Read Angguruk Yali YEHEZKIEL 4 Bible Online

YEHEZKIEL 4 - Angguruk Yali bible

YEHEZKIEL 4

¹NINIKNI Allahn an nubam ele uruk lit, ”Hat ap kinangmon welahenonen kinang huluwon fam tag toho wirig ahalep eke wamihinteg hat holohotma embelug helep ino fene o pumbuk Yerusalem wirim toho pale femihin.

²Pale femihinteg ap seliyonen pin kuhuk ulug turuk hag toho o ino huk toho kilabehon walinggoho kinang hop til lahalug elehet halog toho siyahap turuk angge walinggoho imbik lamihinteg ap seliyon o sabo wit isamihin.

³Wit isamihinteg ine angge tuwaloho wirihon wamihinteg hat men o pumbuk ino men honggolegma elehet hag toho oho felug o ino pin halog toho kuhuk ulug waling enesug lit horohole o ino fil kilaboho laruhun. Ari roho enehane turuk laruhunmu Israel inaben yet hiyahupteg it unubam teko lahu ane fahet inindi anggar aruhu,” irisi.

⁴Irisireg Allahn nin ele uruk lit, ”Haren Israel inap ik elerukmu werehonen siyag ane turukon ha ruruk lit humbantu hare fil kinangma yinggig lit welaruhun. Israel inaben siyag ane turukmen eneg mo ilig am wirig am turukmu teng nunggul huriken nubam hilag nisanggowen 390 atisiyon wirim toho har oho yinggig lit weregman eneg hup teng nunggul huriken nubam hilag nisanggowen aruhuwen hat hubam emberuk lahi.

⁶Hup teng nunggul huriken nubam hilag nisanggowen aruhumu Yehuda inaben siyag ane turukon ha ruruk lit humbantu pikit fil yinggig lit welaruhun. Yehuda inap alem angginon unubam aruhuwon ha rurukmen eneg mo ilig am wirig am turukmu teng misigmen nubam hilag nuwalen 40 lahuwon wirim toho har oho humbantu pikit fil yinggig lit weregman eneg hup teng misigmen nubam hilag nuwalen aruhu.

⁷Kinangma yinggig laruhun li haren o Yerusalem waling enesug lit horohole o ino fil kilaboho laruhun ane umbusuk fug angge hunusuhuk ulug hinggik leho lit welaruhun. Hinggik leho lit hit Allah unuk fam siyag amuhup ulug hiyag isaruk laruhun.

⁸Hat hebe hebel am fug angge humbantu roho yinggig lit weregman eneg o Yerusalem walinggig laruhun li obog aruhuwen Anden hat hebe hele wat hapmin.

⁹Hat humbantu hare fil yinggig lit naruk laruhunon roti anggen gandum jelai jawan sekoi men nali men sinali men wamihinteg kubag fam mangno roho wirag tamihin.

¹⁰Wirag tamihin angge arimano likiya hupmu tot-tot naruk lit hup misig fam narukon ulug anggin wirim turukon we itik angge 230 gram wirim toho wirim haruk laruhunon arimano hup misig-misig naruk laruhun.

¹¹Roti anggen arimano naruk lit hup wal-wal ik fili toron fam eneg naruk laruhun,” irisi.

¹²Ari irisireg Allahn nin ele uruk lit, ”Aben yet halusan it enelukeman roti anggen arimano ap yog lilohon fam indok munggalug wiratmihin.

¹³Haren timihin hag toho Israel inap arimanowen oho o kema-kema Anden hik-hak isahuk ambehen roti anggen wirag taruk lit Anden na fug ulug usayap tiyahon saliyog naruk lamuhup,” ulug hiyag nitisi.

¹⁴Hiyag nitisimu anden nele uruk lit, ”Yihi, Allah NIKNI, an nebe totman wam pak suwe wareg angge ano olomeneyen watukon ano naruk lit siyahap tarikik fug. Na fug ulug usayap tinahon misihim oho an nambilik elma kirisi fug,” irikik.

¹⁵Irikikmu Allahn, ”Ari halug ap yog ubalma wam sapi yog wamihinteg indok munggaltug roti anggen wirag tamihin,” irisi.

¹⁶Irisireg nin ele uruk lit, ”Ap kinangmon welahenon, roti anggen o Yerusalem inaben forohowon arimano Anden elehap tuhukmu inindi fit aruhumu roti anggen anggin wirim turuk angge fam embelug we itik angge wirim haruk lamuhubon naruk lit ik oho fili toron eneg naruk lamuhup.

¹⁷Iren siyag ane turukon fahet ik men suburu men eleg atukmu ap obog toho inine elehen siyag amuhup,” irisi.