Read Angguruk Yali YEHEZKIEL 33 Bible Online

YEHEZKIEL 33 - Angguruk Yali bible

YEHEZKIEL 33

¹ NINIKNI Allahn an nubam ele uruk lit,

²”Hat ap kinangmon welahenon, hat hori unubam komo enepmihinon tu: Anden kinang eke fam tog monde fik waharuk laruhuk halug ap arimanowen it sehelimuwon eke fam, ’Ap seliyonen nunusuhup tohon kahal enesug laruhun,’ ulug unduhuk feruk lamuhup.

³Unduhuk ferukon inowen kahal enesug lit weregman ap seliyon waharukmu at inowen yet isaruk lit ap seliyon waharuken hinindi anggat toho welamek ulug waruk ele ine roho teltuk laruhu.

⁴Teltukmu hol haruk ahun ekeyen, ’Hayen, war atmin fug,’ perukmu ap ino tog fam watuk lamuhup halug inggareg ubaburen war aha uruk lamuhup. At inowen waruk ele holtuk lit, ’Ap seliyon waharuken an kahal talug latmin,’ pelepteg fano welalep.

⁶Kahaleg ahun inowen yet harukmen ap seliyon waharukmu yet isaruk laruhu angge famen nori inindi anggat toho welamag ulug waruk ele teltuk laruhu fugmu ap seliyon arimano waharuk lit ap eke ware feseruk lamuhup halug ap ino siyag ane tirisimu war aha uruk lamuhup angge famen An Allahn kahaleg ahun ubam, ’Nungge fahet waruk ele teltikin fug?’ ulug alem angginon ubam umbuhuk.

⁷Nare, hat ap kinangmon welahenon, Israel inap fahet kahal enesug laruhun ulug unduhuk hubaharuk lahi. Anden it siyag amuhup tohon ulug hiyag hutuk laruhukon haren An nunuk fam hiyag isaruk laruhun.

⁸Anden ap misig siyag ane turukon fahet war amag ulug nele uruk laruhukmu haren ap ino ubam, ’War aruhun tohon siyag ane turuk lahenon umbusuhun,’ ulug komo ruruk laruhun. Komo ruruk laruhun fug halug ap ino inggarehen siyag ane turukon ariyen war aruhu angge famen Anden, ’Nungge fahet komo ririkin fug?’ ulug hat hubam alem angginon emberuk laruhuk.

⁹Haren ap ino komo ruruk laruhunmu aren hele holuk fug angge siyag ane turukon ino umbusuhu fug halug inggarehen siyag ane turukon inowen war aruhu angge famen hat hinggareg windat taruk laruhun,” ulug NINIKNI Allahn ele an nubam irisi.

¹⁰ NINIKNI Allahn ele an nubam uruk lit, ”Nare hat ap kinangmon, Israel inap unubam hiyag isamihin ane tu: Hiren henele uruk lit, ’Niren Allah ele pisan isaruk lit siyag ane turuk laheyon ariyen angginon nunubam atukmu war am hag toho welahe. Ari roho welahereg nangginoho nit nonoluk welamuhuk?’ uruk lahep.

¹¹Hiren ari uruk lahepma NINIKNI suwon Allahn tik-tem toho urukon tu holeg lamek, ’An enembol yig nutuk inap war atukon fahet Anden nahiyeg haruk lahi fug. Iren siyag ane turukon embeselug onoluk welamuhubon fahet eneg nahiyeg haruk lahi. Ari fahet hiren honolok ane turuk lahebon embeselug An nalukema hebeloho waharuk lamuhup! Israel hinap nori, nungge fahet war ala peruk lahep?’ ehek ulug hiyag isamihin.

¹²Hat ap kinangmon welahenon, hat hori unubam nin eke hiyag isamihinon tu: Ap ubabut fanowon ekeyen fano ane turukon embeselug Allah ele pisan isaruk halug aren fano ane tam turukon inowen fanowap turuk laruhu fug. Ap olok ane turukon ekeyen aren turuk ane ino embeseruk halug aren tam siyag ane turukon ino fahet alem angginon ubam aruhu fug. Ap tam fano ane turukon inowen fobik siyag ane turuk halug tam fano ane turukon inowen fano welaruhu fug.

¹³Allahn wirim angge eke urukon tu, ’Anden ap fano ane turukon eke fam nele uruk lit, ’Holuk eneg welaruhun,’ ulug hiyag uruhuk angge famen at inowen, ’Tam fano ane turuk latikikon ariyen siyag am fug teg lahi,’ peruk lit siyag ane turuk laruhu. Ari roho turuk halug tam fano ane turukon arimano obog toho Anden nambolmayap tubusuhukmu at ino siyag ane turukon inowen war aruhu.

¹⁴Wirim angge eke iminon tu: Anden ap siyag ane turukon eke fam nele uruk lit, ’War aruhun,’ ulug hiyag uruhuk angge famen at inowen siyag ane turukon embeselug ap fano roho let eneptuk lit fano ane eneg turuk laruhu.

¹⁵Aren angge ilamna foroho laruhun ulug ap eke og utuk lit fobik hebeloho og nuruhuwen anden oho at anggengge misig foroho laruhuk ulug hilaruk angge aren fobik hebeloho og uruhu. Aben tohon yoholiyangge hilarukon arimano hebeloho og isaruk laruhu. Anden numalikisi fano roho onoluk welamuhup ulug komo eneptik iyahon hikit toho turuk lit siyag ane turuk laruhu fug. Ap ari roho turukon ino war am fug angge oluk eneg welaruhu.

