Read Angguruk Yali YEHEZKIEL 47 Bible Online

YEHEZKIEL 47 - Angguruk Yali bible

YEHEZKIEL 47

¹Ari ulug hiyag nitisireg ap inowen an hondog naplug hebeloho Allah ibam sok yali fil weregma larisi. Larisimu anden yet harukmen sok kembilik apman ik wilip atisi. Wilip atug Allah ibam ubahat yali fil werehon iraham keyen wiriko fil lalug hebeloho hubu lahaptuk ambeg iraham keyen yali fil nunggulig laruk latisi.

²Nunggulig larukmu ap inowen an hondog naplug elehet sok ik eleruk fil werehon ele keyen wilip atug elehet walinggoho laruk lit sok yali fil werehon iraham larisi. Larisimu anden yet harukmen ik toron ino sok wiriko filen wilip atukmu yet harikik.

³Yet harikikmu ap inowen hele wirim turuk angge seneko yali fil laruk lit ik laruk ane wirim til larukmen il teng num fimahen 500 meter wirim teg latisi ambeg larisi. Larisireg ikma kin ulug hiyag nitisi ane hikit toho ikma sobit harukmen nuyug emberim ke atisi.

⁴Atisimu ap ino nin ik som laruk lit wirim til larukmen il teng num fimahen wirim teg latisi ambeg larisi. Larisireg nin eke ikma kin ulug hiyag nitisi ane hikit toho an ikma kurukmen ik ino il tot yat teg lit nelenggen ke atisi. Atisimu ap ino nin ik som laruk lit il teng num fimahen wirim teg latisi ambeg larisireg ik kin ulug hiyag nitisi ane roho an ikma kurukmen ik il yat teg lit nalunggu ke atisi.

⁵Atisimu nin sebe roho il teng num fimahen wirim hil larukukteg an nindig atmin ulug wal harukmen ik ahum yat tehen nuyug fam ik paloho la fug teg latikik.

⁶Nindig am fug tehen ap inowen an nubam ele uruk lit, ”Hat ap kinangmon welahenonen fano yet hehen?” irisireg an ik pulmuwen lit naplug ik ilanma numbahik waharisi.

⁷Numbahik waharisimu anden yet harukmen ik fuma-fuma e anggolo weregma yet harikik.

⁸Yet harikikmu ap inowen hiyag nutuk lit, ”Ik aru yali fil larukmen eneg Yordan tonggo keyen ik Il Warehon fam kilaptuk lit saho ahik ino fanowap turuk.

⁹Ik ino kema-kema laruk ambeg obog tohowen mun angge man angge warehon olukap turukmu lebe ruruk angge obog toho ine atuk. Ik inowen ik Il Warehon ino oho fanowap turuken ikan anggolowen keleg atuk.

¹⁰Ikan eke hag eke hag ik saho ahik humon ahummu wereg hag toho ketiya oho ik Il Warehon ahummu oho wereg. Werehen ikan watuk inap ik Il Warehon walinggoho unduhuk lit o pumbuk En-Gedi famen tulug En-Eglaim fam enesum ikan watukon arimano le ruruk.

¹¹We ik sene men sabelep wereg ambeg men ik Il Warehon walinggoho werehon fam fobik oho saho welaruhumu aben saho windalik laruk lamuhup.

¹²E eke hag eke hag ik ino fuma-fuma werehon arimano ik Allah ibamen wilip atukon inowen ahaluweyap turukmu inggila halo uk fug angge weregma pikalem eke fam eke fam anggen yihik ferukmen eneg welaruhu. Anggen arimano aben naruk lit inggila fam ap hihir eneptuk lamuhup,” ulug hiyag nitisi.

¹³NINIKNI suwon Allahn an nubam ele uruk lit, ”Hit Israel hinap hununggul unuk nisanggowen welahebon nin hebeloho Israel kinang ino seneg lamuhuben ununggul unuk wal taneg ambi roho minggir isahup. We Yusuf inap arimano eneg kinang minggiri fuhubon piren og isahup. Kinang ino Anden og hisahuk ulug hunumbasi unubam sali imbiyag ambeg ino hit mondabi ngi regman eneg welamuhup.

¹⁵Kinang fibir amuhubon hili iliko fil imbil lahubon tu: Ik saho ahik ayegman tulug o pumbuk Hetlon, Lebo-Hamat, Zedad,

¹⁶Berota, pumbuk Sibraim o Damsyik men Hamat men honggolegma wereg keyen kinang Hauran hili-hilimu o pumbuk Hazar-Enon fam hili imbik lahup.

¹⁷Hili ino ik saho ahik famen o Hazar-Enon fam imbik lahupteg ik eleruk fil o Hamat men Damsyik men hili-hilimu ahandip tibik lahup.

¹⁸Hili yali fil imbik lahubon tu: Kinang Hauran hili-hilimu o pumbuk Hazar-Enon famen tulug ik Yordan o Israel kinang men Gilead kinang men hili reg ahik ino wirig atug ik Il Warehon ayegma o pumbuk Tamar fam imbik lahup.

¹⁹Hili wiriko fil imbik lahubon tu: O pumbuk Tamar famen tulug o Kades horogma ik eleruk Meriba keyen o Mesir kinang hili-hilimuwen ik som wirihig ik saho ahik ayegma imbik lahup.

²⁰Israel kinang hili hubula fil o Mesir kinang hili-hilimuwen ik saho ahik ayeg keyen o pumbuk Lebo-Hamat fam imbik lahup,” irisi.

²¹Irisireg NINIKNI Allahn nin ele uruk lit, ”Israel kinang obog toho hununggul unuk welahebon wal taneg fibir enebuhup.

²²Fibir eneptuk lit ap pohon hit sehelimu werehon oho kinang og isahup. It pohon hit sehelimuwen unumalik indag tarukon arimano fahet Israel ninap yuhon hag toho wereg ulug kinang og isahupmu Israel hinap hununggul unuk wal taneg welahebon sehelimu welamuhup.

²³Ari fahet hit hununggul unuk wal taneg welahebon henemu-henemu welamuhup ambeg ap pohon eke welaruhu halug hit henengginang eke og umuhup. An HINIKNI suwon Allahn nele aru uruk lahi.