Read Angguruk Yali YEHEZKIEL 44 Bible Online

YEHEZKIEL 44 - Angguruk Yali bible

YEHEZKIEL 44

¹Ari irisimu ap inowen an hondog naplug suhuloho Allah ibam elehet selmon huk toho kilabeg ambeg sok yali fil werehon iraham larisimu anden yet harukmen sok ino lareg latisi.

²Laregma NINIKNI Allahn an nubam ele uruk lit, ”An Israel hinap HINIKNI Allah sok aru ele keyen hebeloho nibam kik wahi angge re laregman eneg welaruhumu ap misihen oho husoho kuhu fug.

³We ap suwon inowen Allah olohotman wam namin ulug sok aru irahamen heriyeg laruhu. Hur arik lamin ulug elehet huk toho kilabeg keyen sok kuruk ambeg o sema wirihon elma kuhu,” ulug hiyag nitisi.

⁴Hiyag nitisimu ap inowen an hondog naplug sok ik eleruk fil werehon ele keyen Allah ibam alukema larisimu anden yet harukmen NINIKNI Allah umbagpag turukon inowen ibam o ele ke mondabi seleg tegma yet harikikteg norohole sahung toho ying atikik.

⁵Ying atikikmu NINIKNI Allahn an nubam ele uruk lit, ”Hat ap kinangmon welahenon, hilen yet hamihinon men hisanggowen holmihinon men hindimuwen fuki roho wenggel hamihin. Ap sa An nibam kurukon men kuk fug tehon men nibamen tuk teg ane men fahet hiyag hitmin.

⁶Hiyag hitminmu haren Israel inap An nele ying naptukon arimano hiyag isahunon tu: NINIKNI suwon Allahn ele urukon tu holeg lamek! Hit Israel hinaben hininggali ane til-wil noruk lahebon umbusuhup!

⁷Ap pohon enembilahap paleg eleg lit inindimuwen oho enembilahap paleg elehon arimano hiren hondog eneplug An nibam kirikipteg it weregma wam sei men amep men Allahn namisi ulug An nolohotma emberuk latikip. It iniline emberuk latikip ane ariyen Allah men nininggik ahandip toho welamuhuk ulug sali imbibahon sobir isalug amben siyahon turuk lit An nibam siyahap tirikip.

⁸Hit hininggarehen An nibamen niyabuk turuk lam angge famen ap pohonen turuk lamuhup ulug mingming eneptuk latikip.

⁹Ari fahet An HINIKNI suwon Allahn uruk lahiyon tu: Ap pohon enembilahap paleg eleg lit inindimuwen oho enembilahap paleg elehon hit sehelimu werehon misig oho An nibam fanowon fam kuruk lamuhup fug.

¹⁰Kuhup fugmu Lewi inaben it unubalma An nibamen iniyabuk turuk lamuhup. Israel inaben An numbahalug unumbasi wel eneptuk latusama Lewi inap arimanowen oho enembol yig nutusa. Yig nutusa ane ariyen alem unubamap taruson ino ha ruruk lit

¹¹ap pohon arimano unubalma An nibamen yabuk eke hag eke hag turuk lit sok kurukon foroho lamuhup. Foroho lit wam aben An Allah nubahet walug waharukon ware felug it let eneptukmen eneg welamuhup.

¹²Lewi inap arimanowen Israel inap unubahet nunumbasi ulug wel eneptukon fahet hubu lahaptukmu Israel inap it onombolim laruk lit siyag ane anggolo turuk latusama An ninggik leho lit tem toho uruk lahiyon tu: Lewi inap ininggarehen alem angginon unubamap taruk latuson ha ruruk lamuhup.

¹³Iren An nolohotma unduhuk lit imamen turuk ane turuk lamuhup fug, Anden angge mondabi fanowon arimano senetuk lamuhup fug. Iren amben siyahon eneg turuk latuson ambiyangma ininggali haruk lamuhuben

¹⁴An nibamen yabuk eke hag eke hag turuk lamuhup ulug emberuk lahi.

