Read Angguruk Yali YEHEZKIEL 27 Bible Online

YEHEZKIEL 27 - Angguruk Yali bible

YEHEZKIEL 27

¹ NINIKNI Allahn an nubam ele uruk lit,

²”Hat ap kinangmon welahenon, o pumbuk Tirus fahet piya sini imihin!

³O Tirus saho ahik ahum ke larukon fahet sok hag toho wereg lit o pumbuk ik ayegma werehon anggolo enenggengge ayeg waroho hilarukon fam imihinon tu: NINIKNI suwon Allah inowen ele urukon tu holeg lamin! Haren hele hemet toho uruk lit, ’An nebe mondabi tuhum welahi,’ uruk latikin.

⁴Hat kou ik ahum pali ke laruk angge fano anggolowon hag toho wit haptusama iken waling hasug latisi.

⁵Hat hebe e mur ineyon tom Hermon famen walug waharuson fam wiri hubahalug e sahi yaron tom Libanon famen walug waharuson kou pulmu hutuk teberusa.

⁶E wali o Basan werehon fam kou waruk angge wituk lit e wali ikanggen Siprus famen walug waharuson fam pila witusa. Pila ino fene hesenggengge melei fam warusa.

⁷Kou ino homhomowen walug laruk laruhu ulug sum il hik toho yihikon o Mesiren hilaruson e kou pulmu hutuk teberuson famen tuhuloho pilabeg latisi. Sum ino fene hesenggengge ohoma aben yet haruk lit Tirus inaben tohon ulug onoluk atusa. Sum wiyuk anggen men mut men palehon ikanggen Elisa famen walug waharuson fam kou ino ungga saltusa.

⁸Hat humalikisi Tirus inap inindi anggat teg lit kou ino senegma o Sidon inap men Arwad inap menen e fam ik il watuk lit kou ino waruk latusa.

⁹O Gebal inap onowesi roho werehon men inindi anggat tehon menen ik kou elma kuhu rohon ulug e siyag atuk ambeg haltuk latusa. Hat ari hag toho weregma ap o kema-kema werehonen nungge-nungge onggo paloho ayeg waroho hulul ulug kou fam ik saho ahik keyen hambeg waharuk latusa.

¹⁰O Persia inap, Lud inap, Put inap menen hat fahet tog aptuk latusa. Tog aplug sum ununggulmu langguk turukonet enesing wan turukonet nonggoloho aben eneliliyangge lahaptuk hag toho hat hibam ubahat fene sukni ferusa.

¹¹O Arwad inap men hat humalikisi sehen senehon men ambiyeg elehet hibam walinggoho ohowon fene unduhukmu o Gamad inap arimano o yaron fam lahalug ap seliyon yet enesug latusa. It arimanowen enesing wan turukon nonggoloho elehet fene po ril laharuk lit o Tirus ino mondabi fanowap turuk latusa.

¹²Haren fano-fano angge anggolo foroho latikinmu o Tarsis inaben haren angge ayeg waroho hilaruk lit ili ruruk angge perak men, ine angge besi men, anggin angge timah huluwon singon men og hutuk latusa.

¹³O Yunani inap, Tubal inap, Mesekh inap menen haren angge ayeg waroho hilaruk lit tembaga ineyon fam wirig angge men hamingmingangge welamuhubon ulug ap men og hutuk latusa.

¹⁴O Bet-Togarma inaben haren angge ayeg waroho hilaruk lit wam kuda ap lahalug larukon men, wam kuda kereta lisoho walug larukon men, wam bagal men og hutuk latusa.

¹⁵O Rodos inap men o kema-kema ik ayegma werehon menen haren angge ayeg waroho hilaruk lit melei men e sahi men og hutuk latusa.

¹⁶Haren fano-fano angge anggolo foroho latikinon winon o Edom inaben ayeg waroho hilaruk lit helep il mut palehon hahon men, helep ili faya rurukon winon men, melei men, hekel polu fam palehon men, sum wiyuk anggen, mut, polu men fam palehon men, sum il sulumon kindik hein fam yihikon men og hutuk latusa.

