Read Angguruk Yali YEHEZKIEL 37 Bible Online

YEHEZKIEL 37 - Angguruk Yali bible

YEHEZKIEL 37

¹Welatikikmu NINIKNI Allah inggik ineyonen an sen naptisireg ahime fanowonen og naplug tonggo ap warehon unuwag anggolo keleg teg ambeg larisi.

²Walinggoho hondog naplug larukmu anden yet harukmen ap unuwag lilohon anggolo lin-lan urukmu yet harikik.

³Yet harukmu itano Allahn an nubam ele uruk lit, ”Hat ap kinangmon, ap warehon unuwag aruma hebeloho onoluk am teg?” ulug kapal niyarisimu anden te, ”NIKNI Hat suwon, Hat eneg holuk teg lahen,” irikik.

⁴Ari irikikmu Aren te, ”An nunuk fam ap unuwag aruma fam hele imihinon tu: Hit ap warehon unuwag lilohon aruman NINIKNI Allah ele iminon tu holeg lamek,

⁵’An HINIKNI suwonen suhuloho honoluk amuhup ulug sat og hisaruk lahi.

⁶Hunumanggen men hununu men og hisalug henehap selma hililip henepminteg sat kilap henepminmu hebeloho honoluk atlihipteg NINIKNI Allah wereg ulug hinindi anggar aruhu,’ imihin,” ulug hiyag nitisi.

⁷Aren nubam irisi ane hikit toho ap unuwag unubam nele hiyag isarukmen ap unuwag arimano ahandip atuk lit eneplohok kilinting-kolonteng turukmu holtikik.

⁸Anden kim enesugmen unumanggen men ununu men inam atukmu enehap fam hililip atusa angge famen sat leg uruk latusa fug.

⁹Sat leg uruk latusa fugmu Allahn ele nubam uruk lit, ”Hat ap kinangmon, An HINIKNI suwon Allah nunuk fam homhomo[3] wol timihinmu yali filen, hubula filen, ik eleruk filen, ambut filen wamusareg it warehon aruma unubam sat fu roho kilap enebusama onoluk amusa,” ulug hiyag nitisi.

¹⁰Ari ulug hiyag nitisi ane hikit toho anden irikikmen sat unubam kirisimu onoluk atuk lit in atusareg anggolo mondeg latusa.

¹¹Mondeg latusama Allahn ele uruk lit, ”Hat ap kinangmon, Israel inap ap warehon unuwag aruma hag toho wereg. Iren te, ’Nit nunuwag lilog atisi, mondabi siyag atukuk angge re nin hebeloho ninine amuhuk fug,’ uruk.

¹²Ari fahet haren An HINIKNI suwon nunuk fam it unubam hiyag isamihinon tu, ’Numalikisi, ap warehon sal eneptuk ambeg sal heneptusama An HINIKNIYEN sok husoho wilip heneplug honolukap henebuhukteg suhuloho Israel kinangma og heneplug lahuk.

¹³Anden hunubam tuhuk ane yet hahupteg NINIKNI Allah we At eneg wereg ulug honoluk aruhu.

¹⁴An nambilik fam sat fu roho kilap henebuhukmu hit honoluk amuhup halug henengginangma suhuloho hunumbahik lahuk. Lahukmu hiren An fahet NINIKNI Allah At eneg wereg ulug hinindi anggar aruhu. An HINIKNI Allahn hunubam tuhukon fahet tem toho uruk lahi,’ imihin,” ulug hiyag nitisi.

¹⁵NINIKNI Allahn an nubam ele uruk lit,

¹⁶”Hat ap kinangmonen wanggun eke wamihinteg wanggun ino fam tu Yehuda inaben tohon ulug hahare femihinteg nin wanggun eke fam tu Israel inaben tohon ulug haharoho embemihin.

¹⁷Embemihinteg wanggun piren itano enembiyang ahandip toho senetmihinmu misig hag latmisi.

¹⁸Misig hag latmisimu hori Israel inaben yet hahupteg nungge fahet tebehen ulug umung hiyaruk halug

¹⁹haren hiyag isaruk lit, ’NINIKNI suwon Allah inowen wanggun Israel inaben tohon men Yehuda inaben tohon men misigmu ahandip tuhumu At inggik fam misig aruhu,’ ulug hiyag isamihin.

²⁰Iren yet hawag ulug wanggun piren itano hinggikmu seneg lit

²¹it unubam An nele hiyag isamihinon tu, ’An HINIKNI Allah suwonen hit numalikisi o kema-kema larikip ambehen andog heneplug henengginang yuhon fam suhuloho hunumbahik waruhuk.

²²Hunumbahik waruhukteg hit o Israel punu fene welamuhubon misihap henebuhukmu ap we misihen eneg fet henesug laruhu. Fobik oho nin minggiroho pirenma welamuhup fug.

²³Hiren usasum amben siyahon fahet sembahyang uruk lit siyag ane eneg turuk latikibon ariyen An niraham welam fug teg latikip ane eleg aruhu. An henembol yig nutuk lit nele sobir isaruk latikip angge famen Anden hunubabut puhun toho welamuhup ulug fanowap henebuhukmu hit An numalikisi roho weregma An Hinikni welaruhuk.

²⁴Ketiya hit fet henesuhon ap pirenen sen henesug angge famen fobik we ap misig ubabut An namingmingangge Daud welatfag hahon ekeyen hit fet henesugmen eneg mondabi welaruhu. Aren sen henesugmu hiren An nele imbiyahon hikit toho turuk lamuhup. Ari roho turuk lit kinang Anden Yakub hiyag itik iyagma hunumbasi welatfag ambeg ino hiren senegman eneg fobik hunumalikisiyen endebuhubonen oho seneg lamuhup.

²⁶Hit mondabi hinindi yuwag toho welamuhuben sali hunubam emberuk lit henebe anggolowap henebuhuk. Kinang hit welamuhubon fam An nibam wiri fuhukon mondabi welaruhu.

²⁷Weregma An hit henesehelimu Hinikni roho welaruhukmu hit An numalikisi welamuhup.

²⁸An nibam ino hit sehelimu mondabi welaruhumu ap o pumbuk winonen yet hahupteg Israel inap INIKNI Allahn umalikisiyap tarisi ulug onoluk aruhu,’ imihin,” ulug hiyag nitisi.