Read Angguruk Yali YEHEZKIEL 48 Bible Online

YEHEZKIEL 48 - Angguruk Yali bible

YEHEZKIEL 48

¹Israel kinang iliko fil hili ik saho ahik ayegman tulug yali fil o pumbuk Hetlon, Lebo-Hamat keyen o pumbuk Hazar-Enon fam imbik lahup. Hili ino famen wiriko fil Israel inap ununggul unuk obog toho kinang wal taneg ngi reg lamuhubon tu: Dan inap, Asyer inap, Naftali inap, Manasye inap, Efraim inap, Ruben inap, Yehuda inap men wal taneg ik saho ahik ayegman tulug yali fil Israel kinang hili-hilimu ngi reg lamuhup.

⁸Kinang Yehuda inaben tohon wiriko fil hiren kinang winon eke An nubahet umbuhup. Kinang ino oho ik saho ahik ayegman tulug yali fil Israel kinang hili-hilimu hiyalegma iliko filen wiriko fil yat toho wirim tuhubon il teng obog sehelet obog 12 kilometer wirim tuhup. Kinang ino pulmu An nibam wereg.

⁹Kinang ino minggiri felug NINIKNI Allah fahet ulug kinang yali filen hubula fil wirim tuhubon il teng obog sehelet obog 12 kilometer, iliko filen wiriko fil wirim tuhubon il teng-teng angge 10 kilometer wirim tuhup.

¹⁰Kinang fanowon ino pul ke minggiroho imam Allah iyabuk turuk lamuhup ulug in eneptuson arimano hiyag isahup. Kinang ino wirim harukmen yali filen hubula fil wirim tuhubon il teng obog sehelet obog 12 kilometer, iliko filen wiriko fil wirim tuhubon il teng-teng angge 5 kilometer wirim tuhup. Wirim tuhup ambeg pulmu An nibam werehen kinang ino mondabi fano wereg. Israel inaben An numbahalug siyag ane til-wil norukmu hun Lewi inowen ondohowonen ondohowon Zadoken endetfahon imam arimanowen Lewi inaben turuk latusa ane hikit toho tuk fug angge An men ininggik ahandip toho wereg lit niyabuk turuk latusa. Ari roho turuk latusama kinang Lewi inaben tohon iraham imam arimano kinang mondabi fanowon ino hiyag isahup.

¹³Kinang imam hiyag isahubon iliko fil Lewi inap arimano kinang fanowon ino minggiroho hiyag isahup. Kinang imam hiyag isahubon men Lewi inap hiyag isahubon men ambi regma yali filen hubula fil wirim tuhubon il teng obog sehelet obog 12 kilometer, iliko filen wiriko fil wirim tuhubon il teng-teng angge 5 kilometer wirim tuhup.

¹⁴Kinang ino Israel inaben An INIKNI Allah fahet umbuhup angge re Lewi inap men imam inap menen tor angge oho ayeg waroho ap og isahup fug. Kinang fanowon ino ap winon ininggikmu aruhu fug.

¹⁵Kinang fanowon ino wiriko fil yali filen hubula fil wirim tuhubon il teng obog sehelet obog 12 kilometer, iliko filen wiriko fil wirim tuhubon il teng-teng angge 2 kilometer men misig minggiroho men wirim tuhup. Wirim tuhup ambeg ino kinang yuhunon wereg ulug aben inibam wit taruk lit enembohom foroho lamuhup. Kinang ino pulmu o pumbuk Yerusalem wereg.

¹⁶O Yerusalem ino yat toho wirim turukon men horog toho wirim turukon men ambi reg lit il teng-teng angge 2 kilometer teg laruhu.

¹⁷O Yerusalem walinggoho wam foroho ambeg nunggulig wirim turukon il teng fuwaben 125 teg laruhu.

¹⁸Wam foroho ambeg fuma-fuma kinang yali filen hubula fil wirim turukon il teng-teng angge 5 kilometer wirim tuhup. Wirim tuhup ambeg piren itano kinang fanowon ino wiriko fil weregma o Yerusalem inaben iniyabuk wit taruk lamuhup.

¹⁹Israel inap ununggul unuk wal toho sehelimuwon o Yerusalem wamuhupteg welamuhubon arimanowen kinang ino fam iniyabuk wit taruk lamuhup.

²⁰Kinang imam hiyag isahubon men Lewi inap hiyag isahubon men o pumbuk Yerusalem kinang walinggoho men mangno roho wirim harukmen yat toho wirim turukon men horog toho wirim turukon men ambi reg lit il teng obog sehelet obog 12 kilometer teg laruhu.

²¹Kinang ino fuma-fuma Israel inap onowe suwon kinang hiyag umuhup. Kinang ino hili emberuk lit Israel inap ununggul unuk wal taneg ngi reg ambeg hili umbuhup ane hikit toho hubula fil ik saho ahik ayegma, yali fil Israel kinang hili-hilimu umbuhup. Kinang piren itano honggolegma An nibam men kinang fanowon imam inap hiyag isahubon men Lewi inap hiyag isahubon men o pumbuk Yerusalem men welaruhu. Kinang piren itano iliko fil Yehuda inap enengginang weregma

²³wiriko fil Israel inap ununggul unuk winonen kinang wal taneg ngi reg lamuhubon tu: Benyamin inap, Simeon inap, Isakhar inap, Zebulon inap, Gad inap men wal taneg ik saho ahik ayegman tulug yali fil Israel kinang hili-hilimu ngi reg lamuhup.

²⁸Gad inap enengginang hili wiriko fil o pumbuk Tamar famen tulug o Kades horogma ik eleruk Meriba keyen o Mesir kinang hili-hilimu ik som wirig atug ik saho ahik ayegma imbik lahup.

²⁹Kinang ino obog toho Israel inap ngi regman eneg welamuhuben Anden ihiyon hikit toho kinang ino minggiri felug ununggul unuk wal taneg werehon fibir enebuhup. An HINIKNI suwon Allahn nele aru uruk lahi,” irisi.

³⁰Elehet o pumbuk Yerusalem huk toho kilabehon indit uhan toho ohoma iliko fil, yali fil, wiriko fil, hubula fil ambi reg. Ambi roho oho ambeg itano wal taneg wirim harukmen yat toho wirim turukon il teng-teng angge 2 kilometer wirim teg. Ari roho oho ambeg wal taneg sok kurukon hinahan wereg. Sok itano ununuk Israel inap ununggul unuk nisanggowen hikit toho suwalehon tu: Sok iliko fil werehon ununuk Ruben men, Yehuda men, Lewi men suwaleg. Sok yali fil werehon ununuk Yusuf men, Benyamin men, Dan men suwaleg. Sok wiriko fil werehon ununuk Simeon men, Isakhar men, Zebulon men suwaleg. Sok hubula fil werehon ununuk Gad men, Asyer men, Naftali men suwaleg.

³⁵Elehet o Yerusalem huk toho kilabehon walinggoho wirim til larukmen yat toho wirim turukon il teng obog sehelet obog 9 kilometer wirim teg. Ketiya famen o Yerusalem unuk keron ”NINIKNI Allah Wereg Ambeg” suwaleg laruhu.