Read Angguruk Yali YEHEZKIEL 20 Bible Online

YEHEZKIEL 20 - Angguruk Yali bible

YEHEZKIEL 20

¹Nit o Babilonia kinang fam nunumbahik waharusa sambilen mo ilig am wirig am turukmen sabiren atisimu pikalem fuwabon fam hup numenam welatukukmu Israel inap onowesi an nambeg waharusareg NINIKNI Allahn hiyag nisamisi ane wereg ano ulug nalukema heriyeg latusa.

²Heriyegman NINIKNI Allahn an nubam ele uruk lit,

³”Hat ap kinangmon welahenon, haren Israel inap onowesi hiyag isaruk lit, ’NINIKNI suwon Allah inowen ele urukon tu holiyek: Hiren An kapal niya wahep ano? Kapal niya wahebon fahet nirim peruk lahi ulug An noluk welahiyonen nele tem toho uruk lahi ehek,’ imihin.

⁴Ari imihinteg hat ap kinangmon welahenonen unggum unubam werehon haloho embemihin. It unumbasiyen amben siyahon turuk latfahon fahet inindimuwen wenggel hawag ulug fag toho hiyag isamihin.

⁵Hiyag isaruk lit, ’NINIKNI suwon Allah inowen ele urukon tu holiyek: Hit hunumbasi o Mesir kinang fam weregma An numalikisi welamuhup ulug mumal tarik iyag. Mumal tarik iyag sambil ino An fahet onoluk amag ulug, ’HINIKNI Allah An tu welahi,’ ulug sali unubam imbiyag.

⁶O ino sambil Anden hit o Mesir kinang famen hondog heneplug wilip aruhukteg kinang hit fahet mumaltikikon fam hunumbahik lahuk ulug sali imbiyag. Kinang ari ag owe men kin ahaluwe men eleg am fug angge mondabi anggolo werehen kinang walinggoho werehon obog toho men wirim teg eleg. Ari reg ambeg hunumbahik lahuk iyareg

⁷nin hiyag isaruk lit, ’Hit obog tohowen usangge enemben siyahon famen hinindi reg lahebon arimano hik esemek! Mesir inaben tu Allah hag toho wereg ulug wel eneptuk angge arimano hiren oho wel eneptuk lit siyahap tahup tohon ulug An Allah HINIKNI inowen nele uruk lahi,’ iyag.

⁸Ari iyahon fahet holtul fug ulug enembol yig nutuk lit ap misihen oho usasum Mesir inaben tohon hik isa fug angge nunumba ulug wel eneptuk ane oho imbisibag fug. Imbisibag fugmu An nundama ahe lahibagma nindi oloken o Mesir kinang famen unusuhuk piyag.

⁹Ari piyag angge famen Anden ap o pumbuk walinggoho werehon obog tohowen holegma An numalikisi o Mesir kinang famen hondog eneplug wilip aruhuk irikik anggeyen unusuhuk halug it walinggoho werehonen An nunuk siyahap nabuhup tohon ulug unusuhuk piyag ane ino imbisiyag.

¹⁰Imbisiyareg An numalikisi arimano o Mesir kinang famen wiliboho hondog eneplug lekma liyag.

¹¹Lekma liyareg Anden alem tuk teg ane eke hag eke hag hiyag isarik iyag. Ap san Anden hiyag isarik iyag ane ari hikit toho turuk laruhu halug ebe fano oluk welaruhu.

¹²O sabir angge An kel tarik iyag sambil ino hir oho kel taruk lamuhup ulug komo eneptik iyag. O sabir angge kel taruk lamuhup ane ino An men hit men sebe roho welahe ane fahet enehangge wereg. Enehangge ariyen An HINIKNI Allahn hit An numalikisi mumal taruk lahi ane ap obog toho onoluk aruhu ulug hiyag isarik iyag.

