Read Angguruk Yali YEHEZKIEL 45 Bible Online

YEHEZKIEL 45 - Angguruk Yali bible

YEHEZKIEL 45

¹Hiyag nitisireg NINIKNI Allahn an nubam nin ele uruk lit, ”Hiren enehangge hik turuk lit Israel kinang nin hebeloho fibir amuhup halug NINIKNI Allah fahet ulug kinang yat toho wirim tuhubon il teng obog sehelet obog 12 kilometer, horog toho wirim tuhubon il teng-teng angge 10 kilometer wirim tuhup. Kinang wirim tuhubon obog toho An aruhuk.

²Kinang ino pulmu An nibam mondabi fanowon ino wiroho wereg. An nibam elehet walinggoho ohowon ilihig wirim turukon men nunggulig wirim turukon men ambi reg lit il teng sohowen 250 meter wirim teg. Elehet walinggoho anggen fil nunggulig wirim turukon il teng misig wirim teg. An nangginang su roho wirim tuhubon ino pul ke minggiri felug wirim turukmen yat toho wirim tuhubon il teng obog sehelet obog 12 kilometer, horog toho wirim tuhubon il teng-teng angge 5 kilometer wirim tuhup.

⁴Kinang fanoma ino imam An nibamen nolohotma yabuk turukon arimano hiyag isahupmu An nibam walinggoho inibam wit taruk lamuhup.

⁵Kinang minggiroho winon ino Lewi inap An nibamen yabuk eke hag eke hag turukon arimano hiyag isahupmu inibam pumbuk wit taruk lamuhup.

⁶Kinang An nubahet umbuhup ambeg iraham kinang eke umbuhup. Kinang umbuhubon ino wirim turukmen yat toho wirim tuhubon il teng obog sehelet obog 12 kilometer, horog toho wirim tuhubon il teng-teng angge 5 kilometer wirim tuhup. Wirim tuhup ambeg ino Israel inap sa-o sa-o inibam wit taruk lamuhup.

⁷Israel hinap honowe suwon fahet kinang An nubahet umbuhubon fuma-fuma og umuhup. Kinang og umuhubon ino hili emberuk lit Israel inap ununggul unuk wal taneg ngi reg ambeg hili umbuhup ane hikit toho hubula fil ik saho ahik ayegma, yali fil Israel kinang hili-hilimu umbuhup.

⁸Hili umbuhup ambeg eneg ap suwon ino ngi reg laruhu. Ngi rehen aret at ubalma An numalikisi fet enesug lamuhubonet kinang Israel inap ununggul unuk wal tanehen tohon ilmig taruk lit An numalikisi enele ying eneptuk lamuhup fug,” ulug hiyag nitisi.

⁹Hiyag nitisireg NINIKNI suwon Allahn nin ele uruk lit, ”Hit Israel inap onowesi suwon welahebon, hiren ap enele ying eneptuk lit unusil laruk lahebon umbusuhup! Ap let eneptuk lit fano ane eneg turuk lamuhup! An numalikisi enengginang famen yanggal eneptuk lahep ane imbisiyek! An HINIKNI suwon Allahn nele aru uruk lahi.

¹⁰Anggin wirim turuk angge fam fano roho wirim turuk lamuhup.

¹¹Suburu anggin wirim haruk ane men ik anggin wirim haruk ane men ambi reg laruhu. Ik anggin wirim haruk angge fam emberukon unuk efa men bat men ambi regma homer misig men efa numen men wirim teg hag toho bat numen men wirim teg laruhu.

¹²Anggin wirim turuk angge fam wirim tulug anggin eleg angge famen anggin ulug henele si uruk lamuhup fug. Anggin wirim haruk angge fam emberukon unuk gera likin fimahen 20 men syikal misig 11 gram men wirim teg laruhu, syikal teng piren men mina misig men wirim teg laruhu.

¹³Hit hininggikmu atukon minggiroho An nibam imbik waharuk lamuhubon tu: Roti anggen paltuk lamuhubon palu teng pirenman nubam hilag falfaliken tebelug palu misig imbik waharuk lamuhup.

