Read Angguruk Yali YEHEZKIEL 26 Bible Online

YEHEZKIEL 26 - Angguruk Yali bible

YEHEZKIEL 26

¹Nit o Babilonia kinang fam nunumbahik waharusa sambilen mo ilig am wirig am turukmen nanggolobenam larisimu pikalem keron inam atisi sambil NINIKNI Allahn an nubam ele irisiyon tu,

²”Hat ap kinangmon welahenon, o Yerusalem siyahap turusa ane fahet o Tirus inaben enehiyeg haruk lit, ’O unuk salikap toho sok ap o pumbuk obog toho kurukon suwaleg ambeg ino halog toho siyahap turusama at anggengge nit amuhuk. Nit amuhukteg tung ninap welamuhuk angge famen o Yerusalem ino halog toho lin uhu,’ ulug abug uruk.

³Ari fahet An HINIKNI suwon Allah inowen nele uruk lahiyon tu: Anden hit Tirus hinap men seliyap heneptuk lit ap o pumbuk anggolo henembeg mon enebik waruhukmu ik haglabut warik waharuk hag toho hunusik wamuhup.

⁴Wamuhupteg elehet o Tirus walinggoho ohowonet o yaron wirihonet halog tuhupmu Anden kinang obog toho sabog toho hik isahukmu helep eneg welaruhu.

⁵Helep eneg werehen ikan watuk inaben ikan watuk asum le ruruk ambeg hag aruhu ulug An HINIKNI suwon Allah inowen nele uruk lahi. O Tirus inap enenggengge arimano ap o pumbuk anggolowen huhulangge hilahupteg

⁶ap o pumbuk toron walinggoho werehon pinggi unusuhup. Unusurukmu yet isahupteg Tirus inap arimano An HINIKNI Allah fahet inindi anggar aruhu,” irisi.

⁷Irisireg NINIKNI suwon Allah inowen nin ele uruk lit, ”O Tirus siyahap tik lahun ulug ik eleruk filen Babilonia inap onowe Nebukadnezar ap suwon obog toho enemberimu werehon ino monde fuhukmu otsi anggolo men wamuhup. Otsi minggiroho winon enembohom kuda fam lahalug waharuk lit winon kereta wam kudan lisoho laruk angge fam lahalug wamuhup.

⁸Wamuhupteg o pumbuk toron walinggoho werehon pin halog toho siyahap tuhupteg o Tirus walinggoho kilap enebik lalug elehet o ino huk toho kilabehon fene kinang hop til lahakup. Laharukmen ap seliyonen nunusuhup tohon ulug ununggulmu tog piyabangge langguk toho laharuk lit

⁹halog turuk angge fam elehet ino halog tuhupteg kik turuk angge fam o yaron arimano oho fiyog tuhup.

¹⁰Fiyog tuhupteg enembohom kuda anggolo emberimu lahalug waharuk lit unuyuhen kinang sobil waharukmu aheyen hit hondo heneptuk laruhu. Hondo henesugmu ap seliyon arimano elehet fam sok wirihon halog toho pin kurukmu enembohom unuyug men kereta menen eneplohok hum toho tuhuben elehet yuk tuhu.

¹¹Yuk tuhumu kebunggalem obog toho wam unuyuhen sabelebap tubusuhup. Tubusuhupmu hit Tirus hinap pinggi hunusuhupmu helep uwag hit hinindi winik-wonog angge ruruk lit witil laharikibon arimano fele roho lin isahup.

¹²Lin isahupmu henenggengge men aben tohon ayeg waroho hilalug waharuk latikip angge men huhulangge hilaruk lit hinibam fanowon men elehet walinggoho ohowon men halog tuhup. Halog tuhup angge helebet eyet ikma hik isahup.

¹³Hik isarukmu hit henehiyehen pinggong watuk lit henele hi roho sini yunggultuk lahebon Anden elehap tuhuk.

¹⁴Elehap tuhukteg hit hinibam pumbuk ino siyahap tuhukmu helep eneg welaruhu. Helep eneg werehen ikan watuk inaben ikan watuk asum le ruruk lamuhup ambeg ino aben nin hebeloho wiri fuhup fug ulug An HINIKNI suwon Allah inowen nele uruk lahi,” irisi.

¹⁵Irisireg NINIKNI suwon Allah inowen Tirus inap unubam nin ele uruk lit, ”Ap seliyonen hunusurukmu hiren ya nga ulug mako wamburuk lit heneplohok tulungum tuhupmu ap yatma ik alonggenma werehonen hol hisahupteg enekolen unuwag elek turuk lamuhup.

¹⁶Ari roho turukmu ap suwon-suwon ik saho ahik walinggoho werehon arimano lehoma hur atuk ambehen wambuhupteg enesum selmon men hesenggengge palehon men nonggole fuhupteg inindi yuwag am fug angge hit hunubam teko lahuwon fahet enekolen elek-elek angge ruruk lit kinangma heriyeg lamuhup.

¹⁷Heriyeg lit hit hunubahet piya sini uhubon tu, ’Hit hinibam pumbuk ino ik saho ahik sehelimu ine roho wirig latisimu aben o Tirus unuk palimuwap turuk latusa. O ino mondabi siyag atisi! Indam o Tirus fahet ap ik ayegma werehon obog tohowen enekol haruk latusa.

¹⁸Ketiya hit hinibam ino mako wamburuk lit eleg atisi ane fahet ap ikanggen fam werehon arimano enekolen elek-elek angge ruruk,’” irisi.

¹⁹Irisireg NINIKNI suwon Allah inowen o pumbuk Tirus fahet nin ele uruk lit, ”Anden hat siyahap habuhukmu ap enele teng uhup. Ik humon yenggeltil laharuk lit hondo habukag ulug Anden monde fik waruhuk.

²⁰Monde fik waruhukteg hat ap atam war atfahon enembeg welaruhunen kinang apma pilap habuhukmu ap warehon men o pumbuk indam halog toho lin uruk latfahon men iniraham welaruhun. Ap onolukon wereg ambeg suhuloho lahuk fug angge kinang apma weregman eneg fobik oho aben hat hundama inibam wit taruk lit welamuhup fug.

²¹Anden hat siyahap habuhukon fahet aben hol hahupteg enekol anggolo haruk lamuhup. Iren hat yami habuhup angge famen hat mondabi eleg laruhunmu hiyag habuhup fug,” ulug NINIKNI suwon Allah inowen ele irisi.