¹³Hiyag isarik iyag ane ari hunumbasi lekma wereg lit holtuk lamuhuk fug ulug enembol yig nutuk latfag. Allahn tuk teg ane fahet komo neneptisiyon hikit toho turuk lamuhuk halug nenebe fano roho welamuhuk ulug wenggel helep angge famen Anden komo eneptik iyahon hondo isaruk lit tu men ari men hiyag isarik iyag ane hikit toho turuk latfag fug. O sabir angge kel taruk lamuhup ulug hiyag isarik iyag sambil oho saliyohap turuk latfagma An nindimu ahe lahibagma lekman unusuhuk piyag.

¹⁴Ari piyag angge famen Anden ap o pumbuk walinggoho werehon iniline An numalikisi o Mesir kinang famen hondog eneplug wilip atikik anggeyen unusuhuk halug it walinggoho werehonen An nunuk siyahap nabuhup tohon ulug unusuhuk piyag ane ino imbisiyag.

¹⁵Imbisiyag angge famen kinang Anden og hisahuk perikik angginang ino fam hondog heneplug lahuk fug ulug sali unubam imbiyag. Kinang ari ag owe men kin ahaluwe men eleg am fug angge mondabi anggolo werehen kinang walinggoho werehon obog toho men wirim teg eleg ambeg ino og isahuk piyag.

¹⁶Ari piyag angge famen tu Allah hag toho wereg ulug wel eneptuk angge inindi enesug lit Anden tuk teg ane fahet komo eneptik iyag ane sobir isalug o sabir angge kel taruk lamuhup ulug hiyag isarik iyag ane hikit toho turuk latfag fugmu kinang ino og isahuk piyag ane ari imbisiyag.

¹⁷Imbisiyag ane roho it obog toho elehap eneple angge famen Anden it yet isaruk lit nindiyen ulug lekman unusiyag fug.

¹⁸Unusiyag fureg lekman it unumalikisi unubam nele uruk lit, ’Hit hunumbasiyen inindimuwen wenggel haruk ane roho tuk teg ane fahet kong toho imbibahon hikit toho turuk lamuhup fug. Iren nunumba ulug wel eneptuk angge hiren oho wel eneptuk lit siyahap taruk lamuhup fug,’ iyag.

¹⁹Ari iyareg, ’Hit HINIKNI Allah An tu welahi. Anden tu men ari men turuk lamuhup ulug komo heneptik iyag ane seneg lit tuk teg ane fahet hiyag hisiyag ane hikit toho turuk lamuhup.

²⁰O sabir angge An kel tarik iyag sambil ino hir oho kel taruk lamuhup. O sabir angge kel taruk lamuhup ane ino An men hit men sebe roho welahe ane fahet enehangge wereg. Enehangge ariyen An HINIKNI Allahn hit An numalikisi mumal taruk lahi ane ap obog toho onoluk aruhu,’ iyag.

²¹Ari roho hunumbasi unumalikisi komo eneptik iyag angge famen iren holtuk lamuhuk fug ulug An enembol yig nutuk latfag. Allahn tuk teg ane fahet komo neneptisiyon hikit toho turukon arimano enebe fano roho welamuhup ulug wenggel helep angge famen Anden komo eneptik iyahon hondo isaruk lit tu men ari men hiyag isarik iyag ane hikit toho turuk latfag fug. O sabir angge kel taruk lamuhup ulug hiyag isarik iyag sambil oho saliyohap turuk latfagma An nindimu ahe lahibagma lekman unusuhuk piyag.

²²Ari piyag angge famen Anden ap o pumbuk walinggoho werehon iniline An numalikisi o Mesir kinang famen hondog eneplug wilip atikik anggeyen unusuhuk halug it walinggoho werehonen An nunuk siyahap nabuhup tohon ulug unusuhuk piyag ane ari imbisiyag.

²³Imbisiyag angge famen Anden hit fobik hinibam welamuhup ambehen yanggaloho o kema-kema pilili-palala hisahuk ulug sali unubam imbiyag.

²⁴It iniknisiyen tu Allah hag toho wereg ulug wel eneptuk angge inindi enesug lit Anden tuk teg ane fahet komo eneptik iyag ane sobir isalug o sabir angge kel taruk lamuhup ulug hiyag isarik iyag ane hikit toho turuk latfag fugmu Anden o kema-kema hik-hak isahukon fahet sali imbiyag.

