Read Angguruk Yali YEHEZKIEL 7 Bible Online

YEHEZKIEL 7 - Angguruk Yali bible

YEHEZKIEL 7

¹NINIKNI Allahn an nubam nin ele uruk lit,

²”Hat ap kinangmon welahenon, An HINIKNI suwon Allah inowen kinang Israel fam nele uruk lahiyon tu: Hat atogman atogma welahenon mondabi siyag aruhun!

³Hat siyag aruhun li horog teg! Haren siyag-siyag ane eneg turuk lahenon fahet An nindi inahan turuken huwaruhuk. Haren amben siyahon turuk lahenon ari hebeloho hat hinggareg hubam umbuhuk.

⁴Anden hat nindi hiya fug angge siyahap habuhuk. Haren turuk lahenon Anden hebeloho hubam umbuhukmu amben siyahon haren turuk lahenon ambiyangma hat hinggareg siyag aruhun. Ari roho tuhukmu yet niyahunteg NINIKNI Allah wereg ulug holuk aruhu.

⁵Alem siyahon eke hag eke hag hubam arik oho reg ulug An HIKNI suwon Allahn uruk lahi.

⁶Hat mondabi siyag aruhunon horog teg. Hat elehap haptuk angge huwarik oho lit waharukmu yet himin!

⁷Hit kinang aru fam welahebon, hit eleg amuhubon warik oho reg. Tom famen enehiyehen enele hi roho urukon eleg aruhumu inindi yuk lagmag uhup sambil horog aha.

⁸Anden hat Israel kinang hubahet nolok haruk lahireg huwarik oho lahi. Amben siyahon haren turuk lahenon fahet alem angginon hubam umbuhukmu An nindimu inahan naptuk ane eleg aruhu.

⁹An nindi hiya fug angge siyag ane haren turuk lahenon fahet ayeg waroho huwaruhukmu amben siyahon haren turuk lahenon ambiyangma hat hinggareg siyag aruhun. Ari hubam teko lahumu NIKNI Allahn nuwatisi ulug holuk aruhu.

¹⁰Ap inindimu winik-wonog toho wereg lit onolok turukon saho ril larukmen eneg palimu atisi angge famen it arimano mako wamburuk lit inindi yuk lagmag uhup sambil horog aha! Nit tung ninap welahe ulug enele hemet toho uruk ane eleg aruhu.

¹²It siyag amuhup sambil horog teg. Aben tohon ayeg waroho hilaruk inap enehiyeg ha fug! Iren tohon ayeg waroho og isaruk inap inindi siyag am fug! Allahn olok haruk lit mun angge man angge ap ininggikmu seneg angge siyahap tuhu.

¹³Mun angge man angge aben foroho ane fahet olok harukon eleg aruhu fug. Eleg aruhu fugmu ap fam ayeg waroho og isarukon onoluk welamuhubon arimanowen oho enenggengge hebeloho hilaruk lamuhup fug. Ap obog tohowen siyag ane turuken misig oho oluk welaruhu fug.

¹⁴Tog abul ulug pinggong ele hum toho urukmu hol halug ap obog tohowen wep turuk lit ngik-ngog turuk angge famen Allahn olok ane unubam turuken ap misig oho tog elma laruk eleg.

¹⁵Ap o pumbuk selma werehon arimano karohen unusuhup, o pumbukmu werehon arimano suburu oboken oho ouk alem angginonen oho war amuhup.

¹⁶We tor angge welamuhubon arimano tom fam hirag arik lahakupteg siyag ane turukuk ulug inindi siyahen yalma ele tot toho uruk hag toho nginuk paltuk lit

¹⁷enekolen miye si rurukmu inine roho tuk ane eleg aruhu.

¹⁸Eleg aruhumu unuwag enekolen elek-elek turuk lit fesi lahaboho onoruk kong toho ininggaliyen onorohole sumen saleg lamuhup.

¹⁹Ap suwon welahe ulug eneliliyangge perak emas fam wirihon wan teg angge famen NINIKNI Allahn olok ane tuhu sambil ino perak men emas menen nit windat nenebuk fug teg ulug hik isahup. Emas perak arimano narukmen eneg welalep halug oho enehum ouk alep fug. Ili ruruk angge arimano fam nunumbasi ulug wel eneptuk angge enemben siyahon laltuk lit An nele ying naptuk latusa ane fahet Anden emas perak iren tohon siyahap tuhuk.

²¹Siyahap turuk lit ap o winamon An Allah enepelehonen huhulangge hilawag ulug ininggikmu umbuhukmu wamuhupteg hilaruk lit emas perak fam wirig angge nunumbasi ulug wel eneptukon arimano siyahap tuhup.

²²An nindi isa fug angge nambol yig isahukmu ap huhulangge hilarukon arimano An nibam nindi reg lahiyon fam kuruk lit siyahap tuhup.

²³Ap kinang aru fam werehon arimano ininggik hele waroho o winama imbisik lahuben hele wep toho imbiyok! Kinang aru Israel inaben onolok toho turuk aneyen keleg teg, o Yerusalem aru ap unusuruk aneyen hondo reg.

²⁴Ari fahet Anden o pumbuk winamon onolok anggolo inap arimano wol enebuhukmu o Yerusalem inap inibam ilmig ta wamuhupteg nunumbasi ulug wel eneptuk ambeg arimano siyahap tuhup. Ari roho turuk lit Anden Yerusalem inap enebe hemet til laruk lit inine roho turuk ane ari elehap tuhuk.

²⁵Elehap tuhukmu enemelmel turuken san windat nenepmisi ulug yami ruruk lamuhup angge famen ap misihen oho windat enebuhu fug.

²⁶Alem siyahon eke hag eke hag unubam atukmu aben sono eke ane ha eke ane hiyag isa waharuk lamuhup. Ari roho turukmu Allahn ele hiyag nisamisi ane wereg ano ulug Allah amingmingangge nabi inap enembeg laruk lamuhup angge famen Allah ele eleg ulug hiyag isaruk lamuhup. Allah ibam foroho inap imam inaben oho milal eneptuk ane eleg aruhumu alem onoluk inaben oho komo eneptuk ane eleg aruhu.

²⁷Ap suwon inowen fong watuk lit weregma amloho akolen hirimuruk turukmu unumalikisi unuwag elek-elek angge ruruk lamuhup. Siyag ane iren turukon fahet Anden it ininggarehen alem haltuk ane hikit toho alem angginon unubam umbuhuk. Umbuhukmu NINIKNI Allah wereg ulug onoluk aruhu,’ ehek imihin,” ulug hiyag nitisi.