

⁷Aren ap winon uyuhen hondo isa fug angge enenggengge huhulangge hilaruk eleg. Aren angge ilamna foroho laruhun ulug ap eke og utuk lit fobik hebeloho og nuruhuwen anden oho at anggengge misig foroho laruhuk ulug hilaruk angge aren fobik hebeloho og utuk. Suburu obok toho werehon suburu og isaruk lit ap enesum eleg angge werehon sum oho og isaruk.

⁸Aren ap uang og isarukon unubam, ’Hiren hebeloho og nutuk lit unon sebe roho og numuhup,’ ulug hiyag isaruk eleg. Aren olok ane tuk fug angge ap unubam alem weregma ap inowen fano roho hale feruk.

⁹Ap ino indi wirik toho wereg lit Anden numalikisi komo eneptik iyahon ino wenggel haruk lit fano ane eneg turuk. Ap ari hag toho turukon ino ubabut fano reg lit oluk eneg welaruhu,” ulug An HINIKNI suwon Allahn nele uruk lahi.

¹⁰Ap ihiyon aru amloho fahet wirim angge eke imin: Malik aruwen huhulangge hilaruk lit ap unusil laruk lit ikniyen turuk latisi fug ane at inowen olok ane anggolo turuk. At inowen usaman aben nunumba ulug wel eneptukon fahet wam emberukon arimano naruk lit ori unuhesi siyahap eneptuk.

¹²Inine elehon men enenggengge elehon men uyuhen hondo isaruk lit ap enenggengge yoholiyangge hilaruk. Aren angge ilamna foroho laruhun ulug ap eke og utuk lit fobik hebeloho og nuruhuwen anden oho at anggengge misig foroho laruhuk ulug hilaruk angge aren fobik hebeloho og utuk eleg. Aren usangge fahet il fano roho kim haruk lit amben siyahon eneg turuk.

¹³Aren ap uang og isarukon unubam, ’Hiren hebeloho og nutuk lit sebe roho og numuhup,’ ulug hiyag isaruk. Ap ari hag toho turukon ino oluk welaruhu fug. At inowen amben siyahon eneg turuken war aruhu. Inggarehen turuk ane ariyen at ino war aruhu.

¹⁴Wirim angge hinahanehon tu eke imin: Ap siyag ane anggolo turukon inowen amloho misig indag taruk halug malik inowen ikniyen turuk ane yet haruk lit indi anggat atuken ikniyen turuk ane hikit toho turuk eleg.

¹⁵At inowen usangge Israel inaben tohon wel tuk fug angge usaman aben nunumba ulug wel eneptukon fahet wam emberukon arimano naruk eleg. At inowen ori unuhesi siyahap eneptuk eleg.

¹⁶Aren ap winon uyuhen hondo isa fug angge enenggengge huhulangge hilaruk eleg. Aren angge ilamna foroho laruhun ulug ap eke og utuk lit fobik hebeloho og nuruhun ulug anden oho hat hanggengge misig foroho laruhuk ulug heng uruk eleg. Suburu obok toho werehon suburu og isaruk lit ap enesum eleg angge werehon sum oho og isaruk.

¹⁷Aren olok ane tuk fug angge ap uang og isarukon unubam, ’Hiren hebeloho og nutuk lit sebe roho og numuhup,’ ulug hiyag isaruk eleg. At inowen Anden numalikisi komo eneptik iyahon ino wenggel haruk lit fano ane eneg turuk. Ap ari hag toho turukon ino ikniyen siyag ane turukon ariyen war am fug angge oluk eneg welaruhu angge famen

¹⁸ikni amuwen aben angge ele ine roho heng taruk lit ap enenggengge huhulangge hilaruk lit ori sehelimuwen olok ane anggolo turuken ikni amu eneg war aruhu. At inggarehen siyag ane turukon fam war aruhu.

