Read Angguruk Yali YEHEZKIEL 30 Bible Online

YEHEZKIEL 30 - Angguruk Yali bible

YEHEZKIEL 30

¹NINIKNI Allahn an nubam ele uruk lit,

²”Hat ap kinangmon welahenonen An nunuk fam Mesir inap hiyag isamihinon tu: NINIKNI suwon Allah inowen ele uruk lit, ’Henekolen henele ya nga uruk lamek! NINIKNI Allahn alem obog toho kong tuhu sambil horog teg.

³O ino sambil hina singonen eneg hondo reg laruhumu NINIKNI Allahn o pumbuk kinang atogman atogma werehon alem unubam umbuhu.

⁴Umbuhu ane hikit toho ap seliyon wamuhupteg o Mesir inap unusuruk lit enenggengge fanowon hilalug inibam halog toho olunap tubusuhupmu Etiopia inap arimanowen hol haruk lit enekol haruk lamuhup.

⁵O ino sambil Mesir inaben onggo fahet nit men tog abik laruk lamuhuk ulug mingming enebuhubon Etiopia inap, Put inap, Lud inap, Arab inap, An numalikisi Israel inap men oho ap seliyon arimanowen unusuhup,’ uruk.

⁶NINIKNI suwon Allah inowen nin ele urukon tu: O Mesir inap inibil atukon arimano obog toho unusuhupmu o Migdol famen tulug Siene fam kinang obog toho ap warehen keleg aruhumu Mesir inap enebe hemet til laruk lit inine roho turuk ane eleg aruhu.

⁷O Mesir pumbuket kinanget siyahap tuhubon arimano o pumbuk walinggoho werehon men enengginang men siyahap tuhubon hag toho welamuhup.

⁸Anden o Mesir kinang harep pisako siyahap turuk lit Mesir inap inibil atukon obog toho elehap enebuhuk ane ariyen Mesir inap An HINIKNI Allah nubahet Allah tem toho wereg ulug onoluk aruhu.

⁹O ino sambil o Etiopia inap inindi yuwag toho weregman enekolap enebik lalihip ulug Anden ap mon enebuhukmu kou fam ik Nil ahum pali keyen enembeg lahupteg o Mesir mondabi siyag atisi ulug hiyag isahupmu enekolen elek turuk lamuhup. O Mesir siyag aruhu sambil ino we tem toho horog teg!

¹⁰An HINIKNI suwon Allah inowen nele uruk lahiyon tu: O Mesir inap enebe hemet til laruk lit inine roho turuk ane elehap tik lahun ulug Anden o Babilonia inap onowe suwon Nebukadnezar hiyag uruhuk.

¹¹Hiyag uruhuk ane hikit toho Nebukadnezar inowen umalikisi men o pumbuk winamon onolok inap men hondog eneplug waruhureg o Mesir kinang harep pisako siyahap turuk lit Mesir inap unusuhup. Unusuhubon arimano lin-lan uhupmu kinang obog toho ap warehen keleg aruhu.

¹²Keleg aruhumu Anden ik Nil ino firihap tuhukteg Mesir kinang seiyon ino siyahap tukag ulug ap o winamon unubabut onolokon ininggikmu umbuhuk ulug An HINIKNI Allahn uruk lahi,” irisi.

¹³NINIKNI suwon Allah inowen nin ele uruk lit, ”Mesir inaben tu Allah hag toho wereg ulug wel eneptuk anggeyet usangge o Memfis werehonet Anden halog toho siyahap tuhukteg onowesi obog toho elehap enebuhukmu unumalikisiyen enekol haruk lamuhup.

¹⁴Anden o pumbuk Patros olunap tuhukteg o Soan harep pisako siyahap turuk lit o Tebe alem angginon ubam umbuhuk.

¹⁵O Sin elehet ineyon walinggoho ohowon ino ubam nolok ane turuk lit o Tebe inap inibam fanowon elehap tuhuk.

¹⁶O Mesir kinangma indok ambulpul turukon munggale fuhukmu o Sin ouken inel-hanel uruk laruhu. O No elehet walinggoho ohowon ino pin halog toho kuhupmu o Tebe inap arimano likiya hupmu ap seliyonen enekolap eneptuk lamuhup.

¹⁷Ap kabiniyon o On men Pi-Beset men werehon pinggi unusuhupmu hiyap arimano hele waroho hondog eneplug lahup.

¹⁸Mesir inaben enebe hemet til laruk lit inine roho turuk ane Anden o Tahpanhes inowen elehap turukmu mo anum pulmu weregman famen hina singon eneg keleg atuk lit o hik kuruwag teng uhu. O hik tegma hiyap hele waroho o winama imbisik lahup.

¹⁹Ari roho o Mesir inaben siyag ane turuk latuson fahet ayeg waroho alem angginon unubam umbuhuk. Umbuhuk ane ariyen An HINIKNI Allah nubahet Allah tem toho wereg ulug onoluk aruhu,” irisi.

²⁰Nit o Babilonia kinangma weregman eneg mo ilig am wirig am turukmu nanggolobenam larisimu pikalem tamon fam hup sabirenam atisimu NINIKNI Allahn an nubam ele uruk lit,

²¹”Hat ap kinangmon welahenon, Anden Mesir inap onowe suwon inggik ineyon fala ririkikmu fano aruhu rohon ulug tahangge rubuhup fugmu nin hebeloho ine atuk lit karog seneg laruhu fug.

²²Ari fahet An HINIKNI suwon Allah inowen nele uruk lahiyon tu: An Mesir inap onowe suwon men seli roho wereg lit inggik fuma oho fala ruhukmu karog inggikmuwen kobog toho wambuhu.

²³Wambuhumu Anden Mesir inap arimano o pumbuk kema-kema hik-hak isahuk.

²⁴Hik isahukteg o Babilonia inap onowe suwon inggik ineyap turuk lit karog Anden tohon og uruhukmu Mesir inap onowe suwon inggik piren sengge regma Babilonia inap onowe suwon alukeman ap karohen watukmu ouken ngi hum uruk hag toho uruk laruhu.

²⁵Anden we tem toho Babilonia inap onowe suwon inggik ineyap tuhukmu Mesir inap onowe suwon inggik ine elehen imbik wamburuk laruhu. Anden Babilonia inap onowe suwon ino karog Anden tohon og uruhukmu Mesir inap unusik lahu halug Mesir inap inindi anggar atuk lit An HINIKNI Allah fahet Allah tem toho wereg ulug onoluk aruhu.

²⁶We tik-tem toho onoluk aruhuwen Anden Mesir inap arimano o pumbuk kema-kema hik-hak isahuk,” irisi.