Read Angguruk Yali YEHEZKIEL 39 Bible Online

YEHEZKIEL 39 - Angguruk Yali bible

YEHEZKIEL 39

¹Ari irisireg nin ele an nubam uruk lit, ”Hat ap kinangmon welahenon, haren hun Gog alem angginon ubam aruhu ane fahet nin sebe roho hiyag itmihin. Hiyag itmihinon tu: NINIKNI suwon Allahn ele urukon tu holeg lamin! Hat o Mesekh inap men Tubal inap men onowe palimu welahenon, An men hat men seli roho welamuhuk.

²Anden hat hibam yitmi-yatma ik elerukmu werehon famen tom Israel kinangma werehon fam lit haplug waruhuk.

³Waruhuk ambehen Anden hasehen teloho kinangma pila fesemin ulug hinggik hareyon ware feseruk lit minggin tog teloho kinangma pila fesemin ulug hinggik pikiron ware fusuhuk.

⁴Ware fusuhukmu haret humalikisiyet ap o pumbuk anggolo hat let haptukonet tom Israel kinangma werehon fene war amuhup. War amuhupmu Anden hit henebe wareg angge suwe tunguni men olomene menen hinawag ulug og isahuk.

⁵An HINIKNI suwon Allahn uruk lahi ane hikit toho hat anggenman war aruhun.

⁶War aruhunmu Anden o pumbuk kinang Magog fam werehon harep pisako siyaha feseruk lit ap ik saho ahik ilanma werehon inindi yuwag toho weregman inibam oho harep pisako oluna fusuhuk. Oluna feserukmu An yet niyahupteg ap arimano An nubahet NINIKNI Allah tem toho wereg ulug onoluk aruhu.

⁷An numalikisi Israel inap sehelimuwen An nunuk fanowon inamap tuhuk. Ap o pumbuk kema-kema werehonen An nunuk fanowon siyahap nabuhup tohon ulug yet teg laruhuk. Iren An nubahet Israel inap INIKNI Allah ebe usa fulu rehon wereg ulug onoluk aruhu.

⁸Ari obog toho teko lahu sambil Anden ihiyon hikit toho we tem toho teko lahu. An HINIKNI suwon Allahn nele aru uruk lahi.

⁹O ino sambil Israel inap arimano inibam pumbukmuwen wilip atug minggin tog ap seliyonen lin isahubon indokma yaltukon ulug andog til lahup. Andog til lahubon sehen minggin tog men, piyabangge suwon toron men, fit men indokma yaltukmen eneg mo ilig am wirig am turukmu sabiren aruhu.

¹⁰Tog aptuk angge arimano obog toho yaltuk lamuhup li Israel inap arimanowen farema e wirik laruk lamuhup fug. Ari roho hun Gog umalikisi menen Israel inap enengge hulul ulug waharukmen Israel inaben hebeloho it enenggengge hilahup. An HINIKNI suwon Allahn nele aru uruk lahi.

¹¹O ino sambil hun Gog wareg angge o Israel kinangma saluhup ambeg ulug Anden tonggo unuk ’Ap Luharoho Laruk Sili’ suwalehon ino hiyag isahuk. Hiyag isahuk ambeg ino ik Il Warehon yali fil weregma Gog umalikisi mondoko werehon men kinangma sal enebuhup. Sal enebuhup ambeg ino su rehen ap luharoho la fug teg lamuhupmu tonggo ino unuk keron ’Gog Umalikisi Sili’ suwaleg laruhu.

¹²Ap seliyon wareg angge arimanowen kinang obog toho siyahap tuhup tohon ulug Israel inap ap angge obog tohowen wareg angge arimano kinangma sal eneptukmen eneg pikalem sabiren aruhu. Fobik An palimu welahiyon inam aruhuk sambil ino it sal enebuhubon ununuk palimuwap enebuhuk. An HINIKNI suwon Allahn nele aru uruk lahi.

¹⁴Pikalem sabiren aruhumu Israel inaben it sehelimuwon en eneptuk lit ap waroho lin-lan urukon arimanowen nit nenengginang siyahap tuk nowen ulug likiya hupmu Israel kinang walinggoho yami enebil laruk lamuhup ulug mon enebuhup.

