Read Angguruk Yali YEHEZKIEL 42 Bible Online

YEHEZKIEL 42 - Angguruk Yali bible

YEHEZKIEL 42

¹Ap inowen an hondog naplug Allah ibam irahamen ik eleruk fil laruk lit elehet selmon huk toho ambeg kirisireg o Allah ibam ambolma wirihon ino fuma fil weregma o eke iraham larisi.

²O ino umbantu yaron ik eleruk fil weregma yat toho wirim turukon il teng piren wirim tegma nunggulig wirim turukon il teng misig teg latisi.

³Ari regma sili fuma, pila helep iya roho wirig ambeg fuma weregma o ino pulmu wereg lit altap toho wiri fik laharusa.

⁴O ino iraham ik eleruk fil kalem eke yaho latisi. Kalem ino yat toho wirim turukon il teng piren wirim tegma nunggulig wirim turukon il fuwaben teg latisi. Sok olma kurukon itano ik eleruk fil welatusa.

⁵O ino altap toho wirigmu ubahat sel ke humbat warehen altap apmon su regma pulmuwon we tot su regma palimuwon tot teg latisi. Hili elehet alma walinggoho wirihon ubahat elegman uwag eneg pilabeg latusa hag toho o ino fam pilabeg latusa fug.

⁷Kalem o ino iraham yahowon ilanma elehet oho latisi. Elehet ino yat toho wirim turukon men o ino yat toho wirig ane men wirim teg lit il teng piren teg latisi. Elehet ino pul keyen fuma o ik eleruk fil wirihon fam kilabegma fuma sili hilinggig latisi.

⁹Ap yali filen elehet huk toho oho keyen waharuk lit kalem inowen o ino fam kuruk.

¹⁰Ik ambut fil oho o Allah ibam ambolma wirihon ino fuma weregma o eke wirig latisi. O ino elehet walinggoho ohowon fam ahandip toho wirigmu

¹¹o ino iraham kalem eke yaho latisi. O ino wirig ane men o ik eleruk fil werehon wirig ane men ambi reg latisi.

¹²Ambi regma ap yali filen waharuk lit kalem elehet ilanma ohowon feneyen o ino iraham lalug sok ik ambut fil werehon ele keyen o ino fam kuruk.

¹³O ino iraham larukukteg ap inowen an nubam ele uruk lit, ”O ik ambut fil wirihon tu men ik eleruk fil wirihon indi men mondabi fano rehen ap saplangge kuk fug teg. Imam NINIKNI Allah horogma la rehon arimano eneg o aruma kuruk lit Allah fahet emberuk angge mondabi fanowon arimano minggiroho naruk lit mondabi fano angge winon imbik waharuk. Imbik waharukon tu: suburu Allah fahet emberukon men, aben siyag ane tirikik ulug wam walug waharukon men, Allah anggengge paleg lahiyon fahet og itmin ulug wam walug waharukon men minggiroho o fanoma tiya imbik waharuk.

¹⁴Imam o aruma kurukon arimanowen nin hebeloho wilip amul ulug turuk halug NINIKNI Allah olohotman niniyabuk turuk lit nenesum wan teg laheyon mondabi fano rehen aben saplangge seneg lam fug ulug nonggoloho embelug sum winon wan taruk lit o aruma embeselug Allah umalikisi elehet huk toho kilabeg ambeg luhaloho weregma laruk,” ulug hiyag nitisi.

¹⁵Ap inowen Allah ibamet elehet huk toho kilabeg ambeg itanowet obog toho wirim angge fam wirim tirisireg an hondog naplug sok yali fil werehon ele keyen wilip atug elehet ohowon walinggoho wirim til larisi.

¹⁶E yat toho wirim angge fam wirim til laruk lit atam elehet yali fil ohowon ino wirim turukmen il teng sohowen teg latisi.

¹⁷Ari wirim tirisireg ap inowen elehet ik eleruk fil ohowon men, hubula fil ohowon men, ik ambut fil ohowon men wirim til larukmen wal taneg yat toho wirim tirisiyon il teng sohowen teg latisi. Elehet ino Allah ebe usa fulu ahun angginang men kinang yuhunon men honggolegma hili reg latisi.