Read Angguruk Yali YEHEZKIEL 2 Bible Online

YEHEZKIEL 2 - Angguruk Yali bible

YEHEZKIEL 2

¹Ap ekeyen an nubam ele uruk lit, ”Nare, hat ap kinangmon welahenon, Anden hat hubam nele iminen in atmihin,” ulug hiyag nitisi.

²Hiyag nutukmu Allah ahime fanowon an nubam atuk lit unduhuk nubaharisi. Unduhuk nubaharisimu anden hol harukmen Ap inowen an nubam ele uruk lit,

³”Hat ap kinangmon, Israel inap An nele ying naptukon enembeg lahunen mon haptuk lahi. Unumbasi men it enebe menen indamen tulug ketiya oho An enembol yig nutuk.

⁴It ununggul haro reg lit An nele sobir isaruken An it INIKNI suwon Allah inowen hiyag isahuk ane haren hiyag isahunen mon haptuk lahi.

⁵’Nele holuhup ano, holuhup fug ano,’ ulug wenggel haruk laruhun fug. It An nele holtuk eleg inap arimanowen, ’Allah wene hiyag nisarukon nabi misig nit sehelimu wereg,’ ulug onoluk aruhuwen fag toho hiyag isaruk laruhun.

⁶Hat ap kinangmon welahenon, it An nele ying naptuk inap arimanowen enele urukon men enebe men fahet hakol toho welaruhun fug. Iren hat hindi siyahap haptukmu kirimbul onolokon sehelimu wereg hag toho welaruhun angge famen hakol haruk laruhun fug.

⁷’Nele holuhup ano, holuhup fug ano,’ ulug wenggel ha fug angge An nele hiyag isaruk laruhun. It arimanowen Allah ele ying turuk inap wereg ulug hat holuk.

⁸Hat ap kinangmon welahenon, it arimanowen An nele ying naptuk hag toho haren oho nele ying nabuk fug angge Anden urukon eneg holtuk laruhun. Ketiya Anden og hitmin angge namihinen hambilik ila ribin,” ulug hiyag nitisimu

⁹anden yet harukmen ap inggik hag anggeyen suwesingga yinggilohon seneg lit an nibil inggik pog tegma yet harikik.

¹⁰Inggik inowen suwesingga ino wirili ferisimu uba yatuk ane men, yihi ulug inindi watuk lit kul angge uruk ane men suwesingga ino fimag-fimag haharegma yet harikik.