¹⁵Israel inaben An numbahalug siyag ane til-wil norukmu hun Lewi inowen ondohowonen ondohowon Zadoken endetfahon imam arimanowen enembol yig num fug angge An nibamen yabuk turuk latusa. Ari fahet iren eneg imamen turuk ane turuk lit An horogma watlug wam sei men mep men nolohotma emberuk lamuhup ulug An HINIKNI suwon Allahn uruk lahi.

¹⁶Iren eneg An nolohotma hubu lahaptuk lit nibam elma kulug niyabuk turuk lamuhup.

¹⁷Imam arimanowen sum sulumon eneg wan teg lit elehet undamon huk toho kilabeg ambeg kuruk lamuhup. Sum wam domba oruk fam yihikon wan turuk lit elehet huk toho kilabeg ambeg men Allah ibam menen yabuk turuk lamuhup fug.

¹⁸Sum inahan turuk asum wan teg eleg angge sum sulumon ununggulmu langguk tarukon men unuyugmuwon men wan turuk lit yabuk turuk lamuhup.

¹⁹Imam arimanowen nin hebeloho wilip amul ulug turuk halug NINIKNI Allah olohotman yabuk turuk lit nenesum wan teg laheyon mondabi fano rehen aben saplangge seneg lit siyahap tahup tohon ulug nonggoloho embelug sum winon wan taruk lit o aruma embeselug Allah umalikisi elehet huk toho kilabeg ambeg luhaloho weregma laruk lamuhup.

²⁰Onoruk paleg eleg angge welamuhup fug, fili fam oho heroho paleg lam fug angge hundig-hundig onoruk atog eneg paltuk lamuhup.

²¹Ik olokon nalug Allah ibam elehet undamon huk toho kilabeg ambeg kuruk lamuhup fug.

²²Hiyap yuwohon men ahunen embeserukon men hila fug angge Israel hiyap tuhumon ano hiyap imamen lin isarukon ano hilaruk lamuhup.

²³Imam arimanowen tu Allah men wirim teg, ari wirim teg eleg ulug haltuk lit ap fanowap eneptuk angge tu, ap siyahap eneptuk angge tu ulug onoluk aruhuwen An numalikisi hiyag isaruk lamuhup.

²⁴Anden tu men ari men turuk lamuhup ulug komo heneptik iyahon hikit toho alem haloho emberuk lamuhup. Numalikisiyen An wel naptuk sambil fahet imbiyahon inine roho seneg lit o sabir angge fahet hiyag isarik iyag ane hikit toho turuk lamuhuben yet enesug lamuhup.

²⁵Siyag angge nunubam tag aruhu rohon ulug ap waregma lahup fug. We inikni, inisinga, enemloho, enehaloho, enere, enerek ahun elehon eneg war atuk lamuhup halug iniraham laruk lit sen eneptuk lamuhup.

²⁶Sen eneptukmu siyag angge unubam tag atukon elehap tuhupteg ininggik winag harukmen o sabirenam aruhu.

²⁷O sabirenam aruhumu nin hebeloho Allah iyabuk timinen siyag angge nubam tag atisiyon mondabi eleg amag ulug wam waroho hubu lahabuhu halug eneg Allah ibam elehet undamon huk toho kilabeg ambeg kuhu. An HINIKNI suwon Allahn nele aru uruk lahi.

²⁸Imam arimano kinang ngi roho welam fug angge we An nubam eneg welamuhuben Israel kinang fibir isaruk lamuhup fug.

²⁹Aben roti anggen An nubahet imbik waharukon men, aben siyag ane tirikik ulug wam walug waharukon men, Allah anggengge paleg lahiyon fahet og itmin ulug wam walug waharukon men Israel inaben Allah fahet embemin ulug sali emberuk angge arimano obog toho minggiroho imam naruk lamuhup.

³⁰Suburu fanowon tam yahaltukon men, An nubahet imbik waharuk angge fanowon men, roti anggen fanowon tam paltukon men imamen naruk lamuhuben og isaruk lamuhupmu Allahn hit hinibam fano foroho laruhu.

³¹Suwe wam pak mene wareg angge men olomeneyen waroho senggeltukon men imam arimanowen naruk lamuhup fug,” ulug hiyag nitisi.