¹⁷O Yehuda inap men Israel inap men haren angge ayeg waroho hilaruk lit roti anggen men, amben fano angge men, kin ahaluwe men, e zaitun ahaluwe men, e ahaluwe ap hihir eneptuk angge men og hutuk latusa.

¹⁸Haren fano-fano angge anggolo foroho latikinon winon o Damsyik inaben ayeg waroho hilaruk lit ik anggur o Helbon yahowon ahaluwe men, wam domba o Sakhar forohowon onoruk men og hutuk latusa.

¹⁹O Uzal kinangma werehon Wedan inap men Yawan inap menen haren angge ayeg waroho hilaruk lit besi ineyon fam wirig angge men amben fano angge men og hutuk latusa.

²⁰O Dedan inaben haren angge ayeg waroho hilaruk lit wam kuda fam lahalug heriyeg ambeg fahet sum fanowon og hutuk latusa.

²¹O Arab inap men o Kedar kinang seneg inap menen haren angge ayeg waroho hilaruk lit wam kambing domba yuhambukon unumaliket og hutuk latusa.

²²O Syeba inap men Raema inap menen haren angge ayeg waroho hilaruk lit e ahaluwe amben fano anggolowon men helep ili faya rurukon eke hag eke hag men emas ili rurukon men og hutuk latusa.

²³O Haran inap, Kane inap, Eden inap, Asyur inap, Kilmad inap menen oho haren angge ayeg waroho hilaruk lit

²⁴sum fanowon wan turukon men, sum wiyuk anggen fam palehon men, sum il yinggirik-yenggereng urukon men, sum pilama tuwaltukon men, kumbi ineyon men og hutuk latusa.

²⁵It obog tohowen ayeg waroho og hutuk latusa angge arimano kou humon ik ahum pali keyen laruk angge fam hambeg walug waharuk latusa. Walug waharukmen eneg hat ik saho ahiken waling hasugmu kou ik ahum pali ke laruk angge hag toho welatikinon hundama hanggengge anggolowen keleg atisi.

²⁶Keleg atisimu hotsiyen e fam ik il watuk lit ik saho ahik pulmu og haplug larusa. Larukmen siyelu yali filen waharuk lit hat halog haptisi.

²⁷Halog haptisimu hat ik ahummu wambirikinmu mun angge man angge haren tohonet aben ayeg waroho og hutuk latusa anggeyet hotsi kou ino senehon men, e siyag atuk ambeg haltukon men, hanggengge ap ayeg waroho og isarukon men, sehen senehon hat windat haplebon men humalikisi obog toho men ik ahummu ubuk irikip.

²⁸Ubuk uruk lit hotsi kou senehon arimano enekolen enele ngik-ngog urusama kinang ik walinggoho werehon yuk-yuk angge ruruk latisi.

²⁹Yuk-yuk angge rurukmu kou seneg inabet e fam ik il watuk inabet obog toho hat humbahalug ik ilanma larusareg

³⁰hat fahet inindi siyahen onoruk paloho ununggul ahap eneg tebelug fesi enebene lahaptusareg enele hi roho uba yatuk lit ul ke imbil-ambal uruk.

³²It arimanowen hat fahet piya sini uruk lit, ’O Tirus iken walinggig ambeg inowen ap enele teng urusa hag toho o winon wereg ano?

³³Indam haren mun angge man angge foroho latikinon ik ahum pali ke walug laruk lit ap ayeg waroho og isaruk latikin. Og isaruk latikin angge arimanowen o pumbuk anggolo keleg atusama onowesi suwon tung atusa.

³⁴Ketiya hat halog haptusama hat hebeyet mun angge man angge haren foroho latikinonet humalikisi obog tohowet ik ahummu ubuk irikip.

³⁵Ubuk urukmu ap ik ayegma werehon obog toho inil heneko yet hiyaruk latusa. Onowesi enekolen enemenderuk ambo misig-misig angge ririsimu homhombuk turuk latusa.

³⁶Hubam tirisi ane fahet hol hahupteg aben angge ayeg waroho hilaruk inap o kema-kema werehonen wasubag sup isaruk lit hinggaliyap haptuk lamuhup. Hat mondabi eleg atikin ane fahet hol haruk lit aben yuk lagmag uruk lamuhup,’ ulug piya sini uruk,” irisi.