Read Angguruk Yali YEHEZKIEL 21 Bible Online

YEHEZKIEL 21 - Angguruk Yali bible

YEHEZKIEL 21

¹NINIKNI Allahn an nubam ele uruk lit,

²”Hat ap kinangmon welahenonen Yerusalem fil horohole leko yet haruk lit An Allah nibam men Israel kinang obog toho men siyag aruhu ane fahet hiyag isamihinon tu:

³Kinang Israel fahet NINIKNI Allahn ele urukon tu holeg lamek! Anden hat siyahap habuhuk ulug karog lisoho wahukteg ik eleruk filen tulug ambutmu ap fanowonet siyahonet obog toho unusuhuk.

⁵Unusurukmu ap obog tohowen An yet niyahupteg INIKNI Allahn karog fam unusuruk ulug onoluk aruhumu Anden unusurukmen eneg Israel inap obog toho eleg amuhup ehek imihin.

⁶Imihinteg hat ap kinangmon welahenon, ap iniline hine elehen kinangma fuk timihinteg ouken hele nga ruruk latmihin.

⁷Nga rurukmu aben hol hiyalusareg hat hubam, ’Nungge fahet hele nga ruruk lahen?’ ulug kapal hiyalusa halug haren, ’Siyag amuhup urukmu holihiyon fahet nga ruruk lahi,’ imihin. Imihin ane ari hol halusareg ap obog toho enekolen miye si ruruk lit unuwag elek turuken inine roho tuk teg ane eleg aruhu. Anden ihiyon hikit toho we tem toho teko lahu ulug An HINIKNI suwon Allah inowen nele uruk lahi,” irisi.

⁸Irisireg NINIKNI Allahn an nubam nin ele uruk lit,

⁹”Hat ap kinangmon welahenon, teko lahu ane fahet ap hiyag isamihinon tu: NINIKNI Allahn ele urukon tu holeg lamek! Karog ayeg olokon wep toho wereg.

¹⁰Karog inowen ap unusukag ulug ayeg fano umaho lit il umbagpag turuk. Il umbagpag turukmu An numalikisi hak toho unusukag ulug karog ino ap unusurukon inggikmu umbuhup! Umbuhupmu numalikisiyen Anden komo eneptikik ane holtuk elehen enehiyeg toho wereg ane karog ino fam elehap tuhu.

¹²An numalikisi Israel inap onowesiyet unumalikisiyet obog toho karog inowen elehap enebuhu ane fahet hat ap kinangmon welahenonen uba nim-nim nga ruruk lit hamig wat tamihin.

¹³Numalikisiyen Anden komo eneptikik ane holtuk ano ulug wal isarikikmu iren An nele holtuk elehen siyag amuhup ihi ane tem toho hikir aruhu ulug An HINIKNI suwon Allahn uruk lahi.

¹⁴Hat ap kinangmon welahenonen hinggik tag turuk lit teko lahu ane fahet ap hiyag isamihinon tu: Karog humon ino ine anggolo aruhureg ap lebeg-lebeg hik-hak isamin ulug waling enebik waruhu.

¹⁵Anden karog ap o pumbuk kema-kema werehon unusil laruk laruhuwen monde fik waruhukmu yet hahupteg ap anggolo enekolen kinangma fuk turuk lamuhup. Yihi, karog ayeg umahowon umbagpag turuk lit ap elehap enebil waharuk!

¹⁶Karog inowen ap tu imbisik, tu warik puk fug angge inggik pikit filet hare filet unusukag.

¹⁷Unusukag ulug Anden oho ninggik tag tuhukmu nindimu nolok peruk lahi ane yuwag aruhu ulug An HINIKNI Allahn uruk lahi,” irisi.

