Read Angguruk Yali YEHEZKIEL 23 Bible Online

YEHEZKIEL 23 - Angguruk Yali bible

YEHEZKIEL 23

²”Hat ap kinangmon welahenon, hiyap piren inisinga misihen indag eneptisiyon welatusa.

³It piren enebe tuhummu o Mesir wereg lit yaying turukmu aben inag sen eneptuk latusa.

⁴Owe unuk Ohola, ot unuk Oholiba suwaleg latusa. Ohola ino o Samaria pumbuk salikap toho suwalegma Oholiba ino o Yerusalem pumbuk salikap toho suwalehon wereg. It piren Anden og enesug latikikmu ap umalik men hilani malik men indag nutusa.

⁵Indag nutusareg Ohola ino Asyur inap enembong se roho tog aptukon arimano fahet indi naruk lit An numbahalug it men yaying turuk latisi.

⁶It kabiniyon enebe fanowon arimano Asyur inap onowesi men sehen seneg inap milal eneptukon men wereg lit sum mut fam palehon wan teg lit wam kuda fam lahalug laruk latusa.

⁷It suwon-suwon men Ohola inowen yaying turuk lit unumbasi iren wel eneptukon aren oho wel eneptuk lit siyahap taruk latisi.

⁸Siyahap taruk lit ebe tuhummu Mesir inap an men ambi atuk lit nag sen niyawag ulug yaying til laruk latisi ane embeserisi fug.

⁹Ari roho til noruken Anden Asyur inap at indi narukon ininggikmu emberikik.

¹⁰Emberikikmu Asyur inap arimanowen at asum hog toho hik isarusareg kabiyog weregma karohen ware feserusa. Watusareg umalikisi abet hiyabet og eneplug larusa. Ari roho ubam turuk lit inggarehen siyag ane tirisiyon fahet ayeg waroho ware feserusa ulug hiyap obog tohowen at abug uruk.

¹¹Ohola inowen yaying til eneg larukmen aben ware feserusama ot Oholiba inowen yet harisi angge famen indi anggar am fug angge ap unubahet indi naruk lit su roho yaying turuk latisi ane men owe Ohola inowen yaying turuk latisiyon men wirim teg eleg.

¹²Wirim teg elegma Oholiba ino Asyur inap enembong se roho tog aptukon fahet indi naruk latisi. It kabiniyon enebe fanowon arimano Asyur inap onowesi men sehen seneg inap milal eneptukon men wereg lit sum fanowon wan teg lit wam kuda fam lahalug laruk latusa. It fahet indi naruk latisimu

¹³Anden yet harukmen Oholiba inowen it men yaying turuk lit oweyen siyahap taruk latisi hag toho aren oho siyahap taruk latisi.

¹⁴Asyur inap men ambi atuk lit siyahap taruk latisireg nin sebe roho yaying turuk latisi ane tu: Oholiba inowen Babilonia inap enehuhe ubahat fene mut lahabegma yet isarisi.

¹⁵Yet isarukmen Babilonia inap enehuhe arimano enehako roho tog aptuk inap hag toho wereg lit pahaluk fanowon enelunggu ke pug tebelug ununggul asum po ril larukon langguk tegma yet isarisi.

¹⁶Yet isarisireg itano it fahet indi naruk lit an nambeg wamuhuben hiyag isa lalihip ulug otsi mon eneptisimu o Babilonia kinangma hiyag isa larusa.

¹⁷Hiyag isa larusama Babilonia inap arimano ambeg waharusareg at men ambi atuk lit siyahap turuk latusa. Siyahap turusama Oholiba inowen it fahet nirim ulug ambol yig isaruk latisi.

¹⁸Yig isarisimu Anden te nungge fahet ap iniline abiye wereg lit yaying turuk ulug owe nambol yig itikik hag toho or oho nambol yig itikik.

¹⁹Nambol yig itikik angge famen Oholiba inowen at ebe tuhummu o Mesir wereg lit yaying turuk latisi ane fahet wenggel haruk lit nin sebe roho yaying turuk laruhuk peruk latisi.