¹⁵Mon enebuhubon arimanowen kinang atogman atogma yami ril larukmen ap warehon uwag hiyahaku halug hiyahaku ambeg enehangge eke hutuk tebelug lahu. Lahureg weregma ap sal eneptukon arimano wamuhupteg ap uwag ino oko walug ’Gog Umalikisi Silimu’ salik lahup.

¹⁶Ari roho turuk lit kinang siyag aruhu rohon ulug ap waroho lin urukon obog toho sal eneptuk lamuhup. Sal eneptuk ambeg unuk ’Gog Umalikisi Sili’ suwaleg laruhu hag toho o pumbuk eke unuk ’Gog Umalikisi Ibam’ suwaluhup,” ulug hiyag nitisi.

¹⁷Hiyag nitisireg NINIKNI suwon Allahn nin ele an nubam uruk lit, ”Hat ap kinangmon welahenonen suwe eke hag eke hag werehon men wam pak mene farema werehon men hiyag isaruk lit, ’O kema-kema welahep ambehen tom Israel kinangma werehon fene palu arik maniyek! Aben An Allah nolohotman wam waroho esetuk hag toho Anden hit fahet ap warehon arimano isag hisahukmu hiren ununu men enemep men nahup.

¹⁸Aben wam domba, wam kambing, wam sapi seiyon ununu men enemep men naruk hag toho hiren ap enehako roho turuk inap ununu men ap suwon-suwon enemep men nahup.

¹⁹Ari obog toho Anden isag hisahukmu hiren ap ununu sei werehon narukmen eneg henehum ouk atukmu enemep narukmen eneg nenek turuk lamuhup.

²⁰Hiren wam kudayet ap enemberimu lahalug larukonet ap sehen senehonet ununu enemep men henehum ouk toho nahuben maniyek!’ imihin,” ulug NINIKNI suwon Allahn hiyag nitisi.

²¹Hiyag nitisireg nin ele uruk lit, ”Anden Gog umalikisi men alem angginon unubam umbuhukmu ap o pumbuk obog tohowen An nebe umbagpag turuk lit nine roho turuk lahiyon yet niyahup.

²²Yet niyahup sambil ino Israel inaben nit NINIKNI Allah wereg ulug onoluk aruhureg fobik oho enepeleg aruhu fug.

²³O ino sambil ap o pumbuk kema-kema werehon inindi anggar atuk lit Israel inaben Inikni Allah enembol yig utuk lit siyag ane turuk latuson fahet Allahn anduhun yig isaruk lit ap seliyon ininggikmu emberisimu Israel inap sehen senehon obog toho unusuruk lit winon ininggik hele waroho imbisik larusa ulug onoluk aruhu.

²⁴Israel inaben An nele ying naptuk lit ininggareg siyahap taruk latusama Anden nambol yig isarikik angge famen

²⁵ketiya An nunuk fanowon palimuwap naptuk lamuhup ulug Israel inap hun Yakuben ondohowonen ondohowon arimano nin hebeloho nindi isaruk lit fanowap enebuhuk. An HINIKNI suwon Allahn nele aru uruk lahi.

²⁶An nebe usa fulu reg lahiyon ap o pumbuk obog toho iniline inam atuk lit An numalikisi Israel inap arimano o pumbuk kema-kema ap seliyon inibam hik-hak isarusa ambehen palu enebuhukteg hondog eneplug waruhukmu ap seliyonen elel eneptuk elehen inindi yuwag toho enengginang fam welamuhup. Wereg lit iren An nele ying naptuk latusa ane inowen alem unubamap taruson fahet wenggel haruk lit ininggali haruk lamuhup.

²⁸Anden it o pumbuk kema-kema hik isarikik nahun inowen nin hebeloho palu enebuhukteg ap misig oho umbusuk fug angge it obog toho suhuloho inibam hondog eneplug waruhuk. Hondog eneplug waruhuk ane ariyen nit NINIKNI Allah wereg ulug onoluk aruhu.

²⁹Onoluk aruhumu Anden nahime fanowon Israel inap enebene pilabik waruhukteg nanduhun yig isa fug angge welaruhuk,” ulug NINIKNI suwon Allahn irisi.