Read Angguruk Yali YEHEZKIEL 3 Bible Online

YEHEZKIEL 3 - Angguruk Yali bible

YEHEZKIEL 3

¹Yet harikikmu Allahn an nubam ele uruk lit, ”Ap kinangmon welahenon, suwesingga yet haruk lahenon aru namihinteg Israel inap unubam hele hiyag isahunen lamihin!” ulug hiyag nitisi.

²Hiyag nitisireg an nambilik ila regma suwesingga ino nawag ulug og nitisi.

³Og nutuk lit, ”Ap kinangmon welahenon, suwesingga yinggilohon og hutuk lahiyon aru namihinmu hahummu welaruhu,” irisimu anden suwesingga ino narukmu kin ahaluwe unduk fano hag latisi.

⁴Unduk fano latisimu Allahn nin eke ele uruk lit, ”Ap kinangmon welahenon, lamihinteg Israel inap unubam An nele hiyag isaruk laruhun.

⁵Hat hinggareg hori wereg ambeg mon haptuk lahi. Ap o winamon enembilik anggen anggin toho wereg lit enele enemu ane urukmu holehen ha fug teg ambeg mon haptuk lahi fug. Anden it enembeg mon haplema hat hele holtep angge famen

⁷Israel inap arimano ununggul haro rehen Allah ele holuhuk fug peruk lit hat hele oho holtuk lamuhup fug.

⁸Ketiya it ununggul haro reg hag toho Anden hat hunggul harowap tuhukmu hat hindi wirik toho wereg lit it arimano apmayap enebuk teg laruhun.

⁹Aben helep sili fahet ine peruk angge famen ine elegma Anden hat hindi wirikap habuhukmu hat hindi mondabi ine aruhumu An nele ying naptuk inap arimano fahet hakolen hindi yuk turuk laruhun fug,” ulug hiyag nitisireg

¹⁰nin eke hiyag nutuk lit, ”Ap kinangmon welahenon, Anden hiyag hutuk laruhukon fuki roho holtuk lit hindimu fano roho foroho laruhun!

¹¹Hori ininggik hele waroho hik isaruson wereg ambeg lamihinteg An HINIKNI suwon Allah nele haren it hiyag isaruk laruhun. ’Nele holuhup ano, holuhup fug ano,’ ulug wenggel haruk laruhun fug!” ulug hiyag nitisi.

¹²Hiyag nitisimu Allah ahime fanowon inowen an kinangman leho nubaharukmu itano anden nambol filen hol harukmen Allah umbagpag turukon ino inam atisi ambehen poholma laharuk lit aplohok hum toho urukon holtikik.

¹³Aplohok ino onoluk wereg angge itano eneherabul ekeyen eke fam ahandip atukon men, imbiloho laruk angge itano menen o mek turukmu ele humon uruk hag toho eneplohok turuk latusa.

¹⁴Ari turukmu Allah ahime fanowon inowen an leko og naptuk latisi. Og naptukmu Allah inggiken ine roho an sen naptuken an nindi yuwag toho welam fug angge nal ke sig turuk latisi.

¹⁵Ari turukmu Yehuda inap ininggik hele waroho hik isarusa ambeg ik Kebar ayegma o Tel-Abib waharikik. Waharikikteg nindi angginen lebe ruk fug angge it sehelimu weregman eneg o sabirenam atisi.

¹⁶O sabirenam welatikikmu NINIKNI Allahn ele nubam uruk lit,

¹⁷”Nare, hat ap kinangmon welahenon, Israel inap fahet kahal enesug laruhun ulug unduhuk hubaharuk lahi. Anden it siyag amuhup tohon ulug hiyag hutuk laruhukon haren An nunuk fam hiyag isaruk laruhun.

¹⁸Anden ap misig siyag ane turukon fahet war amag ulug nele uruk laruhukmu haren ap ino ubam, ’War aruhun tohon siyag ane turuk lahenon umbusuhun,’ ulug komo ruruk laruhun. Komo ruruk laruhun fug halug ap ino inggarehen siyag ane turukon ariyen war aruhu angge famen Anden, ’Nungge fahet komo ririkin fug?’ ulug hat hubam alem angginon emberuk laruhuk.

¹⁹Haren ap ino komo ruruk laruhunmu aren hele holuk fug angge siyag ane turukon ino umbusuhu fug halug inggarehen siyag ane turukon inowen war aruhu angge famen hat hinggareg windat taruk laruhun.

²⁰Ap ubabut fanowon misihen fano ane turukon embeselug siyag ane turukmu Anden ap ino siyag amag ulug yebangge reberuk laruhukmu haren at ino komo ruruk laruhun fug halug war aruhu. Ap inowen tam fano ane turukon fahet Anden wenggel haruk laruhuk fugmu at ino inggarehen siyag ane turukon ariyen war aruhu angge famen Anden, ’Nungge fahet komo ririkin fug,’ ulug hat hubam alem angginon emberuk laruhuk.

²¹Haren ap ino ubam, ’Siyag ane turuk lahenon umbusuhun,’ ulug komo ruruk laruhunmu hele holuhureg fobik siyag ane turuk laruhu fug halug at ino war aruhu fugmu hat oho hinggarehen windat taruk laruhun,” ulug Allahn hiyag nitisi.

²²NINIKNI Allah inggik ineyonen sen naptisireg Aren hiyag nutuk lit, ”In atug lamihinteg hat hubam nele hiyag hitminen tonggoma wambimihin,” ulug hiyag nitisimu

²³an in atug tonggoma wambirikikteg yet harukmen NINIKNI Allah umbagpag turukon ino atam ik Kebar ayegma inam atukmu yet harikik hag toho tonggoma inowen oho inam atisi. Inam atukmu norohole sahung toho ying atikik.

²⁴Ying atikikmu Allah ahime fanowon an nubam atuk lit unduhuk nubaharisireg NINIKNI Allahn an nubam ele uruk lit, ”Hibam lamihinteg sok laroho olma welaruhun.

²⁵Hat ap kinangmon welahenon hinggik hele waroho hibam wereg lit wilip atug ap sehelimu welam fug teg laruhun.

²⁶Anden hat hambilikanggen hele lam-lamma topno tubuhukmu hat hele uk fug tehen it An nele ying naptukon arimano komo eneptuk laruhun fug.

²⁷Ari roho welaruhunmu fobik Anden hat hubam nele uruk lit hambilik husi fuhukmu An HINIKNI suwonen uruk laruhukon haren it arimano hiyag isaruk laruhun. It arimanowen An nele ying naptuk lit werehen san Allah ele holmin peruk halug holtuk laruhu, san holmin fug peruk halug holtuk laruhu fug,” ulug Allahn ele irisi.