Read Angguruk Yali YEHEZKIEL 31 Bible Online

YEHEZKIEL 31 - Angguruk Yali bible

YEHEZKIEL 31

¹Nit o Babilonia kinang fam weregman eneg mo ilig am wirig am turukmen nanggolobenam larisimu pikalem hinahanehon ket inam atisi sambil NINIKNI Allahn an nubam ele uruk lit,

²”Hat ap kinangmon welahenon, o Mesir inap onowe suwon umalikisi anggolo sen enesuhon ino ubam hele imihinon tu, ’Hat hine roho welahenon nungge fam wirim timin?

³Hat e sahi yaron tom Libanon fam werehon hag toho welahen. E ino ondomi hina sehelimu laharukmu inggik fano tuwalik laruk lit nungge-nungge alma werehon sakowap turuk.

⁴Ik kinangman lahalug e ino walinggoho laruk lit umanggen ineyap turukmu yat toho laharisi. Ik inowen e walinggoho werehon obog toho ahaluweyap turuk.

⁵Ik inowen ahaluweyap turukmu e inggik anggolo atuk lit yat toho wilibig larukmu ondomi yat toho laharisiyon men e obog toho winon men wirim teg latisi fug.

⁶Suwe obog toho inggikmu ei wirik waharukmu e ino alman wam pak mene menen umalik indag taruk latusa. Ap o pumbuk suwon kema-kema werehon arimano e ino alma sakoma kik waharuk latusa.

⁷Ik anggolowen umanggen ahaluweyap turuken ondomi yat toho laharisiyonet inggik yat toho wilibihonet fano reg latusa.

⁸E ino mondabi fano regma e sahi Allah iyabukmu werehon arimano e ino men wirim teg eleg. E mur inggik men e suwon eke inggik men at inggik hag toho wereg eleg. E An niyabukmu werehon obog toho e ino men wirim teg elegma e ino eneg fano reg latisi.

⁹Anden e ino ineyap tirikikmu e An niyabuk Eden fam werehon obog tohowen e ino yet haruk lit e fanowon ari hahon nit welahe fug ulug inindi siyag atisi.

¹⁰Ari fahet An HINIKNI suwon Allah inowen nele uruk lahiyon tu: E ino yat toho laharisireg ondomi pohol men hunduhuken indimuwen su reg lahi ulug palimuwap taruk.

¹¹Palimuwap taruken Anden e ino fahet nirim haruk lit ap suwon ine roho turukon ekeyen e inowen siyag ane turuk latisi ane wirim toho ubam turuk lamag ulug inggikmu umbuhuk.

¹²Umbuhukmu ap o pumbuk winamon unubabut mondabi onolokon wamuhupteg e ino muhuk fusuhup. Muhuk fusuhupmu inggik kuluk waroho punu ke pule ke fanggong ke lin-lan uruk lamuhup. Lin-lan urukmu ap o pumbuk obog toho e ino alma sakoma kuruk latusa ambeg embeselug lahup.

¹³Lahupmu suwe obog toho e muhuk fusuhubon ino onggokma hur arik waharukmu wam pak mene menen e inggik kuluk waroho lin-lan uhubon arimano sobir isalug laruk lamuhup.

¹⁴Ari fahet e ik ayegma werehon misig oho pohol men hunduhuk laruhuk ulug yat toho lahaku fug. E iken ahaluweyap turukon misihen oho nine roho welahi ulug palimuwap tahu fug. E yaron arimano obog toho aben mutuk lamuhup. Mutuk lamuhupmu ap war atukon hag toho kinang apma wamburuk lamuhup.

¹⁵An HINIKNI suwon Allah inowen nele uruk lahiyon tu: Anden e sahi ino ap warehon wereg ambeg pilabuhukon fahet aben fong watuk hag toho ik kinang apmon firig atukmu ik wirig atukon oho eleg aruhu. Eleg aruhumu tom Libanon inowen oho fong watukmu e obog toho ilim aruhu.

¹⁶Anden e ino pilabuhukmu ap warehon wereg ambeg wamburuk lit aplohok tulungum turukmu hol hahupteg ap o pumbuk obog toho enekolen unuwag elek-elek angge ruruk lamuhup angge famen e fanowon Allah iyabuk Eden fam welatusonet tom Libanon fam welatusonet ik ayegma welatusonet ap warehon wereg ambeg tam wamburuson arimanowen e sahi ino men ambiyeg welamuhuk ulug enehiyeg haruk lamuhup.

¹⁷It obog toho ap karohen unusuruson men ambiyeg weregma ap o pumbuk ekeyon-ekeyon e sahi ino alma welatuson arimano oho enembeg wambik wamuhup.

¹⁸E sahi ino fam wirim toho uruk ane ari Mesir inap onowe suwon umalikisi men enebe hemet til larukon fahet uruk. E sahi fanowon yat toho laharisiyon ino hahon Allah iyabuk Eden fam e winon wereg eleg angge famen e inowet Allah iyabukmu wereg ahen arimanowet ambiyeg ap warehon wereg ambeg pilap enebuhupmu Allah enepeleg inap men karohen unusuruson men enesehelimu yinggig lamuhup ulug An HINIKNI suwon Allah inowen nele uruk lahi,” irisi.