¹⁴E zaitun ahaluwe kubag teng uhan fam hinanggo felug kubag misig imbik waharuk lamuhup.

¹⁵Wam domba umalik teng sabiren endetuk lamuhup halug misig imbik waharuk lamuhup. Walug waharuk lamuhup angge arimano minggiroho winon An fahet emberuk lit winon indokma yaltuk lit winon An nolohotman naruk lamuhup. Ari roho turuk lamuhup halug siyag ane hiren turuk lahebon Anden hondo rebeseruk laruhuk. An HINIKNI suwon Allahn nele aru uruk lahi.

¹⁶Hit Israel hinap obog tohowen hininggikmu atukon minggiroho An fahet umbuhup ulug imbiyag angge arimano hit honowe suwon og irik waharuk lamuhup.

¹⁷Og utuk lamuhupmu o sabit sambil men pikalem keron inam atuk sambil men An nubam sembahyang uruk sambil winon men An nolohotma suburu emberuk lit ik hilili feruk lit wam winon esetuk lit winon waroho hubu lahaptuk lamuhuben ap suwon inowen hiren og irik waharuk lamuhup angge arimano An nibam imbik kuruk laruhu. Imbik kuruk laruhu angge arimano imam arimanowen minggiroho winon An nolohotma emberuk lit winon indokma yaltuk lamuhup halug siyag ane hiren turuk lahebon Anden hondo rebeseruk laruhuk,” irisi.

¹⁸Ari irisireg NINIKNI suwon Allahn nin ele uruk lit, ”Hundig-hundig siyag angge An nibam fam tag tehon elehap turuk lamuhuben hiren pikalem tamon ket inam atuk sambil wam sapi hunon siyag teg elehon eke oko walug

¹⁹imam og utuk lamuhupmu imam inowen wam ino ware felug amep tor angge oko walug Allah ibam sok uwag men elehet horohon hubu lahaptuk ambeg walinggoho ohowon indit uhan men elehet undamon sok yali fil werehon uwag fene men are reberuk laruhu.

²⁰O sabirenam aruhumu pikalem ket inam atuk sambil turuk lamuhup hag toho turuk lamuhup. Ari roho turuk lit hinindi pikit toho siyag ane tul puk fug anggeyen siyag ane turuk lamuhubon fahet nin hebeloho An nibam fanowap turuk lamuhup.

²¹Pikalem misihon fam hup nunggul hurikenam atuk sambil wam Paskah esetuk lit henehiyehen yunggultuk lamuhup. Yunggultuk lit roti anggen suwap turuk angge embeselug wiratukon narukmen eneg hup sabirenam atuk laruhu.

²²O Paskah sambil ino Israel inap onowe suwon menen siyag ane turukon Allahn elehap tukag ulug ap suwon inowen wam sapi eke waroho hubu lahaptuk laruhu.

²³Yunggultuk li itano ap suwon inowen likiya hupmu An fahet wam sapi hunon siyag teg elehon sabiren men wam domba hunon siyag teg elehon sabiren men waroho hubu lahaptuk laruhu. Hubu lahaptuk lit siyag ane niren turukukon Allahn elehap tukag ulug wam kambing hunon eke watuk laruhu. Ari roho turukmen eneg o sabirenam aruhu.

²⁴Wam sapi arimano men wam domba arimano men waroho hubu lahaptuk lit wam misig-misig fahet roti anggen fano roho lilibug tehon anggin wirim turukon 12 kilogram men e zaitun ahaluwe kubag hinahan men An nubahet emberuk lamuhup.

²⁵Pikalem sabiron fam hup nuwal fimahen atuk sambil henebe mangno atuk lit henehiyehen yunggultuk lamuhup. Yunggultuk li itano ap suwon inowen wam Paskah esetuk li turuk laruhu hag toho likiya hupmu wam waroho hubu lahaptuk laruhu. Ari roho turukmen eneg o sabirenam aruhu,” irisi.