²⁰Peruk lit an nindi naruk latisi inap arimano eneye wam keledai eneye humon hag toho weregma eneyenggol wam kuda ayenggol hum toho wilip atukon hag toho wilip atuk latisi ulug indi ouk toho wenggel haruk latisi.

²¹Wenggel haruk lit nebe tuhummu o Mesir wereg lit yaying turukmu aben an nag sen naptuk latusa hag toho nin hebeloho an nubam telep peruk latisi,” irisi.

²²Irisireg NINIKNI suwon Allah inowen Oholiba hiyag utuk lit, ”Nahaloho, Babel inap, Kasdim inap, Pekod inap, Soa inap, Koa inap, Asyur inap enebe kabiniyon, ap onowesi roho werehon ununuk suwon wam kuda fam lahalug larukon onotsi milal eneptuk lit enehako roho tog aptukon arimano hat hindi enesug latikin angge famen hambol yig isarikin. Yig isarikin inap arimanowen hat huwabukag ulug walinggoho wamuhuben Anden wol enebuhuk.

²³

²⁴Wol enebuhukmu ap enebe mondoko tog piyabangge men ununggul asum men wan teg lit kereta wam kudan lisoho walug laruk angge fam lahalug laruk lit hat waling habik wamuhup. Wamuhupmu Anden hat ininggikmu humbahakukmu iren unggum haloho emberuk ane hikit toho alem angginon hubam umbuhup.

²⁵Haren An HIKNI Allah hambol yig nutuk latikin ane fahet nolok haruk lit ap arimanowen hat siyahap habukag peruk lahi ane hikit toho inindi onolok haruk lit hat hambiyang men hisanggo men paloho hik isaruk lit hat hori onoluk welamuhubon karog fam unusuhup. Unusuhupteg hat humalikisi abet hiyabet o pumbukmuwen hondog eneplug wilip amuhupteg mun angge man angge haren tohon harep pisako siyaha fusuhup.

²⁶Siyaha fusuhupteg hat hasum wan teg lahenon hog toho hik isalug haliliyangge lisoho hilahup.

²⁷Haren o Mesir kinangman ak turuk lit hinggali eleg toho yaying turukmen eneg welatikin ane Anden elehap tuhukmu Mesir inap men ambi ala ulug wenggel haruk laruhun fug.

²⁸An HIKNI suwon Allah inowen nele uruk lahiyon tu: Ap hat hirimen hambol yig isaruk latikinon ininggikmu Anden hat humbahakuk.

²⁹Humbahakukmu iren hat fahet inirimen mun angge man angge haren lisag toho umbat taruk latikinon obog toho huhulangge hilahupteg hat hasum hog toho hik isahupmu hat habiye wereg lit kinangma yinggigmu humbahalug lahup. Lahupmu aben hat hahap yet hiyarukmen hinggali eleg toho yaying turuk lahen ane inam aruhu.

³⁰Haren ap o pumbuk anggolo men yaying turuk lit iren nunumbasi ulug wel eneptuk angge haren oho wel eneptuk lit siyahap taruk latikin ane ariyen alem angginon aru hubam aruhu.

³¹Hat howeyen siyag ane turuk latisi ane hikit toho turuk latikinmu howe ik olokon nawag ulug Anden kubag fam hinang itikik hag toho har oho hinang huruhuk.

³²Kubag humon yaron ololop toho hinang huruhukmu haren obog toho nahunmu aben yet hiyaruk lit inda yako hinggaliyap haptuk lamuhup ulug An HIKNI suwon Allah inowen nele uruk lahi.

³³Kubag howe Samarian tohon fam Anden ap mondabi enekolap eneptuk ahik hinang huruhukmu haren obog toho nahunteg nenek turuk lit mondabi siyag atmin puhun.

³⁴Ari puhunteg kubag lilibug toho lin uhuwon asenggep fam ik tor angge welaruhuwon milang toho naruk lit hat hag kiriring tahun ulug An HIKNI suwon Allah inowen nele uruk lahi.