²⁵Imbiyareg Anden it obog toho siyag amag ulug alem siyahon eke hag eke hag tuk hahon hiyag isarik iyag. Ap san Anden siyag toho komo eneptik iyag ane ari hikit toho turuk laruhu halug ebe oluk welaruhu fug ulug hiyag isiyag.

²⁶An numalikisi arimano nolohotma inindiyet enebeyet puhun toho welalep angge famen An nubahet nungge-nungge emberuk lit ininggarehen siyahap tawag ulug Anden inindi sohuwap eneptik iyagma unumalikisi wandabon nunumbasi fahet umbul ulug indokma yal eneptuk latfag. Iren nungge fahet siyag ane turuk lahe ulug inindi enekol haruk lamuhupteg NINIKNI Allah wereg ulug onoluk aruhuwen ari hag toho unubam turuk latik iyag ehek,’ imihin.

²⁷Ari imihinteg hat ap kinangmon welahenonen Israel inap nin hiyag isamihinon tu, ’NINIKNI suwon Allah inowen ele urukon tu holeg lamek: Hit hunumbasiyen An enembol yig nutuk lit nunuk nin sebe roho siyahap naptuk latfag ane iminon tu:

²⁸Anden kinang og hisahuk ulug sali imbiyag ambeg hondog eneplug larik iyagma punu obog toho famen oho e usa ahen alman oho wam waroho hubu lahaptuk lit amben fano angge yaloho ik hinangguruk lit An nindi nolokap naptuk latfag.

²⁹Nindi nolokap naptukmu Anden nele unubam uruk lit, ’Punu arimano fahet nungge peruk lit laharuk lahep?’ iyag ane hikit toho punu ununuk Bama[1] suwalfag ambeg arimano ketiya oho wereg.’

³⁰Ari fahet haren Israel inap arimano hiyag isaruk lit, ’NINIKNI suwon Allah inowen ele urukon tu holeg lamek: Hit An nolohotma hinindiyet henebeyet puhun toho welalep angge famen hunumbasiyen An numbahalug tu Allah hag toho wereg ulug wel eneptuk angge enemben siyahon hiren oho wel eneptuk lit siyahap taruk lahebon fahet fano peruk lahep ano?

³¹Indamen tulug ketiya oho nunumbasi wel tul ulug nungge-nungge imbik laruk lit hunumalikisi oho indokma yal eneptuk lahep ane inowen siyag angge hunubam tag teg. Tag teg lit weregman hit Israel hinap Allahn ele hiyag nisamisiyen kapal hul ulug nambeg wahep ano? An HINIKNI suwon Allah noluk welahiyonen nele tem toho uruk lit, ’Hiren An kapal niya wahep angge famen Anden nele hiyag hisamin fug,’ uruk lahi.

³²Uruk lahimu hit hinindimuwen wenggel haruk lit, ’Ap o pumbuk winonen usa ahen men usa ahalep men wel eneptuk hag toho niren oho wel eneptuk lamuhuk,’ peruk lahep ane hikir aruhu fug.

³³An HINIKNI suwon Allah noluk welahiyonen nele tem toho iminon tu: An nolok haruk lahireg ap suwonen unumalikisi sen enesug hag toho ninggik ineyonen hit sen henesug lit o pumbuk kema-kema hik-hak hisarusa ambehen palu roho hondog heneplug wilip aruhuk.

³⁴

³⁵Wilip aruhukteg o pumbuk arimano honggolegma lekman hit men nonorohole ambimu amuhukteg nenele uruk lit alem hunubam werehon haloho umbuhuk.

³⁶Anden hit hunumbasi o Mesir lekma hondog eneplug larik iyareg alem unubam werehon haloho imbiyag hag toho hit hunubam tuhuk ulug An HINIKNI suwon Allah inowen nele uruk lahi.

