Read Angguruk Yali YEHEZKIEL 46 Bible Online

YEHEZKIEL 46 - Angguruk Yali bible

YEHEZKIEL 46

¹Ari irisireg NINIKNI suwon Allahn nin ele uruk lit, ”Elehet undamon An nibam walinggoho ohowon sok yali fil werehon ino laregman eneg hup falfalikenam aruhumu o sabit sambil men pikalem ket inam atuk sambil men husuruk lamuhup.

²Husuruk lamuhup sambil arimano ap suwon ino elehet selmon huk toho oho ambehen sok ele keyen kulug sok uwag iraham in arik lahu. Unduhukmu at iline imam arimanowen at fahet wam esetuk lit wam winon waroho hubu lahaptuk lamuhup. Hubu lahaptuk lamuhupmu ap suwon inowen Allah fam sembahyang imin ulug sok kembilikmu orohole han kinangma sahung aruhureg sok ino embeselug wilip atuk laruhu. Ari roho turuk laruhu sambil arimano sok ino husoho weregman eneg mo ubuk urukmu nin hebeloho latuk lamuhup.

³O sabit sambil men pikalem ket inam atuk sambil men Israel inap arimano elehet selmon huk toho kilabeg ambeg sokolma luhal arik waharuk lit NINIKNI Allah ubam sembahyang ul ulug onorohole han kinangma sahung atuk lamuhup.

⁴O sabit sambil ap suwon inowen wam domba heyon falfaliken siyag teg elehon men wam domba hunon siyag teg elehon misig men An HINIKNI Allah fahet waroho hubu lahaptuk laruhu.

⁵Wam arimano waroho hubu lahaptuk lit wam domba hunon ino fahet roti anggen fano roho lilibug tehon anggin wirim turukon 12 kilogram, wam domba heyon fahet roti anggen anggin wirim turukon aren peruk ane hikit toho An fahet emberuk laruhu. Emberuk lit roti anggen anggin wirim turukon 12 kilogram fahet e zaitun ahaluwe kubag hinahan emberuk laruhu.

⁶Pikalem keron inam atuk sambil ap suwon inowen wam sapi hunon siyag teg elehon misig men wam domba umalik falfaliken siyag teg elehon men wam domba hunon siyag teg elehon misig men An HINIKNI Allah fahet waroho hubu lahaptuk laruhu.

⁷Wam arimano waroho hubu lahaptuk lit wam sapi ino men wam domba hunon ino men fahet roti anggen fano roho lilibug tehon anggin wirim turukon 12 kilogram, wam domba umalik fahet roti anggen anggin wirim turukon aren peruk ane hikit toho An fahet emberuk laruhu. Emberuk lit roti anggen anggin wirim turukon 12 kilogram fahet e zaitun ahaluwe kubag hinahan emberuk laruhu.

⁸Ap suwon inowen Allah ibam sembahyang imin puhu halug elehet sok kuruk ambeg o sema wirig keyen kuruk laruhu. Nin hebeloho wilip atuk lit kik waharuk keyen laruk laruhu.

⁹Israel inap arimanowen NINIKNI Allah fam sembahyang uruk lit enehiyehen yunggultuk sambil arimano elehet selmon An nibam huk toho kilabeg ambeg luhal arik waharuk lamuhup halug elehet selmon sok ik eleruk fil werehon ele keyen kik waharuk lamuhubon arimano sok ik ambut fil werehon ele keyen wilip atuk lamuhup, sok ambut fil werehon ele keyen kik wamuhubon arimano sok ik eleruk fil werehon ele keyen wilip atuk lamuhup.

¹⁰It obog toho waharuk lir oho wilip atuk lir oho ap suwon ino it men ambiyeg laruk lamuhup.

¹¹An wel naptuk lit henehiyehen yunggultuk lamuhup ulug imbiyag sambil arimano wam waroho hubu lahaptuk lamuhup halug wam sapi misig men wam domba hunon misig men fahet roti anggen fano roho lilibug tehon anggin wirim turukon 12 kilogram, wam domba umalik fahet roti anggen anggin wirim turukon aren peruk ane hikit toho An fahet emberuk lamuhup. Emberuk lit roti anggen anggin wirim turukon 12 kilogram fahet e zaitun ahaluwe kubag hinahan emberuk lamuhup.