³⁵Nin nele uruk lahiyon tu holeg lamin: Haren An fahet hapeleg atuk lit hambol yig nutug hinggali eleg toho yaying turuk latikin ane ariyen alem angginon hubamap tarikinon ha reg laruhun,” irisi.

³⁶Irisireg NINIKNI Allahn an Yehezkiel nubam nin ele hiyag nutuk lit, ”Hat ap kinangmon, Ohola men Oholiba menen ininggali ane turuk latuson fahet alem unubam werehon haloho embemihin.

³⁷Iren An numbahalug nunumbasi ulug wel eneptuk angge fahet eneg wenggel haruk lit ap unusil laruk latusa. Unusil laruk lit unumalikisi An indag nutuson arimano unumbasiyen nawag ulug unusuruk lit og isaruk latusa.

³⁸Og isaruk lit nin sebe roho An nele ying naptusa ane tu: Unumalikisi arimano unumbasi og isaruk latusa sambil ino An nibam kuruk lit siyahap turuk latusa. O sabir angge kel taruk lamuhup ulug hiyag isarik iyag sambil oho saliyohap turuk latusa.

³⁹

⁴⁰Ari roho turuk lit nin sebe roho ap o pumbuk yatma werehon nit nenembeg wamuhuben wol enebik lalihip ulug onot eke monde ferusa. Monde ferusareg ap arimano wamusama ambi amul ulug enebe ik umaho felug onorohole ke wam finggi are roho eneliliyangge lahaptusa.

⁴¹Lahaptusareg Anden og isarikikon amben fano angge men e zaitun ahaluwe men e tuwalehon emberimu emberusareg iraham heniye fanowon tuwale felug heriyeg latusa.

⁴²Heriyeg lit hol harukmen ap wol eneptuson lekman waharukmu ap mondoko enehiyehen yunggultil onolohotma larusa. Larusama ap wol eneptuson arimano Ohola men Oholiba men iniraham larusareg sohomangge ininggikmu kila felug ununggulmu lahaptuk angge ili rurukon lahaptusa.

⁴³Lahaptukmu yet isarikikteg Anden wenggel haruk lit, ’Hiyap aruma sabal atusa angge famen yaying turukmen eneg wereg,’ perikik.

⁴⁴Perikikteg yet isarukmen ap arimano hiyap yaying turukon enembeg kuk wilip am turuk hag toho Ohola men Oholiba men enembeg larusama it piren itano ininggali eleg toho ap arimano men ambi atusa.

⁴⁵Ari roho turuk latusa ane fahet ap unubabut fanowonen Ohola men Oholiba men unggum unubam werehon haloho umbuhup. Emberuk lit, ’It piren aruman yaying turuk lit ap unusil laruk,’ ulug hiyap ap enehunsi pal tarukon men ap unusurukon men alem unubam werehon kong turuk ane hikit toho alem unubam umbuhup.

⁴⁶Ari fahet An HINIKNI suwon Allah inowen nele uruk lahiyon tu holeg lamek: Ap wol enebuhupmu wamuhupteg hiyap piren aruma siyahap eneptuk lit enenggengge huhulangge hilahup.

⁴⁷Hilahupteg helep fam unusulug enebe karog fam pal-pal hik isahup. Hik isahupteg unumalikisi ap angge hiyap angge unusuhupteg inibam harep pisako siyaha fusuhup.

⁴⁸Ari roho turuk lit Anden ininggali eleg toho turuk ane kinang tu famen elehap tuhuk. Elehap tuhukmu hiyap obog toho inindi anggar aruhumu Ohola men Oholiba menen turuk latusa ane hikit toho turuk lamuhup fug.

⁴⁹Hit Ohola men Oholiba menen hininggali ane turuk latikibon fahet aben alem angginon hunubam umbuhup. Umbuhupmu nunumbasi ulug wel eneptuk lit siyag ane turuk latukuk ane ariyen alem ari nunubamap tarukuk ulug ha ruruk lamuhup. Ha reg lit hit hinindi anggar aruhumu An fahet NINIKNI Allah wereg ulug honoluk aruhu,” irisi.