Read Angguruk Yali YEHEZKIEL 24 Bible Online

YEHEZKIEL 24 - Angguruk Yali bible

YEHEZKIEL 24

¹Nit o Babilonia kinang fam weregma mo ilig am wirig am turukmen sohowenam libagma pikalem numon fam hup numen atfagma NINIKNI Allahn an nubam ele uruk lit,

²”Hat ap kinangmon, o yoho Babilonia inap onowe suwon otsi menen o pumbuk Yerusalem pin kuhuk ulug waling enebik lahasa. O yoho waling enebik lahasa ulug haren suwesingga fam hahare femihin.

³Hahare femihinteg hat hori An nele ying naptukon arimano indit toho uruk ane fam komo eneptuk lit, ’NINIKNI suwon Allah inowen ele ehekon tu: Ik kubag elma hinanggo felug indok emberimu imbiyek!

⁴Embelihipteg wam domba fanowon eneko walihipteg waroho senggele felug inggik fanowon, uyug fanowon, uwag fanowon men kubag elma kila felihip. Kila felihipteg ik wituk lit uwag arimano osoho fukag ulug indok pisariyek,’ ehek.

⁶Ehekteg NINIKNI Allahn nin ele uruk lit, ’O pumbuk aru ap unusuruk aneyen keleg tehen siyag amag! O aru kubag ip orohole eneg tehon hag toho werehen fanowap tuk fug teg. Wam unu elma werehon tu fanowon tu siyahon puk fug angge misig-misig lisoho waruk lit obog toho wili fisiyek!

⁷O pumbuk tu famen ap siyag ane turuk elehon helep palimuwen unusuruk lit enemep kinangma saluk fug angge embeseruk latusa.

⁸Ari turuk latuson fahet ayeg waroho unusukag ulug Anden perikik ane hikit toho unusurusareg enemep kinangma saluk fug angge embeserusa.

⁹Ari fahet An HINIKNI suwon Allahn nele uruk lahiyon tu: O pumbuk aru ap unusurukonen keleg tehen siyag amag! Ari fahet e indok yaltukon lahabil lahiyek!

¹⁰E anggolo walug watug indok munggaliyek! Wam unu osoko imbiyek! Ik kubag elman hilil isiyek! Uwag han nawag!

¹¹Kubag ahuri rehon ino indok yanggoma imbisiyek! Embeselihipmu indok inahanen yanggo atuk lit ip orohole rehon ho roho wambimisi angge famen

¹²ip orohole eneg tehen mondabi ho roho la fug teg. La fug tegman fanowap tul ulug saplangge wal ha fug!

¹³Hit Yerusalem hinaben hininggali ane turuk latikibon ariyen siyag angge hunubam tag tehon ino Anden elehap timin ulug wal harikik angge famen siyag angge hunubam tag tegman eneg wereg. Tag tehen hat puhun teg eleg angge weregman eneg An nolok peruk lahi ane indok ambulpul hag toho hunubam aruhumu eneg nindi yuwag aruhu.

¹⁴An HINIKNI Allahn tuhuk ihiyon ari hikit toho we tem toho hunubam teko lahu. Hiren siyag ane turuk latikip ane fahet napeleg aruhu fug. Anden nungge fahet siyahap enepmin ulug nindi wat ta fug angge hiren siyag ane turuk latikip ane wirim toho alem angginon hunubam umbuhuk. An HINIKNI suwon Allah inowen nele uruk lahi,” irisi.

¹⁵Irisireg NINIKNI Allahn an nubam nin ele uruk lit,

¹⁶”Hat ap kinangmon, Anden hat huhe hindi reg lahenon taluk habuhukmu welahi ulug turukmen war aruhu. War aruhumu haren uba yako piya sini uruk lit fong watuk laruhun fug.

¹⁷Aben fong watuk li ununggul asum men unuyug hililip angge men nonggoloho onorohole saloho wereg lit seni naruk hag toho haren turuk laruhun fug, we hebe lebe ruk fug angge heriyeg lit ngesekum turuk laruhun,” ulug hiyag nitisi.

¹⁸Hiyag nitisimu likiya anden ap nele hiyag isarikikmu o hupmu an nuhe war atisi. War atisimu likiyamon Allahn hiyag nitisi ane hikit toho aben fong watuk lit turuk hag toho tuk fug angge welatikik.

¹⁹Fong wabuk fug angge weregma yet niyarusareg aben an nubam enele uruk lit, ”Nungge fahet ari hag toho turuk lahen, hiyag nisimin,” urusa.

²⁰Urusama anden hiyag isaruk lit, ”NINIKNI Allahn an nubam ele uruk lit,

²¹’Israel inap hiyag isamihinon tu: NINIKNI suwon Allah inowen ele ehekon holeg lamek: An nibam ineyon ino hinindi reg lit henehiyeg toho kik waharuk lahep. O aru hahon winama eleg ulug henewelwel taruk lahep angge famen Anden siyahap tuhuk. Siyahap tuhukmu hit hunumalikisi ap angge hiyap angge o Yerusalem embeselug larikibon arimano ap seliyonen unusuhup.

²²Unusuhupmu hol hahupteg Yehezkielen tehekon hikit toho hiren oho uba yako piya sini uruk lit fong watuk lamuhup fug. Aben fong watuk li ununggul asum men unuyug hililip angge men nonggoloho onorohole saloho wereg lit seni naruk hag toho hiren turuk lamuhup fug. Tuk fug angge wereg lit hinindi anggin toho siyag ane turukuk ulug wenggel harukmen eneg hinine eleg aruhumu hit-hit kim-kim atuk lit ngesekum turuk lamuhup.

²⁴Yehezkiel aruwen hit fahet enehangge tehekon hikit toho hiren oho turuk lamuhup. Anden ihiyon teko lahumu hit hinindi anggar atuk lit NINIKNI suwon Allah wereg ulug honoluk aruhu,’ ehek,” ulug hiyag isarikik.

²⁵Ari ulug hiyag isarikikmu Allahn nin an hiyag nutuk lit, ”Hat ap kinangmon welahenon, ap aruma An nibam ineyon ino inindi reg lit enehiyeg toho kik waharuk angge famen An nibam men it unumalikisi men Anden taluk enebuhuk.

²⁶Taluk enebuhuk sambil ino ap misig o Yerusalemen koloweg wilip aruhureg hat hiyag hirik waruhu.

²⁷Hiyag hirik waruhumu hat hambilik larehen hele uk fug teg laruhunon hebeloho husuhumu ap ino men henele uhup. Hat hubam teko lahu ane ariyen Israel inap inindi anggar amag ulug enehangge ari hubam aruhumu iren hat yet hiyahupteg An fahet NINIKNI Allah wereg ulug onoluk aruhu,” irisi.