¹⁸Irisireg NINIKNI Allahn nin ele nubam uruk lit,

¹⁹”Hat ap kinangmon welahenon, o Babilonia inap onowe suwon inowen karog seneko Amon inap inibam pumbuk suwon Raba ano, Yehuda kinang fam o pumbuk Yerusalem elehet ineyon walinggoho ohowon ano pin halog toho unusik lahuwen kebunggalem handuhal teg ambeg ilit toho hahare femihin. Hahare feruk lit o Raba laruk ke tu, Yerusalem laruk ke tu ulug haharoho embemihin.

²¹Yet hemek! Babilonia inap onowe suwon ino wahareg kebunggalem handuhal teg ambeg unduhuk lit o kema lamin ulug wam indi kim halug minggin tog toleleng isaruk lit sabalhe aren wel eneptukon kapal esehek.

²²Kapal isarukmen enehangge o Yerusalem fam ahama Babilonia inap onowe inowen oko walug inggik pikironen seneg lit wereg. Enehangge ino hikit toho Babilonia inap onowe umalikisi men o Yerusalem pin kuhuk ulug lahupteg enele ngik-ngog uruk lit elehet o ino walinggoho ohowon fene kinang hop til laharuk lamuhup.

²³Ari roho turuk lamuhup ane fahet enehangge ino o Yerusalem fam aha angge famen Yerusalem inap inindimuwen Babilonia inap men nininggik ahandip toho welamuhuk ulug sali emberukuk angge re enehangge ino ele si eneg aha peruk. Ari peruk angge famen Babilonia inap onowe inowen Yerusalem inaben siyag ane turuk latuson inamap tuhureg siyahap enebuhu.

²⁴Ari fahet An HINIKNI suwon Allah inowen Yerusalem inap unubam nele uruk lahiyon tu: Hiren mun ane man ane siyahon turuk lahebon inam aruhumu alem angginon hunubam aruhu.

²⁵Hat Yehuda inap onowe suwon welahenon, hat hubabut siyahonen sali emberikin ane uwag oko hilarikinon fahet alem angginon hubam aruhumu war aruhunon horog aha.

²⁶Horog ahama haren ap suwonen lahaptuk angge hunggulmu wan teg lahenon ho roho hik isamihin! Mun ane man ane hebel atuk lit apma werehon palimu aruhumu palimuwon apma aruhu ulug An HINIKNI suwon Allah inowen nele uruk lahi.

²⁷Yerusalem inaben siyag ane turukon fahet Anden ap tuwen alem angginon unubam umbuhu peruk lahiyon monde fik waharuk lit inibam pumbuk Yerusalem halog toho siyahap tuhukmu lilibug toho lin uhu,” irisi.

²⁸Irisireg NINIKNI Allahn nin ele uruk lit, ”Hat ap kinangmon welahenon, Amon inaben An nabug uruk latuson fahet siyahap enebuhuk ulug An HINIKNI suwon Allah inowen nele uruk lahi ane haren hiyag isamihin. Hiyag isamihinon tu: Karog ayeg umahowon umbagpag turuk lit hit hunusimin ulug sap teg lit wereg.

²⁹Weregma aben fulu ane yet halug hit siyag amuhup fug ulug enele si ane hiyag hisarukmen karog inowen hit henenggolop pal henebik oho reg. Ari regma hit amben siyahon eneg turuk lahebon alem angginon hunubam umbuhupmu eleg amuhup sambil horog aha.

³⁰Horog ahama karog inowen ap anggolo unusuhureg ibam suhuloho lahu. Lahumu An Allahn karog ino laltusa ambehen elehap tuhuk.

³¹Elehap timin ulug An nolok haruk lahi ane indok ambulpul hag toho ubam hik isaruk lit ap inindi sohuwonen siyahap tukag ulug ininggikmu umbuhuk.

³²Umbuhukmu indokma hik isahupmu indoken naruk lit amep kinangma wambuhu. Wambuhumu fobik ap misihen oho at fahet wenggel haruk laruhu fug ulug An HINIKNI Allahn nele uruk lahi,” irisi.