Read Angguruk Yali YEHEZKIEL 36 Bible Online

YEHEZKIEL 36 - Angguruk Yali bible

YEHEZKIEL 36

¹NINIKNI Allahn an nubam ele uruk lit, ”Hat ap kinangmon welahenon, Anden tom o Israel kinangma werehon unubam tuhuk ane fahet hiyag isamihin. Hiyag isamihinon tu: Hit tom obog toho welahebon, NINIKNI Allahn ele urukon tu holeg lamek!

²Ap seliyonen enele uruk lit, ’Fano, tom Israel inaben mondabi ngi reg lamuhup ulug og isibahon arimano ketiya nit atukuk,’ ulug henebug uruk.

³Henebug uruken An HINIKNI suwon Allah inowen uruk lahi ane hikit toho haren tom arimano unubam hiyag isamihinon tu: Ap seliyon o kema-kema werehonen hit huk heneptuk lit henengginang mondabi siyahap turusa. Siyahap turusareg hiren angge obog toho fibir eneptuk lit inda yako apmayap heneptuk latusa.

⁴Ari fahet hit tom Israel kinangma welahebonen NINIKNI Allahn ele urukon holeg lamek! At palimu werehon inowen ele urukmu obog tohowen holukag! Tom, punu, fanggong, tonggo men, o pumbuk halog toho lin isaruson men, ap enenggengge seliyonen hilaruson men, inda yag eneptuson menen holiyek!

⁵Ele urukon tu: Edom inap men o pumbuk winon tor angge werehon menen Israel kinang fam wam foroho ambeg anggolo werehen nit amuhuk ulug enehiyehen An nangginang ino fibir atuk lit mun angge man angge kinang ino fam werehon huhulangge hilaruk lit hit inda yako apmayap heneptuk latusa. Ari roho turuk latusa ane fahet An noloken nahummu het-pet haruk lit ap arimano huluwap eneptuk lahi.

⁶Ari fahet haren Israel kinang men, tom, punu, fanggong, tonggo men unubam hiyag isamihinon tu: NINIKNI suwon Allah inowen ele urukon tu holeg lamek! Ap seliyonen hit hininggaliyap heneptusama An nolok anggolowen nindi inahan turukmu ninggik leho lit nele tem toho uruk lahiyon tu: O pumbuk hit walinggoho werehon arimano alem angginon unubam aruhumu ininggaliyen kunuk uruk lamuhup angge famen

⁸An numalikisi Israel inap o winama hik isaruson arimano nin suhuloho inibam wamuhup li horog aha. Horog ahama hit henehan arimano it suhuloho wamuhubon fahet nin hebeloho inggik wilip atuk lit anggen uruk lamuhup.

⁹An naluke hit fil yig hisarukmu hit fene nin hebeloho yabuk wituk lamuhup.

¹⁰An numalikisi Israel obog toho hit henebene welamuhuben anggolowap enebuhukmu o pumbuk halog toho lin isaruson nin hebeloho wit tahupteg yug toho welamuhup.

¹¹It enebeyet enembohomet anggolo welamuhuben Anden inineyap enebuhukmu it famen ap anggolo endebuhubonen ondoko laruk lamuhup. Indam Anden hit hunubam fano ane turuk latik iyahon tot tegma fobik fano ane su roho hunubam turuk laruhuk. Turuk laruhukmu indam hit henebene ap anggolo welatfag hag toho nin hebeloho anggolo welamuhup. Ari roho teko larukmu yet hahupteg hiren An fahet NINIKNI Allah wereg ulug honoluk aruhu.

¹²An numalikisi Israel inap arimano hondog eneplug waruhukmu iren hit hebeloho ngi roho sen henesugmu iren endebuhubonen endebuhubon arimanowen oho seneg lamuhup. Ari roho weregma hiren anggen narukon anggolo og isarukmen eneg welamuhupmu malik suburu oboken war atuk ane mondabi eleg aruhu.

¹³An HINIKNI suwon Allah inowen Israel kinang fam nele uruk lahiyon tu: Aben hat fahet enele uruk lit, ’Kinang inowen ap naruk lit Israel inap obog toho elehap eneptuk,’ ulug habug uruk.

¹⁴Ari uruk angge famen haren ketiya ap naruk lit Israel inap elehap eneptuk laruhun fug ulug An HINIKNI suwon Allah inowen uruk lahi.

¹⁵Ap o pumbuk kema-kema werehonen hat inda yako apmayap haptuk ane Anden elehap tuhuk. Iren hat hinggaliyap haptukmu kunuk toho welahen ane eleg aruhu. Anden hat hineyap haptukmu we tem toho ketiya famen tulug fobik oho Israel inap elehap eneptuk laruhun fug. An HINIKNI suwon Allah inowen nele aru uruk lahi,” irisi.

¹⁶NINIKNI Allahn an nubam ele uruk lit,

¹⁷”Hat ap kinangmon welahenon, Israel inap arimano hondog eneplug imbisik la fugmu siyag ane til-wil noruk lit enengginang siyahap turuk latusa. Ari roho turuken it arimano An nolohotma hiyap pikalem sap turukon siyag angge ubam tag tehon hag atusa.

