Read Angguruk Yali YEHEZKIEL 25 Bible Online

YEHEZKIEL 25 - Angguruk Yali bible

YEHEZKIEL 25

¹ NINIKNI Allahn an nubam ele uruk lit,

²”Hat ap kinangmon welahenon, haren Amon inap enengginang fil horohole leko yet hamihinteg alem angginon unubam aruhu ane fahet hiyag isamihinon tu:

³NINIKNI suwon Allah inowen ele urukon tu holeg lamek! An nibam saliyohap turuson men Israel kinang siyahap turuson men Yehuda inap ininggik hele waroho o winama hondog eneplug laruson men fahet henehiyeg haruk lit henele hemet toho uruk lahep.

⁴Ari fahet Anden hit yali fil inap ininggikmu hunumbahakukmu lekman wamuhupteg hit sehelimu o sabo wiroho wereg lit henesuburu men henembohom ag owe men naruk lamuhup.

⁵Anden hiyag isahuk ane hikit toho ap arimanowen hinibam pumbuk suwon Raba inowen enembohom unta foroho lit o pumbuk toron walinggoho werehon arimanowen enembohom kambing domba endetuk lamuhup. Endetukmu yet isahupteg hit hinindi anggar atuk lit An fahet NINIKNI Allah ulug suwaleg ahun ino wereg ulug honoluk aruhu.

⁶An HINIKNI suwon Allah inowen nele uruk lahiyon tu: Israel kinang siyahap turuson fahet hit Amon hinaben henehiyeg haruk lit wasubag sup isalug hininggik tag toho hunuyuhen telim turuk latikip.

⁷Ari fahet Anden hit siyahap henepmin ulug ninggik leho lit ap o pumbuk winon ininggikmu hunumbahakukmu wamuhupteg hit mondabi elehap henebuhup. Elehap henebik waharukmu yet isahupteg hit hinindi anggar atuk lit An fahet NINIKNI Allah ulug suwaleg ahun ino wereg ulug honoluk aruhu,” irisi.

⁸ NINIKNI suwon Allah inowen ele urukon tu, ”Moab inaben enele uruk lit, ’Yehuda inap arimano o pumbuk winon hag atusa,’ ulug apmayap eneptuk.

⁹Ari fahet Moab inap inibam pumbuk fanowon tom fene werehon ununuk Bet-Yesimot men Baal-Meon men Kiryataim men ap seliyon ininggikmu umbuhukmu

¹⁰yali fil inap wamuhupteg Amon inap inibam ilmig tahup hag toho Moab inap inibam arimano oho ilmig til kuhup. Kuhupmu ap misihen oho Amon inap ununuk fahet wenggel haruk laruhu fug.

¹¹Moab inap alem unubam werehon Anden haloho emberuk lit unusuhukmu inindi anggar atuk lit An fahet NINIKNI Allah ulug suwaleg ahun ino wereg ulug onoluk aruhu,” irisi.

¹² NINIKNI suwon Allah inowen ele urukon tu, ”Edom inap arimanowen Yehuda inap ayeg waroho unusul ulug onolok ane anggolo unubam turuk lit alem angginon unubamap tarusa.

¹³Ari fahet Anden Edom inap mondabi elehap enebuhuk ulug ninggik leho lit o pumbuk Teman famen tulug o Dedan fam abet wamet karog fam elehap enebil laruk lit inibam obog toho halog tuhuk ulug An HINIKNI suwon Allah inowen nele uruk lahi.

¹⁴Anden Edom inap ayeg waroho unusimin ulug numalikisi Israel inap mon enebik waruhukmu iren An nindimu inahan turuk lit nolok haruk lahi ane hikit toho unubam turuk lamuhup. Ari roho tuhupmu Edom inap arimano inindi anggar atuk lit Allahn nit ayeg waroho nunusuruk ulug onoluk aruhu. An HINIKNI suwon Allah inowen nele aru uruk lahi,” irisi.

¹⁵ NINIKNI suwon Allah inowen ele urukon tu, ”Filistin inap arimanowen Yehuda inap men indamet angge tog aptukmen eneg inirim anggolo haruk lit ayeg waroho siyahap enebul ulug onolok toho unusuruk latusa.

¹⁶Ari fahet An HINIKNI palimu welahiyonen nele uruk lahiyon tu: Anden Filistin inap ik saho ahik ayegma werehon arimano siyahap enepmin ulug ninggik leho lit it ik alonggenma o Kretan watfag inap arimano obog toho elehap enebuhukmu misig oho welaruhu fug.

¹⁷Iren An numalikisi unusuruk latusa ane fahet nahummu het haruk lit hebeloho unusuhuk. Hebeloho unusuhuk halug Filistin inap inindi anggar atuk lit Yehuda inap INIKNI Allah we tem toho wereg ulug onoluk aruhu,” irisi.