¹⁶Aren siyag ane tam turukon obog toho Anden nambolmayap tubusuhukmu fobik aren ap fano roho let eneptuk lit fano ane eneg turuk laruhu ane ariyen oluk eneg welaruhu,’ ulug hiyag isamihin.

¹⁷Hat hori arimanowen enele uruk lit, ’NINIKNI Allahn hare ane turuk,’ uruk angge famen it ininggarehen eneg hare ane turuk.

¹⁸Ap fano ane turukon ekeyen aren turuk ane embeselug siyag ane turuk halug inggarehen siyag ane turukon inowen war atuk laruhu.

¹⁹An ambol yig nutuk ahun ekeyen siyag ane turukon embeselug ap fano roho let eneptuk lit fano ane eneg turuk halug aren fano ane turukon ariyen fano welaruhu angge famen

²⁰Israel hinap nori, hiren henele uruk lit, ’NINIKNI Allahn hare ane turuk,’ uruk lahep. Anden hit henebe wal tanehen turuk lahep ane hikit toho alem wal taneg hunubam emberuk laruhuk,” ulug Allahn ele irisi.

²¹Nit Yehuda ninap nininggik hele waroho hik nisarusama o Babilonia kinang fam weregman mo nanggoloben atisiyon fam pikalem numon inam atisimu hup fuwabenam welatukukmu ap misig aben watusa fuhon o Yerusalemen nambeg waharisireg an nubam ele uruk lit, ”Babilonia inaben o Yerusalem pin kurusa,” ulug hiyag nitisi.

²²Ap ino uwan waharuk elegma hubanggo NINIKNI Allah inggik ineyonen an sen naptisi. Sen naptisireg weregman likiya ap ino waharukmu an nambilik larehen nele uk fug tohon ino NINIKNI Allahn husi ferisimu nele uk teg latikik.

²³NINIKNI Allahn ele an nubam uruk lit,

²⁴”Hat ap kinangmon welahenon, Israel kinang fam o pumbuk halog toho lin isarusa ambeg werehon arimanowen enele urukon tu, ’Abraham ebe misig eneg weregma Allahn kinang tu obog toho hiyag itfag. Nit nenebe anggolo roho welahereg kinang aru ngi reg lamuhuk,’ uruk.

²⁵Iren ari uruken An HINIKNI suwon nele haren hiyag isahunon tu: Hiren wam unu mep angge naruk lit usangge fahet hinil fano roho kim haruk lit ap unusil laruk lahep angge famen kinang tu nangginoho ngi reg lamuhuk peruk lahep?

²⁶Alem weregma henesehen folo-folo senerik laruk lit honori unuhesi siyahap eneptuk lit amben siyahon eneg turuk lahep angge famen kinang tu nangginoho ngi reg lamuhuk peruk lahep?

²⁷NINIKNI suwon Allahn tik-tem toho urukon tu holeg lamek, ’O Israel pumbuk halog toho lin isarusa ambeg wereg inap arimano tog elman unusuruk lamuhup. Ap anggen ke werehon arimano olomene olokonen nawag ulug Anden og isaruk laruhuk. Tom fene men owik ele ke men hirag atuson arimano ouk alem siyahon unubam atukmu war atuk lamuhup.

²⁸Kinang tu Anden siyahap turuk laruhukmu ap enele teng uhup. Nit ninine wereg ulug hemet toho uruk ane ino eleg aruhu. Israel kinang fam tom werehon arimano oho oruk angge mondabi elehen ap misihen oho laharuk laruhu fug.

²⁹Iren amben siyahon anggolo roho turukon ari fahet Anden kinang tu siyahap turuk laruhuk. Ari roho turukmu iren yet niyahupteg An fahet NINIKNI Allah At wereg ulug inindi anggar aruhu,” ulug Allahn ele irisi.

³⁰NINIKNI Allahn an nubam ele uruk lit, ”Hat ap kinangmon welahenon hori arimano inibam iraham ke heriyeg lit hat habug uruk. It-it enele sahaltuk lit, ’NINIKNI Allahn hiyag nisaruk ane holik lulen maniyek!’ uruk.

³¹Ari uruk lit it arimano mondoko hambeg watlug, ’Nit Allah umalikisi welahe,’ ulug hat halukema palu roho hur atuk. It arimano heriyeg lit haren hele uruk lahenon holtuk angge famen haren uruk lahenon hikit toho turuk eleg. It enembilik fam, ’Ap ninindi enesug lahe,’ uruk angge famen inindimuwen, ’Nenenggengge anggolo welalep,’ ulug wenggel haruk.

³²It arimanowen hat fahet kelem sini ele fano roho uruk ahun hag toho wereg peruk lit hat hele holik waharuk angge famen haren uruk lahenon hikit toho turuk eleg.

³³Iren ari roho turuk angge famen haren uruk lahenon obog toho teko lahu. Teko lahumu iren yet hahupteg, ’Allah wene hiyag isaruk ahun nabi eke nit sehelimu wereg lit tam hiyag nisarisi,’ ulug inindi anggar aruhu,” ulug Allahn an nubam irisi.