Read Angguruk Yali YEHEZKIEL 34 Bible Online

YEHEZKIEL 34 - Angguruk Yali bible

YEHEZKIEL 34

¹NINIKNI Allahn an nubam ele uruk lit,

²”Hat ap kinangmon welahenon, An nunuk fam hele uruk lit Israel inap fet enesuhon arimano komo enepmihin! An HINIKNI suwon nele haren hiyag isamihinon tu, ’Hit Israel inap fet enesug lahebon arimanowen henembohom fuki roho fet enesug lam fug angge hininggareg fahet eneg wenggel haruk lahepma siyag amuhup!

³Hiren henembohom domba inag owe naruk lit onoruk fam sum yig taruk lit wam seiyon paltuk lahep angge famen henembohom enebe fano roho foroho lahep fug.

⁴Wam inine elehon fano roho let enebuk fug angge ouk atukon arimano hihit eneptuk latikip fug. Yowil angge unubam werehon tag angge enebuk fug angge anggenma longgo urukon yami roho hiyahalug inibam hebeloho walug waharuk latikip fug angge famen hunuyuhen honolok toho sobir eneptuk latikip.

⁵Henembohom iniknisi fet enesuhon elehen linggik-longgo urukmu wam mene farema werehonen inaruk latusa.

⁶An nambohom arimano tom yaron fene oho punu toron fene oho walinggoho la wam turuk lit kinang atogman atogma linggik-longgo urukmu ap misihen oho it fahet wenggel haruk lit yami eneptuk latisi fug.

⁷Ari fahet fet enesug hinap welahebonen An HINIKNI Allah nele holeg lamek!

⁸An HINIKNI suwonen nele tik-tem toho iminon tu: An nambohom arimano iniknisi fet enesuhon elehen olomene olokonen wat heheg naruk latusa. ’An nambohom fet enesug lamuhup,’ ulug in heneptikik hinap arimanowen fano roho fet enesug latikip fug. Hiren An nambohom fahet wenggel ha fug angge hininggareg fahet eneg wenggel haruk lahep.

⁹Ari fahet fet enesug hinap welahebonen An HINIKNI suwonen nele iminon tu holeg lamek: An ninggarehen hit men hiliyap turuk lit An nambohom hit hininggikmuwen hebeloho hilaruk lahi. Nin fobik nambohom foroho lamuhup fug ulug hiyag hisaruk lahi. Hiren hininggareg fahet eneg wenggel haruk lit An nambohom nahup tohon ulug henembilikmuwen taluk toho hilaruk lahi,” ulug Allahn ele irisi.

¹¹NINIKNI suwon Allah ele urukon tu, ”An ninggarehen nambohom yami eneptuk lit fuki roho kim isaruk laruhuk.

¹²Wam foroho ahun misihen ambohom longgo urukon yami eneptuk hag toho nambohom o hik teg sambil o kema-kema linggik-longgo rebeseruson arimano Anden yami roho hiyag enebuhukteg inibam hebeloho og eneplug waharuk laruhuk.

¹³Ap o pumbuk winama wereg ambeg arimanowen nambohom arimano og eneplug wilip aruhukteg palu eneplug enengginang Israel fam hondog eneplug waruhuk. Hondog eneplug waruhukteg tom fene men tonggo ke men hoholangge fanowon anggolo roho wereg ambeg naruk lit inindi yuwag toho welamuhuben Anden fet enesug laruhuk.

¹⁵An ninggarehen fet enesugmu kel taruk lamuhup. An HINIKNI suwon Allahn nele tu uruk lahi.

¹⁶It longgo urukon yami roho hiyag eneptuk laruhukteg inibam og eneplug waharuk laruhuk. Yowilangge rehon tag angge eneptuk lit ouk warukon hihir eneptuk laruhuk. Sei reg lit inine rehon arimano Anden yet enesug laruhuk. Ari roho turuk lit Anden fano roho fet enesug laruhuk.