¹⁹Ari reg angge famen hiren henele uruk lit, ’Nungge fahet ikniyen siyag ane turukmu amloho ubam ikniyen alem turukon ino wereg eleg?’ uruk lahep. Anden hebeloho hiyag hisaruk lahiyon tu: Malik inowen Anden numalikisi komo eneptik iyahon wenggel haruk lit ap fano roho let eneptuk lit fano ane eneg turuken oluk eneg welaruhu.

²⁰Ap siyag ane turukon ino eneg war aruhu. Ikniyen siyag ane turukon amloho fam welaruhu fug, amlohowen siyag ane turukon ikni fam welaruhu fug. Ap unubabut fanowon arimano iren fano ane turukon fahet onggo fanowon hilaruk lamuhup. Allah eleg peruk lit siyag ane turukon arimano ininggarehen turukon fam siyag atuk lamuhup.

²¹Ap Allah eleg perukon misihen siyag ane turukon embeselug Anden numalikisi komo eneptik iyahon wenggel haruk lit ap fano roho let eneptuk lit fano ane eneg turuk laruhu halug at ino war am fug angge oluk eneg welaruhu.

²²Aren atam An Allah ambol yig nutuk ane An Allahn nambolmayap turukmu at ino fano ane turukon ariyen oluk eneg welaruhu.

²³Allah eleg peruk inap war atukon fahet An HINIKNI suwon Allahn ahiyeg haruk peruk lahep? Ari fahet Anden nahiyeg haruk lahi fug. It arimanowen siyag ane turukon embeselug onoluk welamuhubon fahet eneg nahiyeg haruk lahi.

²⁴Ap ubabut fanowon ekeyen fano ane turukon embeselug ap Allah eleg peruk inaben turuk ane hikit toho amben siyahon anggolo roho turuk halug at ino oluk welam teg ano? Aren atam fano ane turukon fahet An Allahn wenggel hahuk fugmu ap ino war aruhu. Aren an Allah ambol yig nutuk lit siyag ane turuk ane ariyen war aruhu angge famen

²⁵hiren henele uruk lit, ’NINIKNI Allahn hare ane turuk,’ uruk lahep. Ari uruk lahepma hit Israel hinap holeg lamok! Anden hare ane turuk lahi ano, hit hininggarehen hare ane turuk lahep ano?

²⁶Ap ubabut fanowon ekeyen fano ane turukon embeselug olok ane turuk laruhu halug inggarehen turuk ane ariyen war aruhu angge famen

²⁷ap Allah eleg perukon ekeyen siyag ane turukon embeselug ap fano roho let eneptuk lit fano ane eneg turuk laruhu halug at inggarehen windat taruk laruhu ane ariyen oluk welaruhu.

²⁸At inowen siyag ane turukon fahet nambiken tirikik ulug olok ane umbusuhu halug war am fug angge oluk eneg welaruhu.

²⁹Ari regman hit Israel hinaben henele uruk lit, ’NINIKNI Allahn hare ane turuk,’ uruk lahep angge famen Anden hare ane turuk lahi ano? Eleg-o nori, hit hininggarehen hare ane turuk lahep.

³⁰Ari fahet hit Israel hinap nori, An HINIKNI suwon Allahn hit henebe wal tanehen turuk lahep ane hikit toho alem wal taneg hunubam emberuk laruhuk. Hiren siyag ane turuk lahebon ariyen hit hininggarehen mondabi siyahap taruk lamuhup tohon An henembol yig nutuk lahebon embeselug heneluke yig nutuk lamuhup!

³¹Hiren An nele ying naptuk lit siyag ane turuk lahebon arimano hik isaruk lamuhup. Hunubabut men hinindi men keron amag ulug yami ruruk lamuhup! Hit Israel hinaben nungge fahet war ala peruk lahep?

³²Anden ap misig inggarehen siyahap taruk lit war atukon fahet nirim peruk lahi. Ari fahet hit honoluk welamuhuben An nalukema hebeloho waharuk lamuhup!” ulug NINIKNI suwon Allahn hiyag nitisi.