Read Angguruk Yali YEHEZKIEL 5 Bible Online

YEHEZKIEL 5 - Angguruk Yali bible

YEHEZKIEL 5

¹Allahn an nubam ele uruk lit, ”Hat ap kinangmon welahenon, karog ayeg olokon eke wahunteg horuk men humbanisung men pale fuhun. Paluhunon arimano anggin wirim turuk angge fam embelug minggiri fuhunmu hinahan aruhu.

²O Yerusalem waling enesug laruhun ane obog aruhumu horuk palehon hinahan aruhuwon misig ino wahunteg o pumbuk pulmuwen indokma yale fuhun. Yale fuhunteg pirenehon ino wahunteg o pumbuk selman karog fam pal-pal hik isahun. Hik isahunteg hinahanehon ino wahunteg homhomowen walug lawag ulug hik isahun. Hik isahunmu Anden mug eneplug laruk lit karog fam unusil lahuk.

³Horuk palehon hik isahunon arimano we tor angge wahunteg hasum wan teg lahenon atogma hililip tahun.

⁴We tor angge wahunon minggiroho han nawag ulug indokma hik isahun. Hik isahunmu harep ulog-ulog nil laruk lit Israel inap obog toho nahu.

⁵Ari roho tuhumu haren Israel inap unubam hele uruk lit, ’Allah NINIKNI inowen ele ehek ane iminon tu holeg lamek: O pumbuk helep fam palehon tu Yerusalem wereg ulug honoluk toho welamek! Anden o pumbuk winon obog toho walinggoho weregma Yerusalem aru kinang pik-pulmu welamag ulug unduhuk fiyag.

⁶Unduhuk fiyag angge famen o pumbuk winon arimanowen An nele ying naptukon apma regma o Yerusalem inap aruman enembol yig nutukon palimu reg. Anden tu men ari men turuk lamuhup ulug komo eneptik iyag ane sobir isalug tuk teg ane fahet hiyag isarik iyahon hikit toho turuk eleg.

⁷Ari fahet hit Yerusalem hinaben An Allah HINIKNI inowen nele iminon tu holeg lamek: O pumbuk winonen An nele we tor angge ying naptukmu hiren nele su roho ying naptuk lit Anden tu men ari men turuk lamuhup ulug komo heneptik iyag ane sobir isalug tuk teg ane fahet hiyag hisarik iyahon hikit toho tuk fug angge o pumbuk winon hit walinggoho werehonen tuk teg ane fahet imbibahon oho windal isaruk lahep.

⁸Ari fahet ketiya Anden hit seliyap heneptuk lit o pumbuk winonen yet hisawag ulug it iniline alem hit hunubam werehon haloho umbuhuk.

⁹Hiren ap inindi siyahap eneptuk ane eneg turuk lahebon fahet Anden misihim oho turuk latik iyag fug ane hit hunubam turuk lit alem angginon fobik ap unubam umbuhuk fuhon ketiya eneg hit hunubam umbuhuk.

¹⁰Umbuhukmu hit sehelimu iniknisiyen unumalikisi yuhon waroho narukmu unumalikisiyen iniknisi naruk lamuhup. Anden hit siyahap henebuhukteg we tor angge welamuhubon arimano homhomowen walug lawag ulug hik-hak hisahuk.

¹¹Hiren amben siyahon til-wil laruk lit tu Allah hag toho wereg ulug wel eneptuk angge unduhuk felug An nibam siyahap tirikip ane fahet An mondabi noluk welahiyonen hit nindi hisa fug angge ap oruk paltuk hag toho pal henebuhuk.

¹²Pal henebuhukmu hit minggiroho hinahan amuhubon misig arimano o pumbuk pulmuwen ouk alem angginon men suburu obok menen war amuhup. Hit pirenehon arimano o pumbuk selma larukmen karog fam hunusuhup. Hit hinahanehon arimano o kema-kema hik hisahukmu larukmen Anden mug heneplug laruk lit karog fam hunusil lahuk.

¹³An nolok peruk lahi ane indok ambulpul hag toho hit hunubam aruhumu eneg nindi yuwag aruhu. Ari roho tuhukmu yet niyahupteg niren NINIKNI Allah nenembol yig utuk latukuk ane fahet nirim peruk lit indi olok toho komo neneptisi ulug honoluk aruhu.

¹⁴Anden hit hinibam halog tuhukmu ap o winamon hit hinibam iraham ke laruk lit yet hisahupteg henebug uruk lit wasubag sup hisarukmu o pumbuk walinggoho werehonen hit hininggaliyap heneptuk lamuhup. It arimanowen enekol nim-nim wenggel haruk lit, ’INIKNI Allahn alem angginon unubam emberuk lit indi irimen olok peruk ane indok ambulpul hag toho unubam tirisi,’ peruk lamuhup ulug An HINIKNI Allahn nele uruk lahi.

¹⁶Anden tog pising turuk hag toho suburu obok humon men hit hunusuruk inap men ouk alem suwon men hunubam monde fik waharuk lit hunumalikisi nawag ulug olomene onolokon mon enebuhukmu hit obog toho siyag amuhup. An HINIKNI Allahn nele aru uruk lahi,’ imihin,” ulug hiyag nitisi.