³⁷Wam ngi inaben enembohom domba winag isaruk lit inibam kilap eneptuk hag toho Anden hit henebe winag hisahukteg An numalikisi wereg lit nele holtuk lamuhuben hondog heneplug lahuk.

³⁸Hit sehelimuwonen An enenduhun yig nutuk lit nele ying naptukon arimano en heheg enemumu umbuhukteg ap pohon wereg ambehen wiliboho hondog eneplug lahuk angge famen Israel kinang fam kuhup fug. Kuhup fugmu hiren yet isahupteg NINIKNI Allah wereg ulug honoluk aruhu.

³⁹Hit Israel hinaben An HINIKNI suwon Allah inowen nele iminon tu holeg lamek: Hiren fano peruk lahep halug nunumbasi ulug wel eneptuk lahep angge onombolim laruk lamuhup! Fobik hiren nin hebeloho An nele hol niyaruk lamuhup halug usangge hiren foroho lahebon fahet nungge-nungge emberuk lit An nunuk siyahap naptuk lahep ane umbusuhup.

⁴⁰Umbusuhupteg hit Israel hinap obog toho Allah wel tul ulug tom yaron Anden mumal tiyahon Israel kinang pulmu werehon ino fam waharuk lamuhup. Waharuk lit Anden hiyag hisarik iyag ane hikit toho roti anggen tam paltuk lamuhubon men nungge-nungge Allah og umul peruk lamuhubon men imbik waharuk lamuhup halug Anden fano peruk laruhuk.

⁴¹Hiren An nolohotma hubu lahaptuk lamuhubon fahet nahiyeg haruk lit nindi henesug laruhuk. Ari roho Anden ap o pumbuk obog toho iniline hit o pumbuk kema-kema hik-hak hisarusa ambehen palu roho hondog heneplug wilip aruhukmu ap obog tohowen An nubahet Allah ebe usa fulu rehon wereg ulug onoluk aruhu.

⁴²Onoluk aruhumu Anden kinang og hisahuk ulug hunumbasi unubam sali imbiyag ambeg hondog heneplug kuhuk halug hiren oho An nubahet NINIKNI Allah wereg ulug hinindi anggar aruhu.

⁴³Hinindi anggar aruhumu hiren siyag ane eneg turuk lahebon fahet wenggel haruk lit niren amben siyahon turukmen eneg siyag angge nunubam tag teg latisi ulug hininggareg fahet me henepe henebuhu.

⁴⁴Hit Israel hinaben amben siyahon turuk lit ap siyahap enebil laruk lahebon fahet Anden ayeg waroho hunusele angge famen Anden tam sali imbiyag ane hikit toho onoluk welamag ulug hunumbahakukmu hiren An nubahet NINIKNI Allah wereg ulug honoluk aruhu. An HINIKNI suwon Allah inowen nele aru uruk lahi ehek,’ imihin,” ulug hiyag nitisi.

⁴⁵NINIKNI Allahn nin an nubam ele uruk lit,

⁴⁶”Hat ap kinangmon welahenon, haren ik ambut fil horohole leko yet haruk lit ohi obog toho siyag aruhu ulug komo yig itmihin.

⁴⁷Yig utuk lit, ’NINIKNI suwon Allah inowen ele urukon tu holeg lamin: Anden indok munggaluhukmu e olukonet ilimonet obog toho nahu. Indok ino war am fug angge ik ambut filen tulug lahareg ik eleruk fil fululung toho nil larukmen eneg ap onorohole obog toho indoken wiyal eneptuk laruhu.

⁴⁸Ari roho turukmu ap obog tohowen yet hahupteg An HINIKNI Allahn indok war am fug angge fululung toho nil larukon ari munggalehek ulug onoluk aruhu ehek,’ imihin,” ulug hiyag nitisi.

⁴⁹Ari ulug hiyag nitisimu anden nele uruk lit, ”Yihi, NIKNI Allah hat palimu welahenon, ap arimanowen te, ’Hun ariyen ele indit toho urukmen warukmen eneg wereg,’ ulug nabug uruk lamuhup,” irikik.