Read Angguruk Yali YEHEZKIEL 28 Bible Online

YEHEZKIEL 28 - Angguruk Yali bible

YEHEZKIEL 28

¹NINIKNI Allahn an nubam ele uruk lit,

²”Hat ap kinangmon welahenonen o Tirus inap onowe suwon hiyag itmihinon tu: NINIKNI suwon Allah inowen ele urukon tu holeg lamin! Hat Allah hag toho welahen fug, we ap kinangmon welahen angge famen hinggarehen palimuwap taruk lit, ’An Allah welahireg aben nunumbasi ulug wel eneptukon arimano lehoma heriyeg hag toho an oho ik ahum pulmu heriyeg lahi,’ uruk lahen.

³Daniel indi anggat teg latfag fugmu hat eneg hindi anggat toho wereg lit alem hirahowon oho holuk teg lahen.

⁴Mun ane man ane fuki roho wenggel haruk lit umbagpag turuk angge emas men perak men haren angge winon foroho lahen ambeg imbik kurukmen eneg tung atikin. Mun angge man angge onggo paloho ayeg waroho hilaruk lit tung atikinteg nine roho welahi ulug winik-wonog angge ruruk lahen.

⁶Ari fahet NINIKNI suwon Allah inowen ele urukon tu: Haren Allah hag toho welahi ulug palimuwap taruk lahenma

⁷Anden ap o winamon onolok anggolowon henembeg mon enebik waruhukmu karog ininggikmu seneko wamuhupteg hat indi anggat teg lit fano-fano angge ayeg waroho hilarikin angge obog toho siyahap tuhupmu umbagpag turuk lahen ane eleg aruhu.

⁸Eleg aruhumu hat ik pulmu welahenon huwabuhupmu kinang apma ap warehon wereg ambeg wambuhun.

⁹Huwabul ulug wamuhubon onolohotman haren Allah hag toho welahi uhun ano? Hat huwabuhubon ininggikmu welaruhunmu ap kinangmon welahen ane ino inam aruhu.

¹⁰Ap o winamon arimanowen huwabuhupmu hat ap enembilahap paleg elehon war atuk hag toho war aruhun. An HINIKNI suwon Allah inowen nele aru uruk lahi,” irisi.

¹¹NINIKNI Allahn an nubam ele uruk lit,

¹²”Hat ap kinangmon welahenonen o Tirus inap onowe suwon fahet piya sini imihinon tu, ’NINIKNI suwon Allah inowen ele urukon tu holeg lamin! Hat hindi anggat teg lit hebe fano rehen aliliyangge mondabi fanowon hag toho welatikin.

¹³Indam haren sum fanowon wan teg lit Allah angginang Eden fam welatikin. Sum ino fam helep ili faya rurukon eke hag eke hag topno reg latusa. Helep itano il ip orohole hahon, il puhulik palehon hahon, il ik wirik anggolowon hahon, il polu palehon hahon, il singon yanggowon altap tohon, sili umbagpag turukon, il piyanu palehon hahon, il mut palehon hahon, il sing pohol hahon men topno reg latusa. Sum inowet aliliyangge emas umbagpag turukonet Anden wal haptikik sambil ino hat fahet emberusa.

¹⁴Emberusama Anden hat hiyag hutuk lit not malaikat An nangginang forohowon ino iraham welaruhun ulug hiyag hitikikmu hat An nantom fam wereg lit helep indok ambulpul turuk hahon sehelimu la wam turuk latikin.

¹⁵Hat wal haptikik sambilen tulug siyag ane tuk fug angge fano roho welatikin angge famen fobik siyag ane turukon ak tirikin.

¹⁶Haren aben angge ayeg waroho hilamin ulug holok ane unubam turuk lit siyag ane anggolo turuk latikin. Ari fahet An nantom embeselug wilip amin ulug hiyag hitikikmu malaikat inowen hat helep indok ambulpul turuk hahon sehelimuwen yanggal haptisi.

¹⁷Hat hebe fano welatikin ane ariyen norohole fano ulug winik-wonog angge ruruk latikin. Tung atikin ane ariyen hat hindi nin atisi. Nin atisimu Anden hat siyahap haptukmu ap suwon-suwon arimanowen yet hiyawag ulug hat kinangma hik hiya wambirikik.

¹⁸Haren mun angge man angge aben tohon ayeg waroho hilamin ulug siyag ane til-wil noruk lit o fanowon sembahyang uruk latikin ibam arimano siyahap turuk latikin. Siyahap tirikin ane ari fahet Anden hat hibam pumbuk pulmuwen indok hum toho munggaltikikmu hat hinarisi. Hat hinarisimu ap hat hambeg waharuk lit yet harukmen ul eneg weregma yet haruk.

¹⁹Ap o pumbuk walinggoho werehon hat indam welatikin ane onoluk atuson arimanowen hat mondabi eleg atikin ane yet haruk lit alem ari hahon nunubam aruhu rohon ulug enekol haruk,’ imihin,” ulug hiyag nitisi.

²⁰ NINIKNI Allahn an nubam ele uruk lit,

²¹”Hat ap kinangmon welahenon, haren o pumbuk Sidon fil horohole leko yet hamihinteg alem angginon ubam aruhu ane fahet hiyag itmihinon tu,

²²’NINIKNI suwon Allah inowen ele urukon tu holeg lamin! Hit o Sidon hinap An men seli roho welamuhuk. Hiren siyag ane turuk latikipmu An nebe usa fulu reg lahiyonen alem angginon hunubam emberukmu aben yet niyahupteg An nubahet NINIKNI Allah wereg ulug onoluk aruhumu An nunuk palimuwap naptuk lamuhup.

²³Anden ouk alem suwon men ap seliyon men hunubam monde fik waruhukmu o kema-keman wamuhupteg karohen hunusuhubon hinibam pumbuk ke lin-lan urukmu kalem laruk ke ap warehen eneg keleg aruhu. Anden ari roho hunubam turukmu yet niyahupteg An nubahet NINIKNI Allah wereg ulug honoluk aruhu.

²⁴Ari obog toho teko lahumu ap seliyon Israel inap walinggoho werehonen inda yako apmayap eneptuk lit alohen hak eneptuk ane eleg aruhu. Eleg aruhu ane ariyen Israel inap arimano NINIKNI Allah wereg ulug onoluk aruhu.

²⁵An HINIKNI suwon Allah inowen nele uruk lahiyon tu: An nebe usa fulu reg lahiyon ap o pumbuk obog toho iniline inam atuk lit An numalikisi Israel inap arimano o pumbuk kema-kema hik-hak isarusa ambehen palu enebuhukteg hondog eneplug waruhukmu inindi yuwag toho kinang An namingmingangge Yakub og itik iyahon fam wereg lit

²⁶inibam men anggur yabuk men wit taruk lamuhup angge famen ap o pumbuk walinggoho werehon it inda yako apmayap eneptukon arimano Anden alem angginon unubam umbuhuk. Umbuhuk ane ariyen Israel inap arimano Allah NINIKNI wereg ulug onoluk aruhu,’ imihin,” irisi.