¹²Ap suwon indiyen sebe roho NINIKNI Allah fahet wam waroho hubu lahapmin ano, At olohotman wam eke esetmin ano peruk laruhu halug elehet undamon sok yali fil werehon ino hut umuhupmu o sabit sambil turuk lamuhup ane hikit toho imam arimanowen at fahet wam ino waroho hubu lahaptuk lamuhup ano wam esetuk lamuhup ano. Ari turuk lamuhupmu ap suwon ino nin hebeloho wilip aruhumu sok ino latuk lamuhup,” irisi.

¹³Irisireg NINIKNI Allahn nin ele uruk lit, ”Eke sambil eke sambil likiya eneg subangge roho wam domba mo misig atukon eke An nubahet waroho hubu lahaptuk lamuhup.

¹⁴Wam arimano waroho hubu lahaptuk lit sebe roho roti anggen lilibug tehon anggin wirim turukon 2 kilogram embelug e zaitun ahaluwe kubag misig emberimu hilili feruk lamuhup. Ari hag toho hiren endebuhubonen endebuhubon arimanowen oho An nubahet sebe roho roti anggen men e zaitun ahaluwe men emberuk lamuhup.

¹⁵Eke sambil eke sambil likiya eneg wam domba inowet roti anggenet e zaitun ahaluwet An fahet indokma yaltuk lamuhup,” irisi.

¹⁶Irisireg NINIKNI suwon Allahn nin ele uruk lit, ”Ap suwon inowen at angginang winon amloho eke og uruhu halug amloho ino ngi regman eneg aren endebuhubonen endebuhubon arimano oho ngi roho welamuhup.

¹⁷Ap suwon inowen at angginang winon amingmingangge eke og uruhu halug amingminganggeyen kinang ino senegman eneg Israel hinap obog toho kinang hunumbasiyen lin isibahon ap winonen onggo paltukon hebeloho hilahubon sali horog aruhu. Horog aruhumu kinang ino hebeloho ap suwon ngi reg laruhu. Umalikisi at angginang minggiroho og isahu halug eneg it mondabi ngi regman eneg welamuhup.

¹⁸Ap suwon inowen umalikisi Israel inap yanggal eneptuk lit enengginang hilalug amloho eke og uruhu fug. An numalikisi Israel inap arimano enengginang famen yanggaloho pilili-palala isahup tohon ulug at angginang eneg umalikisi og isaruk laruhu,” irisi.

¹⁹Ari irisimu ap an men larukukon inowen an hondog naplug elehet undamon Allah ibam huk toho kilabehon sok ik eleruk fil werehon ele keyen laruk lit Allah ibam ambolma kebunggalem ik eleruk fil werehon ino keyen o imam inap fahet wirig ibam iraham larisi. Larisimu anden yet harukmen o suwon ino hubula fil hili eke weregma yet harikik.

²⁰Yet harikikmu ap inowen an nubam ele uruk lit, ”Hili ari elman imam arimanowen wam aben siyag ane tirikik ulug walug waharukon men, Allah anggengge paleg lahiyon fahet og itmin ulug walug waharukon men minggiroho it atukon arimano esetuk. Esetuk ambeg ariyen roti anggen aben Allah fahet walug waharukon minggiroho it atukon arimano oho wiratuk. Allah fahet walug waharuk angge arimano mondabi fano werehen selma walug la fug angge o tuwen eneg naruk lamuhup. Selma walug lahup halug ap elehet selmon huk toho kilabeg ambeg luhaloho werehon arimanowen senetuk lit siyahap tahup tohon!” ulug hiyag nitisi.

²¹Hiyag nitisireg ap inowen an hondog naplug elehet selmon huk toho kilabeg ambeg larisireg indit uhan itano yet hil larukmen indit wal taneg elehet huk toho kilabeg ambeg toron eke weregma yet harikik.

²²Elehet huk toho kilabeg ambeg uhan itano wirim harukmen yat toho wirim turukon wal taneg il likin fimahen 20, horog toho wirim turukon wal taneg il nuwal fimahen 15 wirim teg latisi.

²³Elehet itano helep fam ohoma unda fil elehet alma wam esetuk ambeg wirig latusa.

²⁴Anden esetuk ambeg itano yet harukmu ap inowen an nubam ele uruk lit, ”Ap Allah ibamen yabuk turukon arimanowen wam Israel inaben NINIKNI Allah olohotman narukon isag isaruk ambeg tiya wereg,” ulug hiyag nitisi.