Read Angguruk Yali YEHEZKIEL 40 Bible Online

YEHEZKIEL 40 - Angguruk Yali bible

YEHEZKIEL 40

¹Nit o Babilonia kinang fam weregma mo ilig am wirig am turukmen hinahaneg fimahenam larisimu o Yerusalem pin halog toho kurusa sambilen mo nunggul huriken larisi. Mo ino fam pikalem tamon inam atisimu hup numenam nohorukukmu NINIKNI Allah inggik ineyonen sen naptisimu

²anden fulu roho yet harukmen Allah inggik inowen an Israel kinangma og naptug larisireg tom yaron fam pilap naptisi. Pilap naptisimu anden yet harukmen tom ino ik wiriko fil o pumbuk hahon eke wirigmu yet harikik.

³O pumbuk elehet walinggoho ohowon sokolma ap ebe tembaga umbagpag turuk hag toho umbagpag turuk lit unduhuk latisi. Unduhuk lit inggiken hele eke men e yat toho wirim turuk angge eke men seneg latisi.

⁴Ap inowen an nubam ele uruk lit, ”Hat ap kinangmon welahenon, anden mun angge man angge hat hubam unug hiyaminen At inggik inowen hat tuma og haptug waha. Ari fahet anden unug hiyaminon obog toho hilen fuki roho kim haruk lit hisanggowen fano holmihinteg hindimuwen wenggel hamihin. Mun angge man angge haren yet hamihinon fahet Israel inap hiyag isahun,” ulug hiyag nitisi.

⁵Hiyag nitisimu anden yet harukmen Allah ibam elehet walinggoho ohoma yet harikik. Elehet ino ap inowen e inggiken seneg latisiyon fam wirim harukmen lahabeg wirim tirisiyon men ayuhuk fil wirim tirisiyon men ambi reg lit il hinahan tegma wirim tirisi.

⁶Wirim tirisireg elehet walinggoho ohowon sok yali fil werehon iraham lalug yal laharisireg sok kembilik wirim harukmen ayuhuk fil wirim tirisiyon il hinahan teg latisi.

⁷Ari regma sok foroho inap unduhuk ambeg ulug sok ino ambolma inggik pikit fil hare fil wal taneg hili hinahan wirig latisi. Hili itano ilihig wirim turukon men nunggulig wirim turukon men ambi reg lit il hinahan teg latisi. Ubahat hili roho wirihon wal taneg ayuhuk wirim turukon il piren teg latusa. Hili itano iniraham Allah ibam fil sok eke wirigmu kembilik ayuhuk fil wirim turukon il hinahan teg latisi. Sok ino ambol fil o sema eke ahandip toho wirigmu ap inowen wirim harukmen ilihig wirim tirisiyon il uhan teg latisi. O sema ubahat Allah ibam fil wirihon ayuhuk fil wirim tirisiyon il misig wirim teg latisi.

¹¹Sok hili itano enelukema wirihon ino ele ilihig wirim turukon il falfaliken tegma fihilangge il fuwaben teg latisi.

¹²Hili falfaliken itano wal taneg enelukema elehet lahabeg wirim turukon we tot teg il misig pul ke minggiroho heg teg latisi.

¹³Hili itano ubahat sel fil wirihon famen tulug hili fuma fil wirihon ubahat fam wirim til larukmen yat toho wirim turukon il nisanggowen teg latisi.

¹⁴O sema inowen Allah ibam owahalma kurukon sok eke wirigmu uwag lahabeg wirim turukon il numen tegma sok ino fuma-fuma elehet Allah ibam huk toho kilabehon men ahandip teg latisi.

¹⁵Sok sel fil wirihon ino famen tulug sok Allah ibam owahalma kurukon fam wirim harukmen yat toho wirim turukon il teng misig teg latisi.

¹⁶Hili falfaliken itano ubahat sel fil wirihon men o sema ubahat men fene keyenteg fo reg latisi. Uwag hili falfaliken itano honggolegma pilabehon fene hesenggengge uluwa hahon paleg latisi.

¹⁷Ari obog toho unug niyarisireg ap inowen an hondog naplug sok ele keyen elehet selmon huk toho kilabeg ambeg larisi. Larisimu anden walinggoho yet harukmen elehet alma hili teng misigmen nubam hilag hinahan 30 ahandip toho wirigmu alukema pila helep iya roho wirig latisi.

¹⁸Pila ino elehet alem ke eneg wirigmu elehet huk toho kilabeg ambeg pulmu kolo reg latisi. Elehet selmon apma regma elehet undamon emberimu welatisi.

¹⁹Ari regma ap inowen elehet selmon sok yali fil werehon famen elehet undamon sokolma yat toho larukon wirim harukmen il teng piren teg latisi. Wirim harisireg an hondog naplug elehet sok ik eleruk fil werehon iraham larisi.

²⁰Sok ino sok yali fil wirihon ino hag toho wirigmu ap inowen wirim harukmen ilihig wirim tirisiyon il teng misig tegma nunggulig wirim tirisiyon il nisanggowen teg latisi.

