Read Angguruk Yali YEHEZKIEL 19 Bible Online

YEHEZKIEL 19 - Angguruk Yali bible

YEHEZKIEL 19

¹NINIKNI Allahn an hiyag nutuk lit, ”Israel inap onowe suwon fahet piya sini imihin!

²Imihinon tu, ’Hisinga olomene ineyon hag toho wereg lit olomene winon sehelimu welatisi. Olomene tuhumon men ambiyeg wereg lit umalikisi kul eneptuk latisi.

³Kul eneptisiyon misig kabini atuk lit pak watuk ane milal tarisireg ap oho waroho naruk latisi.

⁴Ari turuken senebul ulug ap o pumbuk anggolo waharuk lit kinang habultusa ambeg mako wambirisimu ayeg angge fam lisoho walug o Mesir kinang fam imbisik larusa.

⁵Imbisik larusama isingan numalik ari saplangge kul tarikik ulug oluk atisimu kul eneptisiyon eke mumal taruk lit ine amag ulug fano foroho latisi.

⁶Forohoman umalik ino olomene kabiniyon winon sehelimu wereg lit pak watuk ane milal tarisireg ap oho waroho naruk latisi.

⁷Waroho naruk lit inibam o pumbuk pin halog toho olunap turuk latisi. Ele hum toho urukmu ap kinang atogman atogma werehon obog tohowen hol haruk lit enekol haruk latusa.

⁸Ari roho turuken senebul ulug ap o pumbuk walinggoho werehon wol eneptusama waharuk lit yebangge yep turusa ambeg luhur atisi.

⁹Luhur atisimu anggolopma e fo rehon fam kila felug ambiyangma ayeg angge hak toho o Babilonia inap onowe suwon olohotma hondoholug larusa. Hondoholug larusama tom Israel kinangma werehon fene at ele hum toho uruk ane ari eleg amag ulug ap ininggik hele waroho kilap eneptuk ambeg kilaptusa.

¹⁰Hit hinisinga hele anggur ik ayegma yahowon asimit anggolo sililim turuk lit anggen urukon hag toho welatisi.

¹¹Inggik inine atuk lit enehangge ap suwon ininggiken seneg ahen atusa. Hele ari yat atug hina sehelimu laharuk lit asimit anggolo tuwalik larukmu ap obog tohowen fog turuk latusa.

¹²Fog turuk lit weregman hele ino ap inindimu het-pet tehonen sanog toho embeserusama siyelu humon yali filen waharukmu anggen lilog atisiyon aben tahanoho hik isarusa. Inggik ineyon ino ilim atisimu indoken narisi.

¹³Ketiya hele ari lekma ik eleg ambeg yaho lit wereg.

¹⁴Indok ino hele inggik ineyon famen wilip atuk lit asimit men anggen men han narisi. Han narisimu inggik ineyon ap suwonen enehangge senehon eleg atisi,’ imihin,” ulug hiyag nitisi. Ap suwon ino oluk weregman at fahet piya sini imihin ulug Allahn hiyag nitisi. Hiyag nitisi ane ari hikit toho war atisimu oho piya sini ari uruk lahe.