Read Angguruk Yali YEHEZKIEL 32 Bible Online

YEHEZKIEL 32 - Angguruk Yali bible

YEHEZKIEL 32

¹Nit o Babilonia kinang fam nunumbahik waharusa sambilen mo ilig am wirig am turukmen nisanggowen larisimu pikalem nisanggowon ket inam atisi sambil NINIKNI Allahn an nubam ele uruk lit,

²”Hat ap kinangmon welahenon, haren Mesir inap onowe suwon fahet piya sini imihin! Imihinon tu: O pumbuk obog toho sehelimu hat eneg hine roho wereg lit olomene kabiniyon hag toho welahi perikin angge famen manu ik ahummu werehon hag toho welatikin. Hat hambiyangman ik sililim toho wiliptuk lit ik il kul amag ulug huyuhen sabelepma sobir isil laruk latikin.

³NINIKNI suwon Allah inowen ele urukon tu holeg lamin: Anden nasum ikan watukon ino ik ahummu pilabuhukmu hat yuhar aruhunmu Anden hiyag isahuk ane hikit toho ap o pumbuk anggolowen hat ik ahummuwen lisoho wilip habik wamuhup.

⁴Wilip habuhupmu Anden hat anggenma hik hiyahukteg suwe wam pak mene menen hat hinawag ulug og isahuk.

⁵Anden hat hunu wisal-wisal tom fene imbil laruk lit tonggoma oho humbahakukmu keleg aruhu.

⁶Hat hamep kinangen nawag ulug Anden hik isahukmu tom famen ik hul hag toho wambuhu.

⁷Anden hat siyahap habik oho lit pohol hina singonen hondo ruhukmu mo pikalem suhal il hik aruhu.

⁸Asinandi turukon obog toho Anden hikap tuhukmu hat hangginang atogman atogma hik kuruwag teng uhu. An HINIKNI suwon Allah inowen nele aru uruk lahi.

⁹Anden hat humalikisi men o kema-kema pumbuk hiren yet haruk latikip fuhon fam hik-hak hisahuk. Hik hisahuk ane fahet ap o pumbuk anggolowen hol hahupteg inindi anggin toho welamuhup.

¹⁰Anden huwatmin ulug karog leg harukmu yet niyahupteg o pumbuk anggolo ap wal tanehen siyag aruhuk ulug enemelmel eneptukmu onowesi inindi angginen lebe ruk fug angge welamuhup.

¹¹An HINIKNI suwon Allah inowen nele uruk lahiyon tu: O Babilonia inap onowe suwon inowen hunusimin ulug karog seneko henembeg waruhu.

¹²Waruhumu ap o pumbuk winamon onolok anggolowon at ombolim lahubon arimanowen Anden hiyag isahuk ane hikit toho tog enembong se roho aptuk lit hat humalikisi mondoko werehon unusuhup. Unusuhupmu Mesir inap enebe hemet til laruk lit inine roho turuk ane eleg aruhu.

¹³Eleg aruhumu Anden Mesir inap enembohom obog toho elehap enebuhukmu ap unuyug men wam unuyug menen ik naruk ambeg sobir isarukmu ik il kul teg laruhu fug angge famen

¹⁴ik Nil ino il wirik teg lit e zaitun ahaluwe hag toho fano laruk laruhu. An HINIKNI suwon Allah inowen nele aru uruk lahi.

¹⁵Anden o Mesir inap elehap eneptuk lit enengginang siyahap tuhukmu lekma hag aruhumu Mesir inap arimano inindi anggar atuk lit An HINIKNI Allah nubahet tem toho wereg ulug onoluk aruhu.

¹⁶Ari ulug hiyap o pumbuk kema-kema werehon arimanowen Mesir inap onowe men umalikisi enebe hemet til larukon men unubahet piya sini uruk lamuhup. An HINIKNI suwon Allah inowen nele aru uruk lahi,” irisi.

¹⁷Nit o Babilonia kinang fam nunumbahik waharusa sambilen mo ilig am wirig am turukmen nisanggowen larisimu pikalem tamon fam hup nuwal fimahen atisimu NINIKNI Allahn an nubam ele uruk lit,

¹⁸”Hat ap kinangmon welahenon, haren Mesir inap onowe suwon umalikisi men enebe hemet til larukon unubahet hunu sini imihin! Ap o pumbuk inineyon ap warehon wereg ambeg luhaloho weregma Mesir inap enembeg wambuhupteg it warehon men ambiyeg welamuhup ane fahet imihin! Imihinon tu:

¹⁹An nebe eneg fano welahi peruk lahen ano? Ari peruk lahenon ap warehon wereg ambeg wambuhunteg Allah enepeleg inap iniraham yinggig laruhun.