²²O sema men keyenteg fo rehon men hesenggengge uluwa hahon palehon men sok yali fil werehon fam wirig hag toho wirigmu yal il sabiren pog teg latisi.

²³Sok yali fil werehon ino men sok elehet undamon kuruk ambeg eke men onorohole kilabeg wirig latisi hag toho sok ik eleruk fil werehon ino men sok elehet undamon kuruk ambeg eke men onorohole kilabeg wirig latisi. Ap inowen sok elehet selmon kuruk ambehen elehet undamon kuruk ambeg yat toho larukon wirim harukmen il teng piren teg latisi.

²⁴Ari obog toho wirim harisireg ap inowen an hondog naplug sok ik ambut fil werehon iraham larisi. Sok ino sok yali fil wirihon men ik eleruk fil wirihon men hag toho wirig latisi.

²⁷Ap inowen sok ik ambut fil werehon famen elehet undamon kuruk ambeg yat toho laruk ane wirim harukmen il teng piren teg latisi.

²⁸Ari regma ap inowen an hondog naplug sok elehet undamon ik ambut filen kuruk keyen Allah ibam owahalma larisireg sok ino wirim harukmen sok tam wirim harisiyon hag teg latisi.

²⁹Hili men ubahat men keyenteg fo rehon men sok elehet selmon kurukon fam wirig hag toho wirigmu

³¹o sema eke elehet sel filen sok ino fam ahandip toho wirig latisi. Uwag o sema sok fuma-fuma pilabehon fam hesenggengge uluwa hahon paleg latisi. Sok kembilikmu yal il likinen pog teg latisi.

³²Sok ino wirim harisireg ap inowen an hondog naplug sok elehet undamon yali filen kuruk ambeg lalug sok ino wirim harisireg sok ik eleruk fil werehon oho wirim tik larisi. Sok piren itano sok ik ambut fil wirihon hag toho wirigmu o sema wal taneg elehet sel filen sok itano fam ahandip toho wirigmu sok itano kembilikmu yal il likinen pog teg latusa.

³⁸Wam Allah fahet waroho yaltukon ik umatuk ambeg ulug hili eke o sema ik eleruk fil werehon fam ahandip toho wirig latisi.

³⁹Wam arimano men, aben siyag ane tirikik ulug wam walug waharukon men, Allah anggengge paleg lahiyon fahet og itmin ulug wam walug waharukon men watuk ambeg ulug o sema ik eleruk fil werehon elma fuma-fuma wal toho e piren wiroho tuwaleg latisi.

⁴⁰O sema ino sok inggik pikit fil oho hare fil oho elehet alma wal toho e piren wiroho tuwaleg latisi.

⁴¹E tuwalehon itano wam watuk ambeg ulug o sema undama tuwalehonet selma tuwalehonet mangno roho likinen welatusa.

⁴²E uhan o sema undama wiroho tuwalehon itano enemberimu wam watuk angge men wam unu men emberuk ambeg ulug helep fele rehon fam wirigmu e itano wirim harukmen lahabeg wirim turukon il misigmen minggiroho weregma ilihig wirim turukon men nunggulig wirim turukon men ambi reg lit il misig teg latisi. E itano walinggoho hondongge fene nungge-nungge suknoho foroho ambeg ulug ayeg angge horohon hak teg latusa.

⁴⁴Ap inowen an hondog naplug elehet undamon huk toho kilabeg ambeg kirisimu anden yet harukmen sok ik eleruk fil werehon iraham hili eke wirigmu sok ik ambut fil werehon iraham oho hili eke wirig latisi.

⁴⁵Wirigmu ap inowen an hiyag nutuk lit, ”Sok ik eleruk fil werehon iraham hili ari imam Allah ibamen yabuk eke hag eke hag turukon fahet wereg.

⁴⁶Sok ik ambut fil werehon iraham hili ari imam hubu lahaptuk ambeg haltukon fahet wereg. It arimano hun Lewi inowen ondohowonen ondohowon Zadoken endetfahon wereg. It arimano eneg NINIKNI Allah olohotma laruk lit hubu lahabuk teg,” irisi.

⁴⁷Ari irisireg ap inowen elehet undamon huk toho kilabeg ambeg wirim harukmen ilihig wirim tirisiyon men nunggulig wirim tirisiyon men ambi reg lit il teng piren teg latisi. Elehet huk toho kilabeg ambeg ilanma Allah ibam alukema hubu lahaptuk ambeg wereg latisi.

⁴⁸Ari regma ap inowen an hondog naplug yal il numen lahalug o sema Allah ibam sokolma wirihon elma larisireg o ele ke wirim harukmen ilihig wirim tirisiyon il numen tegma nunggulig wirim tirisiyon il falfaliken teg latisi. Sok kurukon wirim harukmen yat toho wirim tirisiyon il sabiren teg latisimu ubahat sok inggik pikit fil wirihon men hare fil wirihon men yat toho wirim tirisiyon wal toho il piren tegma ayuhuk fil wirim tirisiyon il pirenen minggiroho wirig latisi. Sok kurukon alukema inggik pikit fil oho hare fil oho uwag piren pilabeg latusa.