Read Angguruk Yali YEHEZKIEL 29 Bible Online

YEHEZKIEL 29 - Angguruk Yali bible

YEHEZKIEL 29

¹Nit o Babilonia kinangma weregman eneg mo ilig am wirig am turukmu numenam larisimu pikalem numenon fam hup nisanggowen atisimu NINIKNI Allahn an nubam ele uruk lit,

²”Hat ap kinangmon welahenon, haren o Mesir inap onowe suwon wereg fil horohole leko yet hamihinteg at men umalikisi obog toho men alem angginon unubam aruhu ane fahet hiyag itmihinon tu,

³’NINIKNI suwon Allahn ele urukon tu holeg lamin! Hat Mesir inap onowe suwon welahenon An men seli roho welamuhuk. Hat manu humon hahik ahum pulmu yinggig lahenonen hele uruk lit, ’Ik Nil aru anden wal tiyag angge re an ngi reg lahi,’ uruk lahen.

⁴Ari uruk lahenma Anden hat hiyahundema ayeg angge fam hak toho lit haplug hat hebeyet ik ahummu wereg angge hahapma topno rehonet hahik ahum pulmuwen wilip habik waruhuk.

⁵Wilip habuhukteg hat hebeyet ik ahummu wereg anggeyet lekma hik hiyahukmu aben hat kinangma sal habuhup fugmu Anden olomene men suwe menen hinawag ulug og isahuk.

⁶Og isahuk ane ariyen Mesir inap obog tohowen An HINIKNI Allah nubahet we tem toho wereg ulug onoluk aruhu. Israel inaben hat fahet wenggel haruk lit nit fahet fili tomuk toho larukon hag toho wereg peruk latusa angge famen

⁷fili ino tomuk toho larukmen si ruruk lit unumaloma hak eneptukmu fuk toho wat tarukon hag atikin.

⁸Ari fahet An HINIKNI suwon Allah inowen nele uruk lahiyon tu: Anden hat ap seliyon ininggikmu humbahakukmu humalikisiyet hambohomet obog toho unusuruk lit

⁹o Mesir kinang atogman atogma siyahap tuhupmu ap enele teng uhup. Ari roho teko lahu ane ariyen Mesir inap An HINIKNI Allah nubahet we tem toho wereg ulug onoluk aruhu. Haren hele uruk lit, ’Anden ik Nil wal tiyag angge re an ngi reg lahi,’ uruk lahenma

¹⁰Anden hat hebeyet hahiket hangginanget siyahap habuhukmu o Migdol famen tulug o Siene fam o Etiopia kinang hili-hilimu oho lekma hag aruhu.

¹¹Lekma hag aruhumu Anden Mesir inap arimano o kema-kema hik-hak isahuk. Hik isahukmu o Mesir kinanget pumbuket Anden siyahap tuhukon arimano o pumbuk walinggoho werehon men enengginang men siyahap turuk lamuhubon hag toho welamuhup. O arimano abet wamet laruk lamuhup fugmu ap misihen oho ibam wit ta fug angge weregman eneg mo ilig am wirig am turukmu teng misigmen nubam hilag nuwalen 40 aruhu.

¹³An HINIKNI suwon Allah inowen nele uruk lahiyon tu: Mo teng misigmen nubam hilag nuwalenam lahumu Anden Mesir inap arimano o pumbuk kema-kema hik isahuk ambehen palu enebuhuk.

¹⁴Palu enebuhukteg ap aruma hebeloho fanowap enebuhuk ulug indam yug toho welatfag ambeg o Patros kinang fam hondog eneplug waruhukmu hinibam yugmu welamuhup. Iren o pumbuk winon apmayap enebuhup tohon ulug Anden inine elehap enebuhukmu inine mondabi elehen o pumbuk winon onowesiyen sen enesuhon men wirim teg lamuhup fug.

¹⁶Wirim teg lamuhup fugmu yet isahupteg Israel inap inindi anggar atuk lit o Mesir inaben ili og nenebik wamuhup ulug saplangge wenggel haruk latukuk ulug onoluk aruhumu Mesir inaben oho An nubahet NINIKNI suwon Allah wereg ulug wenggel haruk lamuhup,’ imihin,” irisi.

¹⁷Nit o Babilonia kinang fam weregman eneg mo ilig am wirig am turukmu teng misig atisimu pikalem tamon ket inam atisi sambil ino NINIKNI Allahn an nubam ele uruk lit,

¹⁸”Hat ap kinangmon welahenon, Babilonia inap onowe suwon Nebukadnezar inowen o Tirus inap apmayap enebuhup ulug umalikisi hiyag isarisimu o Tirus pin kuhuk ulug lisag toho wal harukmen ununggul oruk het-het larisimu unumalo hokum turuk latisi angge famen saplangge turuk latusa.

¹⁹Ari fahet An HINIKNI suwon Allah inowen nele uruk lahiyon tu: Nebukadnezar umalikisi menen Anden hiyag isarikik ane hikit toho o Tirus pin kuhuk ulug wal harusa. Wal harusa ane ino fahet onggo og isamin ulug o Mesir kinang ino Nebukadnezar inggikmu emberuk lahi. Emberuk lahimu aren mun angge man angge fanowon Mesir inaben tohon wahureg umalikisi onggo og isahu. An HINIKNI suwon Allahn nele aru uruk lahi.

²¹Ari roho tuhuk li Anden Israel inap arimano nin hebeloho inineyap eneptuk lit haren oho hakol eleg toho hele hiyag isaruk laruhunen let habuhuk. Let habuhuk ane ariyen Israel inap inindi anggar atuk lit NINIKNI Allah wereg ulug onoluk aruhu,” irisi.