Read Angguruk Yali YEHEZKIEL 38 Bible Online

YEHEZKIEL 38 - Angguruk Yali bible

YEHEZKIEL 38

¹NINIKNI Allahn an nubam ele uruk lit,

²”Hat ap kinangmon welahenon, haren kinang Magog fil horohole leko yet hamihinteg o Mesekh inap men Tubal inap men onowe palimuwon Gog alem angginon ubam aruhu ane fahet hiyag itmihin.

³Hiyag itmihinon tu: NINIKNI suwon Allah ele holeg lamin! Hun Gog o Mesekh inap men Tubal inap men onowe palimuwon welahenon, An men hat men seli roho welamuhuk.

⁴Anden hat hiyahundema ayeg angge fam hak toho lit haplug waruhuk. Waruhukmu hat men humalikisi obog toho sum fanowon wan teg lit tog piyabangge eke hag eke hag lahaplug karog ininggikmu seneko wam kuda fam lahalug wamuhup.

⁵Waharuk lit onggo fahet hat men ambiyeg tog abik lahuk ulug o Persia inap, Etiopia inap, Put inap, Gomer inap, Bet-Togarma inap ik elerukmu werehon menen sing men ununggul asum men wan teg lit wamuhup.

⁷Haret humalikisiyet tog abik lahuben palu roho wereg lit hotsi fano milal eneptuk laruhun!

⁸Hit yet tegman eneg mo ilig am wirig am turukmen amusun toho welamuhupmu Anden hit wol henebuhuk halug o Israel kinangma wamuhup. Kinang ino ap seliyonen siyahap turuk lit o pumbuk halog toho lin-lan isarusa. Lin-lan isaruk lit Israel inap arimano ininggik lisoho o kema-kema imbisik larusa. Imbisik larusa ambeg arimano amusun toho weregman Anden inibam suhuloho hondog eneplug waruhukmu it obog toho inindi yuwag toho tom fene welamuhup.

⁹Weregman hat humalikisi men siyelu hag toho enembeg wamuhupteg humalikisi mondoko werehon men o pumbuk anggolo hat let haptukon menen kinang ino hondo reg lamuhup.

¹⁰An HINIKNI suwon Allahn uruk lahiyon tu: O itano li hat hindimuwen nolok ane tuhuk ulug wenggel haruk laruhun.

¹¹Wenggel haruk lit, ’Israel inap arimano o kema-kema hik-hak isarusa ambehen hondog eneplug waharusareg inibam halog toho lin uruson hebeloho wiri felug kinang unuk anum suwaleg ambeg weregman eneg enengge men enembohom men anggolo ininggikmu atisi. Atisimu inibam pumbuk walinggoho elehet wa fug angge inindi yuwag toho weregman an enembeg lahukteg elehet oho elehen pikit toho inibam kuruk lit enenggengge hilahuk,’ puhun.

¹³Ari puhun ane ino fahet aben angge ayeg waroho hilarukon o Syeba inap, Dedan inap, Tarsis inap menen hat hubam enele uruk lit, ’Haren ap enengge huhulangge hilahuk ulug ap anggolo aruma hondog eneplug lahuk peruk lahen ano? Hat lahunteg mun angge man angge wam men, perak ili rurukon men, emas umbagpag turukon men huhulangge hilahun,’ uruk lamuhup.

¹⁴Ari fahet hat ap kinangmon welahenonen An HINIKNI suwon Allah nele hun Gog hiyag itmihinon tu: Fobik An numalikisi Israel inap arimano inindi yuwag toho inibam weregman

¹⁵hat keman wahileg keman wahileg enembeg waruhun. Hibam yitmi-yatma ik elerukmu werehon famen waharuk lit ap o pumbuk anggolo wam kuda fam lahalug larukon hondog eneplug waruhun.

¹⁶Waruhunteg Allah umalikisi Israel inap unusuhuk ulug hit henebe mondoko wamuhubon arimanowen hinan kinang hondo reg hag toho Israel kinang atogman atogma hondo reg lamuhup. Alem ari teko lahu li horog aruhu halug haren An nangginang siyahap tuhun ulug Anden hondog haplug waruhuk. Waruhukteg Anden hat hubam tuhuk ane ari ap o pumbuk obog tohowen yet niyahupteg An nubahet Allah ebe usa fulu rehon tem toho wereg ulug onoluk aruhu.

¹⁷An HINIKNI suwon Allahn nele uruk lahiyon tu: Anden indam namingmingangge nabi arimano feneyen hat fahet Israel inap hiyag isaruk lit, ’An numalikisi siyahap enebuhun ulug ap eke monde fik waruhuk,’ iyag.

¹⁸Iyag ane hikit toho hun Gog inowen Israel kinang siyahap tuhuk ulug waruhu sambil ino An nolok anggolowen nundama ahe lahaku ulug An HINIKNI suwon Allahn uruk lahi.

¹⁹An nindimu indok ambulpul hag toho turukmu nele tem toho uruk lahiyon tu: O ino sambil Israel kinang o mek humon tuhumu

²⁰An nolohotman ap obog toho men, suwe pohol ke larukon men, ikan ik ahummu werehon men, wam pak mene farema werehon men, ahum sap fam larukon men enekolen elek-elek angge rurukmu masag waruk lit tom yaron kusoho wambuhupmu elehet o kema-kema ohowon obog toho halog toho lin-lan uhup.

²¹Lin uhupmu Anden alem siyahon eke hag eke hag hun Gog ubam monde fik waruhukmu umalikisi ekeyen eke karog fam wat-war atuk lamuhup ulug An HINIKNI suwon Allahn uruk lahi.

²²It winon ap seliyonen unusuhupmu winon ouk alem suwonen war amuhup. War amuhupmu Anden osit humon ik hul wamburuk hag toho pilabik waharuk lit osit soho anggen hahon oho, indok ambulpul turukon oho Gog men ap o pumbuk anggolo at let turukon men unubam monde fuhuk.

²³Ari roho tuhukmu yet niyahupteg ap o pumbuk obog toho inindi anggar atuk lit Allah ebe usa fulu ahun suwon inowen alem ari turuk ulug onoluk aruhumu NINIKNI Allah tem toho wereg ulug wenggel haruk lamuhup,” irisi.