¹⁸Iren ap unusuruk lit usangge wel turuk lit enengginang siyahap turusa ane fahet An nindimu inahan haruk lit nolok ane unubam tirikik.

¹⁹Iren siyag ane turuk latuson fahet alem angginon unubam emberuk lit o kema-kema yanggaloho pilili-palala isarikik.

²⁰Pilili-palala isarikik ambeg wereg lit Israel inap arimanowen An nunuk fanowon siyahap naptuk latusa. It fahet aben enele uruk lit, ’Ap aruma INIKNI Allah umalikisi wereg angge famen nungge fahet At angginang embeselug waharusa,’ ulug An nabug uruk latusa.

²¹Nabug urukmu hol haruk lit Israel inaben ap o pumbuk kema-kema werehon onolohotman An nunuk siyahap naptuk ulug nindi siyag atisi.

²²Allahn ele hiyag nutuk lit, ”Israel inaben siyag ane turukon fahet An HINIKNI suwon Allah nele haren hiyag isamihinon tu: Anden let henebuhuk angge famen Allahn indi nisaruk lit ninibil atisi puhup fug. An nunuk mondabi palimu rehon hit ap o pumbuk winon eneseheli ke wereg lit siyahap turuk latikibon ari fanowap tuhuk ulug hit hunubam alem su ane eke tuhuk. Ari turukmu ap o kema-kema werehonen yet niyahupteg An fahet it INIKNI Allah we tem toho wereg ulug onoluk aruhu. An HINIKNI suwon Allah nele tu uruk lahi.

²⁴Anden hit o kema-kema weregma palu henebuhukteg henengginang fam hondog heneplug waruhuk.

²⁵Anden ik il wirikon hit henebene hilili feruk lit hiren siyag ane turuk latikibon men usangge wel turuk lahebon ariyen hunubam sing angge tag tehon arimano men puhun toho umag henebuhuk.

²⁶An nele holtuk lamuhuben hit hinindi helep arikon hag toho werehon lisoho wili fusuhukteg ubalmangge hinindi keron wenggeltuk ane og hisahuk.

²⁷An nahime fanowon hunundama umbuhukmu hiren ari-ari turuk lamuhup ulug imbiyahon seneg lit Anden komo heneptuk lahi ane hikit toho eneg turuk lamuhup.

²⁸Ari roho turuk lit hit kinang Anden hunumbasi hiyag isiyahon fam wereg lit An hit Hinikni weregma hit An numalikisi roho welamuhup.

²⁹Siyag ane hit hunubam werehen An men ambiyeg welam fug teg lahep angge famen Anden hit fanowap henebuhuk. Nin suburu obok haruk lamuhup fug ulug kinang seiyap tuhukmu suburu roti anggen men

³⁰e anggen narukon men anggolo wilip aruhumu o wina keyen, ’Israel inap suburu obok toho eneg wereg,’ ulug hininggaliyap heneptuk ane umbusuhup.

³¹Umbusuhupmu hiren ke hareyon laruk lit honolok ane turuk latikibon fahet wenggel hahupteg nenemben siyag toho welatukuk ulug hininggali aruhu.

³²Anden let henebuhuk angge famen Allahn indi nisaruk lit nit ninibil atisi puk fug. Niren siyag ane turuk latukuk ulug hininggali hahup ulug An HINIKNI suwon Allahn nele uruk lahi.

³³Hit hunubam siyag angge werehon obog toho Anden puhunap henebuhukmu o pumbuk hiren tohon halog toho siyahap turuson nin keron wit tahupteg welamuhup.

³⁴Ketiya ap yabuk hiren tohon iraham ke laruk lit yet harukmen ohi humon laharisi ulug yet haruk angge famen hit fobik nin suhuloho kuhupteg wit taruk lamuhup.

³⁵Witukmu aben yet hisahupteg enele uruk lit, ’Yabuk ohi humon laharisi ambeg arimano Eden yabuk hag toho atisi, o pumbuk halog toho lin isarusama olun atisi ambeg arimano nin witusareg elehet oko ap undama wereg,’ uruk lamuhup.

³⁶Ap o pumbuk winon hit walinggoho werehon Anden unusuruk lit tot umbusuhukon arimanowen yet hahupteg Israel inap INIKNI Allahn o pumbuk siyahap turuson nin witisireg yabuk ohi laharisiyon oho wituk ulug onoluk aruhu. An HINIKNIYEN nele uruk lahiyon aru we tem toho tuhuk ane fahet uruk lahi.

³⁷Israel hinap nori, hiren An nubam heng naptuk lamuhup halug Anden sebe roho let heneptuk lit henebe anggolowap heneptukmu wam domba luhaloho wereg hag toho welamuhup.

³⁸Indam Israel inaben An wel naptuk sambil hubu lahabul ulug wam domba walug waharuk latuson arimanowen o Yerusalem pumbuk keleg uruk latisi hag toho fobik o pumbuk halog teberuson arimano wibuhup halug ap anggolowen keleg uruk lamuhup. Ari teko larukmu yet hahupteg hiren nit NINIKNI Allah wereg ulug honoluk teg lamuhup,” ulug hiyag nitisi.