²⁰Yinggig lit haret humalikisi enebe hemet til larukonet ap karohen unusuruson men ambiyeg welamuhup.

²¹Weregma ap enehako roho turukon arimano ap warehon wereg ambeg luhaloho wereg lit hit men hinibil atuson men fahet enele uruk lit, ’Ap aruma wambik wahasareg Allah enepeleg inap men karohen unusuruson men ambiyeg yinggig lit weregma yet esemek!’ uhup.

²²Hit yinggig lamuhup ambeg horogma o Asyur inap onowe wareg angge yinggigmu umalikisi sehen senehon obog toho walinggoho yinggig lit wereg. It arimano onoluk wereg li ap o pumbuk obog toho enekolap eneptuk latusa angge famen aben karog fam unusurusama ap warehon wereg ambeg wamburukmu apma yinggig lamuhup ulug hiyag isarusa.

²⁴Asyur inap horogma o Elam inap onowe wareg angge yinggigmu umalikisi sehen senehon obog toho walinggoho yinggig lit wereg. It arimano onoluk wereg li Allah enepelehen enembilahap paleg eleg angge wereg lit ap o pumbuk obog toho enekolap eneptuk latusa. Ari fahet aben karog fam unusurusama ap warehon wereg ambeg wamburukmu apma yinggig lamuhup ulug hiyag isarusa. Hiyag isarusama ap warehon wereg ambeg welahe ulug ininggali haruk lit ap karohen unusuruson sehelimu wereg.

²⁶Elam inap horogma o Mesekh-Tubal inap onowe wareg angge yinggigmu umalikisi sehen senehon obog toho walinggoho yinggig lit wereg. It arimano onoluk wereg li Allah enepelehen enembilahap paleg eleg angge wereg lit ap o pumbuk obog toho enekolap eneptuk latusa. Ari fahet aben karog fam unusurusa.

²⁷Unusurusama ap warehon wereg ambeg wamburukmu ap enehako roho turukon indam unusibahon iniraham yinggig lamuhup ulug hiyag isa fug angge enemumu yinggi fisibag. Ap enehako roho turukon arimanowen ap o pumbuk obog toho enekolap eneptuk latfag ane fahet ir oho tog elman unusibag. Unusibagma enesing wan teg lit minggin tog seneg lit ap warehon wereg ambeg wambibag. Wambibagma tog piyabanggeyen enebe hondo regma karog iren tohon ununggul apma embelug yinggi fibag.

²⁸Hit Mesir hinap oho ap warehon wereg ambeg wambuhupmu ap enembilahap paleg elehon men karohen unusuruson men enesehelimu yinggi hunubahakup.

²⁹Hit yinggig lamuhup ambeg horogma o Edom inap onowesi suwon wareg angge men onotsi milal eneptukon wareg angge men yinggi fuhup. It arimano onoluk wereg li enehako roho tog aptuk inap wereg angge famen ap warehon wereg ambeg wambuhupteg ap enembilahap paleg elehon men karohen unusuruson men iniraham yinggig lamuhup.

³⁰Yinggig lamuhup ambeg horogma ap suwon-suwon ik elerukmu werehon wareg angge men o Sidon inap wareg angge men yinggi fuhup. It arimano onoluk wereg li enehako roho tog aptuk lit ap enekolap enebil laruk latusa angge famen Allah enepelehen enembilahap paleg eleg angge wereg lit ap warehon wereg ambeg wambuhupmu ap karohen unusuruson iniraham yinggi fuhupmu ap warehon wereg ambeg welahe ulug ininggali haruk lamuhup.

³¹Mesir inap onowe suwon men umalikisi sehen senehon obog toho men karog fam unusuhupmu ap suwon inowen umalikisi unusuhup ane fahet indi anggin toho wenggel haruk lit ap warehon wereg ambeg wambuhu angge famen ap o pumbuk ekemon-ekemon wareg angge arimano obog toho yinggigmu yet isahureg an numalikisi men it men ambi roho welahe ulug indi se aruhu. An HINIKNI suwon Allah inowen nele aru uruk lahi.

³²Anden Mesir inap onowe suwon ino ineyap tirikikmu ap enekolap enebil laruk latisi angge famen aben aret umalikisi enebe hemet til larukonet unusuhupmu Allah enepeleg inap men karohen unusuruson men iniraham yinggi fuhup. An HINIKNI suwon Allah inowen nele aru uruk lahi,” irisi.