Read Angguruk Yali YEHEZKIEL 35 Bible Online

YEHEZKIEL 35 - Angguruk Yali bible

YEHEZKIEL 35

¹ NINIKNI Allahn an nubam ele uruk lit,

²”Hat ap kinangmon welahenon, haren tom Edom fil horohole leko yet hamihinteg alem angginon ubam aruhu ane fahet hiyag itmihinon tu:

³NINIKNI suwon Allah inowen ele urukon tu holeg lamin! Hat tom Edom welahenon, An men hat men seli roho wereg lit ninggik ineyonen mondabi siyahap habuhuk.

⁴O pumbuk haren tohon obog toho halog tuhukmu ap enele teng uhup. Ari roho tuhuk ane ariyen haren An HINIKNI Allah fahet Allah tem toho wereg ulug holuk aruhu.

⁵Hat indam Israel inap men seli roho welatikin hag toho ketiya oho Anden alem it unubam werehon mondabi kong toho umbuhuk perikik sambil it inibil am fug angge ap seliyonen unusukag ulug embeserikin.

⁶Ari fahet An HINIKNI suwon Allah noluk welahiyonen nele tem toho uruk lahiyon tu: Haren ap unusil laruk lit siyag ane hum toho turuk latikinmu har oho huwabul ulug mug haplug laruk lit pinggi huwabuhup.

⁷Huwabuhupmu tom Edom fam ap misig oho laruk laruhu fug ulug Anden mondabi siyahap tuhuk.

⁸Siyahap tuhukteg Anden hat humalikisi unusuhubon wareg angge kinang atogman atogma hik isil larukmen eneg tom famen tulug tonggoma obog toho keleg aruhu.

⁹Keleg aruhumu Anden hat hangginang mondabi siyahap tuhukon ino lekma hag aruhumu fobik oho o pumbuk halog toho lin uhubon fam ap misihen oho ibam wit taruk laruhu fug. Ari roho teko larukmu yet hahupteg hit Edom hinap An HINIKNI Allah nubahet tem toho wereg ulug honoluk aruhu.

¹⁰Haren hele uruk lit, ’O Israel kinang men Yehuda kinang men an aruhuken ilmig ta lahuk,’ uruk lahen. Ari uruk lahen angge famen kinang itano An HINIKNI Allah ngi reg lahiyon hapeleg?

¹¹Ari fahet An HINIKNI suwon Allah noluk welahiyonen nele tem toho uruk lahiyon tu: Haren An numalikisi fahet nirim peruk lit hindimu inahan turukmu holok ane unubam turuk latikin hag toho Anden hat hubam tuhuk. Anden alem angginon hubam umbuhuk ane ariyen hat hindimuwen Allah sa hahon wereg ulug holuk aruhu.

¹²Haren hele uruk lit, ’O Israel punu reg ambeg arimano mondabi siyag atusama an namin,’ ulug inda yako apmayap tirikinmu An HINIKNI Allahn holtikik. Holtikik ane fahet nirimen hat hubam tuhukon haren yet hahun.

¹³Haren hele hemet toho An nabug uruk lit apmayap naptuk latikinon An we tem toho holtikik.

¹⁴Ari fahet An HINIKNI suwon Allah inowen nele uruk lahiyon tu: Hat tom Edom welahenon, Anden hat mondabi siyahap habuhuk ane fahet ap kinang atogman atogma werehon arimanowen enehiyeg haruk lamuhup.

¹⁵Hat tom Edom welahenonen Anden Israel inap og isiyag angginang siyag atisi ane fahet hahiyeg haruk latikin hag toho An oho nahiyehen haret hangginanget mondabi siyahap tuhukmu lekma hag aruhu. Ari roho teko larukmu yet hahupteg Edom inap An HINIKNI Allah nubahet tem toho wereg ulug onoluk aruhu,” irisi.