¹⁷Hit An nambohom welahebonen An HINIKNI suwonen nele iminon tu holeg lamek: Wam kambing domba welahebon henesehelimu winonen winon siyahap eneptukmu Anden alem haloho emberuk laruhuk.

¹⁸Nungge fahet hoholangge fanowon wereg ambeg hiren anggolo roho naruk lahep angge famen, ’Niren peruk ane wirim atuk elehen nungge ane eke tul,’ ulug winon embeseruk lahebon hunuyuhen sobir isaruk lahep? Nungge fahet hiren ik yenggelehon il wirikon anggolo nalug embeseruk lahebon hunuyuhen il kula feseruk lahep?

¹⁹Nambohom domba winonen hoholangge hunuyuhen sobir isaruk lahebon eneg naruk lit ik hiren il kula feseruk lahebon arimano naruk.

²⁰Ari fahet An HINIKNI suwonen hit hunubam nele urukon tu: Sei rehon arimanowen sei reg elehon onolok ane unubam turukmu Anden sei reg elehon ili og eneptuk laruhuk.

²¹Inine elehon obog toho hit henebe suwonen miyal eneptuk lit henendimbuk fam hit henesehelimuwen yanggal eneptuk latikip.

²²Yanggal eneptuk latikipmu nambohom siyahap enebuhup tohon ulug let eneptuk lit it sehelimu alem weregma Anden haloho emberuk laruhuk.

²³Ari fahet atam An namingmingangge hun Daud Israel inap fano roho fet enesug latfahon hahon ap eke unduhuk fuhuk. At ino unduhuk feruk lit, ’Hat hamuwen eneg An nambohom fet enesug laruhun,’ ulug hiyag uruhukmu fano roho let eneptuk laruhu.

²⁴Fobik An Allah it INIKNI weregma ap suwon An namingmingangge Daud hahon inowen fet enesug laruhu ulug An HINIKNI Allahn uruk lahi.

²⁵Hit An napma wereg lit fano roho welamuhup ulug sali emberuk laruhuk. Anden olomene onolokon kinang tu fam werehon arimano yanggal enebuhukmu An nambohom arimano inindi yuwag toho o kema-kema laruk lit fare ke enekol eleg toho nohoruk lamuhup.

²⁶It arimano Anden wanggi wat enesug lit kinang An nantom walinggoho werehon ino seiyap turuk laruhuk. Iren osit pilabik walep peruk li Anden osit pilabik waharukmu kinang ahaluweyap turuk laruhu.

²⁷Ahaluweyap turukmu e yabukmu werehon arimano anggen fano yihik ferukmu kinang ino famen mun angge man angge fano wilip atuk laruhu. Ari roho turukmu it arimano inindi yuwag toho enengginang fam fano welamuhup. Aben An numalikisi ininggik hele wat eneptuk latuson arimano Anden lol eneptuk lit nenemingmingangge welamuhup ulug hiyag isaruk latusa inap arimano ininggikmuwen windat eneptukmu iren yet niyahupteg An fahet, ’NINIKNI Allah At wereg,’ ulug inindi anggar aruhu.

²⁸Ap o winamon arimanowen An nambohom huhulangge hila fug angge weregma olomene onolokonen oho inaruk lamuhup fug. Ap it inindi yukap eneptukon misig oho wereg elehen inindi yuwag toho welamuhup.

²⁹Anden it enengginang seiyap turuk laruhukmu ap misig oho kinang ino famen suburu oboken war am fug angge weregma ap o winamonen it ininggaliyap eneptuk lamuhup fug.

³⁰Ari roho weregma Israel inaben, ’NINIKNI Allah nit men werehen At umalikisi welahe,’ ulug inindi anggar aruhu. An HINIKNI suwonen nele tu uruk lahi.

³¹An hit Hinikni Allah welahireg hit An nambohom fet henesug lahiyon welahep,” ulug NINIKNI suwon Allahn ele irisi.