Read Angguruk Yali YEHEZKIEL 6 Bible Online

YEHEZKIEL 6 - Angguruk Yali bible

YEHEZKIEL 6

¹NINIKNI Allahn an nubam nin ele uruk lit,

²”Hat ap kinangmon welahenon, haren tom Israel kinangma werehon fil horohole leko yet haruk lit tom arimano alem angginon unubam aruhu ane fahet hiyag isamihinon tu,

³’Hit Israel kinangma tom men punu men welahebon, NINIKNI suwon Allahn hit pule fanggong emberimu welahebon hunubam ele urukon tu holeg lamek: An palimu welahiyonen ap seliyon mon enebik waruhukmu punumuwen tu Allah hag toho wereg ulug wel eneptuk lahep ambeg arimano siyahap tibisil lahup.

⁴Siyahap tibisil laruk lit hubu lahaptuk lahep ambeg men amben fano angge yaltuk lahep ambeg men halog toho lin-lan isahup. Lin-lan isahupteg hit henebe waroho hunumbasi wel eneptuk lahebon enelukema hik hisaruk lit hunuwag hiren hubu lahaptuk lahep ambeg arimano walinggoho hik-hak isahup.

⁶Hit hinibam pumbuk obog toho pin halog toho lin isalug punumu usangge wel eneptuk lahep ambeg siyahap turuk lit usangge hit hininggiken laltikibon arimano lilibug tuhupmu hubu lahaptuk lahep ambeg arimano ap enele teng uhup.

⁷Teng uhupmu ap wareg angge lin-lan isahubon sal enebuk fug angge umbusuhupmu Israel hinap honoluk welamuhubonen yet isahupteg, ’NINIKNI Allah wereg,’ ulug honoluk aruhu.

⁸Anden hit Israel hinap hunusuruk lit we tor angge umbusuhukon arimano ininggik hele waroho o wina ke hik-hak isahuk. Hik-hak isahuk ambehen inindimuwen wenggel haruk lit, ’NINIKNI Allah embeselug usangge wel eneptuk latukuk ane fahet NINIKNI Allahn siyahap neneptisimu ketiya ambeg hebeloho lul,’ ulug An nubahet wenggel niyaruk lamuhup. Wenggel niyaruk lit niren amben siyahon eneg turuk latukuk ulug me enepe enebuhu.

¹⁰Ininggali haruk lit NINIKNI Allahn alem angginon hunubam umbuhuk irisi ane ari ele si ane hiyag nisarisi fug ulug onoluk aruhu,’ ehek imihin,” ulug hiyag nitisi.

¹¹Hiyag nitisireg NINIKNI suwon Allahn nin ele uruk lit, ”Hat hinggik tag toho huyug kinangma telim haruk lit hele hi roho imihinon tu, ’Yihi, Israel inaben amben siyahon eneg turuken siyag amuhup! It winon tog elman, winon suburu oboken, winon ouk alem angginonen war amuhup.

¹²It yatma werehon ouken war amuhup, horogma werehon karohen unusuhup, onoluk welamuhubon arimano suburu oboken war amuhup. Obog toho war amuhupmu Anden it unubahet nolok haruk lahi ane eleg aruhu.

¹³It enebe wareg angge o kema-kema tom yaron famen oho punumuwen oho e alman oho nunumbasiyen amben fano pukag ulug hubu lahaptuk ambeg arimano walinggoho usangge iren wel eneptukon eneseheli ke lin-lan uruk lamuhup. Ari teko lahumu yet hahupteg NINIKNI Allah wereg ulug honoluk aruhu.

¹⁴An ninggik leho lit it enengginang atogman atogma lekman tulug o Ribla fam siyahap til lahuk. It obog tohowen NINIKNI Allah wereg ulug onoluk aruhu!’ ehek imihin,” ulug hiyag nitisi.