Read Angguruk Yali YEHEZKIEL 43 Bible Online

YEHEZKIEL 43 - Angguruk Yali bible

YEHEZKIEL 43

¹Ap inowen an hondog naplug elehet Allah ibam walinggoho ohowon sok yali fil werehon iraham larisi.

²Larukukteg yet harukmen Israel ninap Ninikni Allah ebe umbagpag turukon yali filen waharukmu yet harukuk. Waharuk lit ik fu waharuk hag toho aplohok tung turukmu At umbagpag turukonen kinang walinggoho werehon obog toho seleg atisi.

³Ari hag toho Allah atam ik Kebar ayegma inam atukmu yet harikikmu fobik o Yerusalem siyahap timin ulug inam arik waharisi. Ari hag toho At ibam horogman oho inam atukmu yet haruk lit norohole sahung toho ying atikik.

⁴Ying atukmu NINIKNI Allah umbagpag turukon ino sok yali fil werehon ino ele keyen ibam kirisi.

⁵Kirisimu Allah hime fanowon inowen an kinangman unduhuk nubahalug elehet undamon huk toho kilabeg ambeg og naplug larisimu anden yet harukmen NINIKNI Allah umbagpag turukon inowen ibam o ele ke mondabi seleg teg latisi.

⁶Seleg tegma ap an hondog naplug waharisiyon ino an niraham unduhukmu anden hol harukmen At ino ibamen ele nubam urukmu hol harikik.

⁷Hol harukmu hiyag nutuk lit, ”Hat ap kinangmon welahenon, An lehoma heriyeg lahi ambeg tu wereg. An nuyug emberuk lahi ambeg o tuma wereg. An tuma heriyeg lit Israel inap enesehelimu mondabi welaruhuk. Welaruhukmu Israel inap onowesi menen An numbahalug unumbasi wel eneptuk lit onowesi suwon wareg angge o tu horogman kinangma sal eneptuk lit An nunuk fanowon siyahap nabuhup fug.

⁸Onowesi arimanowen it inibam An nibam iraham wituk lamuhup fug. Sok iren tohon sok Anden tohon iraham ke yendebuhup fug. Israel inaben ininggali ane eneg turuk lit An nunuk siyahap naptuk latusa ane fahet An nindimu nolok haruk lit siyahap eneptikik angge famen

⁹iren nin hebeloho An nubam wenggel niyaruk lit onowesi wareg angge An niraham emberuk ane umbusuhup halug An it sehelimu mondabi welaruhuk.

¹⁰Hat ap kinangmon welahenonen An Allah nibam aru fahet Israel inap hiyag isahun. Hiyag isahunmu iren o tu fano roho wirig ane fahet wenggel haruk lit nungge fahet o aru ngi ahun ele ying turuk latukuk ulug ininggali haruk lamuhup.

¹¹Ininggali haruk lamuhup halug haren An nibam walinggoho wereg anggeyet kuruk ambehet wilip atuk ambehet iniline ilit toho hahare fuhunteg Allahn An nibamen tu men ari men turuk lamuhup ulug komo neneptisiyon hinine roho seneg lit Aren emberisiyon hikit toho turuk lamuhup ulug hiyag isahun.

¹²An nibam fahet emberuk lahiyon tu: Nibam tom tu atelma werehon men elehet huk toho kilabeg ambeg men obog toho mondabi fano rehen ap saplangge kuruk lamuhup fug ulug komo heneptuk lahi,” irisi.

¹³Allah fahet hubu lahaptuk ambeg wirim harukmen samaling walinggoho palehon pilabeg wirim turukon men nunggulig wirim turukon men il misigmen minggiroho wirim teg latisi. Samaling ino ilan ke elehet il horog toho oho latisi.

¹⁴Hubu lahaptuk ambeg ino altap toho wirig lit ubahat humbat wareg latisimu samaling famen altap tamon fam lahabeg wirim turukon il misig teg latisi. Altap pirenehon humbat wareg ambeg nunggulig wirim turukon il misig minggiroho wirim tegma altap pirenehon lahabeg wirim turukon il piren teg latisi. Altap hinahanehon humbat wareg ambeg nunggulig wirim turukon oho il misig minggiroho wirim tegma

¹⁵lahabeg wirim turukon il piren teg latisi. Altap hinahanehon ino emberimu hubu lahaptuk ambeg wirig. Hubu lahaptuk ambeg fuma-fuma ambiyang uhan wilibig latisi.

¹⁶Altap hinahanehon ino ilihig wirim turukon men nunggulig wirim turukon men ambi roho il falfaliken teg latisi.

¹⁷Altap pirenehon ino ilihig wirim turukon men nunggulig wirim turukon men ambi roho il sabiren teg latisi. Samaling walinggoho palehon nunggulig wirim turukon il misig minggiroho wirim teg latisi. Samaling ino ilanma elehet horog toho ohowon nunggulig wirim turukon il horog toho wirim teg latisi. Hubu lahaptuk ambeg yali filen yal eke pog teg latisi.

¹⁸Ari regma NINIKNI suwon Allah inowen an nubam ele uruk lit, ”Hat ap kinangmon welahenon, Anden hiyag hitminon tu holeg lamin! Hubu lahaptuk ambeg aru obog toho wiri fuhupteg hubu lahaptuk lamuhup ane men mep hilili feruk lamuhup ane men fahet emberuk lahiyon tu:

¹⁹Hun Lewi inowen ondohowonen ondohowon Zadoken endetfahon imam Allah olohotman yabuk turukon arimanowen hubu lahaptuk ambeg siyag angge ubam tag tehon wam amep fam elehap tukag ulug haren wam sapi eke og isahun.

²⁰Og isahunmu iren wabuhupmu haren hubu lahaptuk ambeg ino fanowap timin ulug mep tor angge oko walug hubu lahaptuk ambeg ambiyang uhan fima-fima werehon fene men altap hinahanehon indit uhan fene men elehet samaling ilanma ohowon fene men are rebehun.

²¹Are rebehunteg wam sapi eke ap og isahunmu Allah ibam walinggoho elehet oho ambeg embeselug walug lahupteg wam waroho yaltuk lamuhup ulug umbuhup ambehen indokma yale fusuhup.

²²Likiyamon wam kambing hunon siyag teg elehon eke wahunteg imam inap arimano og isahunmu sono turukuk hag toho tul ulug wam ino amep fam siyag angge hubu lahaptuk ambeg tag tehon elehap tuhup.

²³Elehap tuhupmu wam sapi kabiniyon siyag teg elehon eke men wam domba hunon siyag teg elehon men An HINIKNI Allah nolohotma walug waruhunmu imam arimanowen wabuhupteg saho foloho indokma yaltuk lit hubu lahabuhup.

²⁵Ari turuk lamuhup ane hikit toho haren siyag angge hubu lahaptuk ambeg tag tehon eleg amag ulug likiya hupmu wam siyag teg elehon kambing eke, sapi kabiniyon eke, domba eke waroho hubu lahaptuk laruhun. Ari roho turukmen eneg hup sabirenam aruhu.

²⁶Ari hag toho imam inap arimanowen oho siyag angge hubu lahaptuk ambeg tag tehon elehap turukmen eneg hup sabirenam aruhumu fanowap turukuk ulug

²⁷o likin famen tulug likiya hupmu hubu lahaptuk ambeg ino emberimu wam hiren walug waharuk lamuhubon waroho hubu lahaptuk lit wam winon An nolohotman esetuk lamuhupmu Anden amben fano peruk laruhuk ulug An HINIKNI suwon Allahn uruk lahi,” irisi.