Read Angguruk Yali YEHEZKIEL 41 Bible Online

YEHEZKIEL 41 - Angguruk Yali bible

YEHEZKIEL 41

¹Ari regma ap inowen an hondog naplug Allah ibam hili pulmuwon elma kirisireg sok kembilik ino wirim harukmen yat toho wirim tirisiyon il fuwaben teg latisi. Ubahat sok fuma-fuma wirihon yat toho wirim tirisiyon wal toho il piren tegma ayuhuk fil wirim tirisiyon il hinahan teg latisi. Ari obog toho wirim harisireg hili pulmuwon ino wirim harukmen ilihig wirim tirisiyon il likin fimahen, nunggulig wirim tirisiyon il numen wirim tirisi.

³Wirim tirisireg ap ino amu hili undamon elma kirisireg sok kembilik ino wirim harukmen yat toho wirim tirisiyon il hinahan teg latisi. Ubahat sok fuma-fuma wirihon yat toho wirim tirisiyon wal toho il hinahanen minggiroho wirim tegma ayuhuk fil wirim tirisiyon il misig welatisi.

⁴Weregma hili undamon ilihig wirim tirisiyon il numen tegma nunggulig wirim tirisiyon oho hili pulmuwon nunggulig wirim tirisiyon hag toho il numen teg latisi. Ari obog toho wirim tirisireg ap inowen an nubam ele uruk lit, ”Hili aru Mondabi Fanoma wereg,” ulug hiyag nitisi.

⁵Hiyag nitisireg ap inowen Allah ibam ubahat wirim harukmen ayuhuk fil wirim tirisiyon il hinahan teg latisi. O suwon fuma fil eke, fuma fil eke, ambol fil oho o toron silmiya roho wirig latisi. O toron itano wirim harukmen nunggulig wirim tirisiyon il piren teg latisi.

⁶O toron itano altap toho wirig lit altap apmon, pulmuwon, palimuwon fam wal taneg hili teng misigmen nubam hilag hinahan 30 welatusa. O toron ino wituk lit pila o suwon fam keyenteg teg laruhu rohon fano roho ahandip teg lamag ulug o suwon ubahat sel ke humbat wareg latisi.

⁷Humbat warehen altap apmon wirim angge nunggulig wirim turukon il we tor angge, pulmuwon nunggulig wirim turukon we tot yat teg, palimuwon nunggulig wirim turukon yat teg latisi. Altap apmon famen palimu laharukon fahet yal eke pog teg latisi.

⁸O toron sok kurukon misig ik eleruk fil weregma misig ik ambut fil welatisi. O ino ubahat selmon ayuhuk fil wirim turukon il piren abirangge misig minggiroho wirim teg latisi. Allah ibamet o toron walinggoho wirihonet ubule emberimu wirig latisi. Ubule ino wirim harukmen lahabeg wirim turukon il hinahan teg latisi. Nunggulig wirim harukmen ubule ino Allah ibam fuma-fuma pisan toho il pirenen minggiroho wirim teg latisi. Ubule ino walinggoho sili hilinggig latisi. Sili ino wirim harukmen nunggulig wirim turukon il numen teg latisi.

¹²Allah ibam hubula fil sili ino ilanma o eke wirig latisi. O ino wirim harukmen nunggulig wirim turukon il teng misigmen nubam hilag num fimahen 45 meter, ilihig wirim turukon il teng misigmen nubam hilag likinen 35 meter wirim tegma o ino ubahat ayuhuk fil wirim turukon il pirenen minggiroho wirim teg latisi.

¹³Ap inowen Allah ibam obog toho wirim harukmen Allah ibamet o toron fuma-fuma ahandip heheg wirihonet yat toho wirim turukon il teng piren, Allah ibamet sili walinggoho werehonet nunggulig wirim turukon il teng piren, o Allah ibam ambolma wirihon nunggulig wirim turukon il teng piren, o inowet sili alukema werehonet ilihig wirim turukon il teng piren wirim teg latisi. Allah ibam hili pulmuwon men undamon men o sema silmiya roho wirihon men

¹⁶hondongge pilaman keyenteg fo regma e kahalehon fam wirig latisi. Keyenteg fo reg ambeg arimano labuk teg latusa.

¹⁷O elma pila famen tulug sok emberimu hondongge obog toho fene walinggoho hesenggengge malaikat enerehabul wilibihon hahon men uluwa hahon men irar heheg paleg latisi. Malaikat arimano wal taneg onorohole piren tegma onorohole misig ap orohole hahon ino uluwa fuma werehon fil, eke olomene orohole hahon uluwa fuma werehon fil yihik latusa.

²¹Allah ibam sok uwag itano indit uhan teg latusa. Hili unuk Mondabi Fanoma suwalehon alukema

²²hubu lahaptuk ambeg hahon unduhuk latisi. Hubu lahaptuk ambeg ino ambiyang fuma-fuma weregma uyug men umbangguwag men e fam wirigmu lahabeg wirim turukon il misigmen minggiroho regma ilihig wirim turukon men nunggulig wirim turukon men ambi reg lit il misig teg latisi. Ari regma ap inowen an nubam ele uruk lit, ”E tuwalehon aru NINIKNI Allah olohotma tuwaleg,” ulug hiyag nitisi.

²³Allah ibam hili suwon sok kurukon men hili Mondabi Fanoma kurukon men wal taneg piren teg latusa.

²⁴Sok ele misihon famen piren wirihon itano aben husurukmu yinggil atuk lamag ulug pul ke ahandip toho wirig latusa.

²⁵Sok itano fene hesenggengge hondongge fam palehon hag toho malaikat men uluwa men wirim toho hesenggengge oho latisi. Allah ibam alukema o sema silmiya roho wirihon ino ungga e fam saleg latisi.

²⁶O sema ubahat fuma-fuma werehon keyenteg fo regma hesenggengge uluwa hahon ebene paleg latisi.