Read Angguruk Yali YEHEZKIEL 22 Bible Online

YEHEZKIEL 22 - Angguruk Yali bible

YEHEZKIEL 22

¹NINIKNI Allahn nin ele uruk lit,

²”Hat ap kinangmon welahenonen o Yerusalem inap hiyag isaruk lit, ’Honolok ane eneg turuk lit ap unusil laruk lahep,’ ulug alem unubam werehon haloho embemihin.

³Emberuk lit imihinon tu: NINIKNI suwon Allah inowen ele urukon tu holeg lamek! Hit hinibam pumbuk pulmuwen honori unusuruk lit alem angginon hunubamap taruk latikip. Nunumbasi ulug wel eneptuk lahep angge laltuk lit hinibam siyahap taruk latikip. Ari roho turuk latikibon fahet alem angginon hunubam umbuhupmu eleg amuhup sambil horog aha. O ino sambil Anden siyahap henebuhukmu ap o pumbuk obog tohowen hit hininggaliyap heneptuk lit wasubag sup heneptuk lamuhup.

⁵Sup heneptuk lit ap horogma werehonen yatma werehonen hit fahet, ’It ununuk suwonen onolok ane su roho turuk lit siyahap taruk latusa,’ ulug inda yag heneptuk lamuhup.

⁶Israel hinap honowesi arimanowen nit ninine reg lahe ulug wenggel haruk lit ap unusil laruk.

⁷Hiniknisi hinisingasi apmayap eneptuk lit ap pohon siyahap eneptuk lahep. Hiyap yuwohon men malik suwarehon men enele ying eneptuk lahep.

⁸An nubahet emberuk angge siyahap turuk lahep. O sabir angge kel taruk lamuhup ulug hiyag isarik iyag sambil oho saliyohap turuk lahep.

⁹War amag ulug aben onori enebug uruk. Punumuwen nunumbasi ulug wel eneptuk angge fahet wam emberukon naruk lit hit sehelimuwen ininggali ane turuk.

¹⁰Misihen ikni uhe men ambi atuk, ekeyen hiyap pikalem sap turukmu ambiyeg nohoruk.

¹¹Ekeyen are uhe pal taruk, ekeyen iyamalhumi senetuk, ekeyen erek ikniyen indag tarukon siyahap turuk.

¹²Alem haltuk inap ninibil amag ulug fano-fano angge og isarukmu hilaruk lit ap siyag ane turuk elehon unusuruk. Hiren honori uang og isaruk lahebon unubam, ’Hiren hebeloho og nisaruk it unon sebe roho og nisahup,’ ulug hiyag isaruk lit enele ying eneptuk lahep. Hit obog tohowen An nubahet henepeleg atisi ulug An HINIKNI suwon Allah inowen nele uruk lahi.

¹³Hit honori winon enele ying eneptuk lit winon unusuruk lahebon fahet An ninggik ineyonen alem angginon hunubam umbuhuk.

¹⁴Umbuhukmu hiren te nininggik ine rehen nenekol eleg toho welamuhuk peruk lahep ano? An HINIKNI Allahn nele aru uruk lahiyon hikit toho tuhuk.

¹⁵Hiren siyag ane eneg turuk lahebon eleg amag ulug Anden hit o pumbuk kema-kema hik-hak hisahuk.

¹⁶Hik-hak hisahuk ambeg welamuhupmu ap o pumbuk winonen hit fahet ininggarehen siyahap taruson wereg ulug wenggel haruk lamuhup. Ari roho wenggel haruk lamuhupmu hiren An fahet NINIKNI Allah wereg ulug honoluk aruhu,” irisi.

¹⁷Irisireg NINIKNI Allahn nin ele uruk lit,

¹⁸”Hat ap kinangmon welahenon, Israel inap arimano An nolohotma melei orohole fanowon hag toho welalep angge famen melei orohole siyahon hag atusa.

¹⁹Ari fahet An HINIKNI suwon Allahn nele uruk lahiyon tu: Anden hit hunubahet nolok haruk lahireg hit obog toho o Yerusalem palu henebuhukteg aben melei orohole fano amag ulug indokma iringguruk hag toho nambilik ahe indok ambulpul turukon hunubam fu isahuk. Siyag angge melei fam tag tehon indok olokonen elehap turuk hag toho Anden hir oho mondabi elehap henebuhuk. Ari roho hunubam tuhukmu hiren NINIKNI Allah indimu indok ambulpul turuk hag toho olok haruk lit siyahap neneptisi ulug honoluk aruhu,” irisi.[2]

²³NINIKNI Allahn an nubam ele uruk lit,

²⁴”Hat ap kinangmon welahenon, Israel inap hiyag isamihinon tu: Hit henengginang siyahap tirikibon fahet An Allahn nolok haruk lit osit pilabik waruhuk fug.

²⁵Hit milal heneptuk inap arimano olomene pak watuk lit hilak turukon hag toho wereg. Wereg lit fano-fano angge aben tohon hilalug ap unusil larukmu hit sehelimu hiyap yuwohon anggolo atuk.

²⁶An namingmingangge imam arimanowen nawene suwesingga fam haharehon ino sobir isalug An nubahet emberuk angge siyahap turuk lit tu Allah men wirim teg, tu wirim teg eleg ulug haluk fug angge ap fanowap eneptuk angge tu, siyahap eneptuk angge tu ulug ap hiyag isaruk eleg. Hiyag isa fug angge o sabir angge kel taruk lamuhup ulug hiyag isarik iyag ane hondo rebeseruk. Ari roho turuken hit Israel hinaben An apmayap naptuk lahep.

²⁷Israel hinap honowesi arimano wam eliyen pak wisal heheg narukon hag toho wereg. Aben tohon yoholiyangge hilaruk lit ap unusil laruk.

²⁸Ari roho siyag ane eneg turukon fahet aben fano pukag ulug hit honori nabi arimanowen mur ka lahaptuk hag toho turuk lit fulu roho yet hehe ulug enenggelem ane eneg uruk. NINIKNI Allahn ele hiyag isaruk elegman NINIKNI suwon Allah inowen ele urukon tu holeg lamek uruk.

²⁹Tung inap arimanowen aben angge enele inine roho heng taruk lit ap enenggengge huhulangge hilaruk. Hilaruk lit inine elehon men enenggengge elehon men unuyuhen sobir isaruk. Sobir isaruk lit ap pohon unubam turuk lamuhup ulug haharoho imbibag ane tuk fug angge apmayap eneptuk.

³⁰Ari roho turuk ane fahet Anden ayeg waroho siyahap enebuhuk tohon ap eke elehet inibam walinggoho wa hahon yami ririkik angge famen hiyaharikik fug. Ap misig oho elehet halog teg keyen pin kuhup ulug ke paltukon welatisi fug.

³¹Welatisi fugmu iren siyag ane eneg turukon fahet nindi indok ambulpul hag toho nolok haruk lit ayeg waroho siyahap enebuhuk,” ulug NINIKNI suwon Allah inowen ele irisi.